કાજલ મહેરિયાના નામે નકલી છૂટાછેડાનું રહસ્ય ઘેરાયું

ફરી ચર્ચામાં આવી લોકગાયિકા કાજલ મહેરિયા
ગુજરાતની જાણીતી લોકગાયિકા કાજલ મહેરિયા ફરી એકવાર ચર્ચાના કેન્દ્રમાં આવી છે. આ વખતે કોઈ ગીત કે કાર્યક્રમ નહીં. પરંતુ તેના નામે ફેમિલી કોર્ટમાં દાખલ કરાયેલી શંકાસ્પદ છૂટાછેડાની અરજી છે. અરજીની જાણ થતાં કાજલ મહેરિયા અને તેમના પતિ અલ્પેશ ઠાકોર બંને આશ્ચર્યમાં મૂકાઈ ગયા છે.

નોટિસ મળતા ખુલ્યો સમગ્ર મામલો
મહેસાણાની ફેમિલી કોર્ટમાં દાખલ થયેલી અરજી પર સુનાવણી દરમિયાન કાજલ મહેરિયા અને અલ્પેશ ઠાકોરને નોટિસ પાઠવવામાં આવી હતી. ત્યારબાદ બંને પક્ષને ખબર પડી કે તેમના નામે કોઈ અજાણી વ્યક્તિએ અરજી દાખલ કરી છે. આ ઘટનાએ સમગ્ર મામલાને રહસ્યમય બનાવી દીધો છે.

અરજીમાં લગ્ન તારીખને લઈને વિસંગતતા
ફેમિલી કોર્ટમાં દાખલ કરાયેલી અરજીમાં કાજલ મહેરિયા અને અલ્પેશ ઠાકોરના ફોટોગ્રાફ સાથે એવો ઉલ્લેખ કરવામાં આવ્યો હતો કે તેમના લગ્ન 1 મે 2024ના રોજ થયા હતા. જ્યારે અગાઉ જાહેર થયેલા લગ્ન પ્રમાણપત્ર મુજબ બંનેના લગ્ન 10 ઓક્ટોબર 2025ના રોજ થયા હતા. આ વિસંગતતાએ અરજીની વિશ્વસનીયતા પર સવાલો ઉભા કર્યા છે.

અરજીમાં શું લખ્યું છે?
ફેમિલી કોર્ટમાં થયેલી અરજીમાં કાજલ મહેરિયા અને તેના પતિ અલ્પેશ ઠાકોરનો ફોટો લગાવેલો છે. તેમના નામે થયેલી ભેદી અરજીમાં ચોંકાવનારો ઉલ્લેખ કર્યો છે. અરજીમાં લખ્યું છે કે, 1 મે, 2024ના રોજ મહેસાણામાં હિન્દુ શાસ્ત્રોકવિધિ પ્રમાણે અમારા લગ્ન થયા હતા. ભૂતકાળમાં કાજલ મહેરિયાએ જાહેર કરેલા મેરેજ સર્ટિફિકેટ પ્રમાણે તેમના લગ્ન 10 ઓક્ટોબર, 2025ના રોજ થયા હતા.

બંને વચ્ચે મનમેળ ન હોવાનો દાવો કરાયો
અરજીમાં એવો દાવો કરવામાં આવ્યો છે કે બંને વચ્ચે મતભેદો છે અને લગ્નજીવન આગળ સુખદ રીતે ચાલે તેવી શક્યતા નથી. ઉપરાંત કાજલ મહેરિયા છેલ્લા એક વર્ષથી પોતાના પિયરમાં રહેતી હોવાનું પણ લખવામાં આવ્યું હતું. જોકે, આ તમામ વિગતોને કાજલ અને તેમના પતિએ નકારી કાઢી છે.

કોર્ટમાં જ ખુલ્લી પડી નકલી અરજી
સુનાવણી દરમિયાન જ કોર્ટ સમક્ષ સ્પષ્ટ થયું કે અરજી કાજલ મહેરિયા કે તેમના પતિ દ્વારા કરવામાં આવી જ નથી. આ ઘટનાએ કોર્ટ તંત્રને પણ ચોંકાવી દીધું હતું. કોર્ટમાં હાજર રહેલા કાજલના વકીલે પણ આ અરજી વિશે અજાણ હોવાનું જણાવ્યું હતું.

વકીલોના નામે પણ સર્જાયો વિવાદ
અરજીમાં વકીલ તરીકે જે.સી. મોદીનું નામ દર્શાવવામાં આવ્યું હતું. કોર્ટના આદેશથી તેમનો સંપર્ક કરવામાં આવ્યો ત્યારે તેમણે જણાવ્યું હતું કે, આ અરજી સાથે તેમનો કોઈ સંબંધ નથી. બાદમાં અન્ય એક વકીલ રાજેશ સોનીનું નામ સામે આવ્યું. પરંતુ તેમણે પણ આ સમગ્ર મામલાથી પોતે અજાણ હોવાનું જણાવ્યું હતું.

કોર્ટ રજિસ્ટ્રારની રજા ચર્ચામાં
આ સમગ્ર ઘટનામાં વધુ એક રસપ્રદ વળાંક ત્યારે આવ્યો જ્યારે કોર્ટના રજિસ્ટ્રાર પણ અચાનક રજા પર ઉતરી ગયા. જેના કારણે આ પ્રકરણને લઈને અનેક પ્રકારની અટકળો શરૂ થઈ ગઈ છે.

કોર્ટે નકલી અરજી ફગાવી
અરજીનું સત્ય સામે આવતા મહેસાણાની ફેમિલી કોર્ટે અરજીને રદબાતલ કરવાનો નિર્ણય લીધો હતો. કોર્ટે સ્પષ્ટ કર્યું કે કાજલ મહેરિયા અને અલ્પેશ ઠાકોર વચ્ચે કોઈ કાયદાકીય વિવાદ નથી અને તેમની સામેની અરજી માન્ય નથી.

મામલો પોલીસ સ્ટેશનમાં પહોંચ્યો 
આ ઘટના બાદ કાજલ મહેરિયાએ મહેસાણા એ ડિવિઝન પોલીસ સ્ટેશનમાં અજાણ્યા શખ્સ સામે ફરિયાદ કરી કાયદાકીય કાર્યવાહી કરવાની માંગ કરી છે. પોલીસે અરજી સ્વીકારી પ્રાથમિક તપાસ શરૂ કરી છે. પરંતુ કોર્ટના આદેશ બાદ જ સત્તાવાર ગુનો નોંધવાની પ્રક્રિયા આગળ વધશે.

લગ્ન સમયે પણ સર્જાયો હતો વિવાદ
કાજલ મહેરિયાએ અલ્પેશ ઠાકોર સાથે પ્રેમલગ્ન કર્યા બાદ પણ ભારે વિવાદ સર્જાયો હતો. પરિવાર અને સમાજના કેટલાક આગેવાનો દ્વારા તેમના સંબંધનો વિરોધ કરવામાં આવ્યો હતો. સમગ્ર મામલો પોલીસ સ્ટેશન સુધી પહોંચ્યો હતો અને સોશિયલ મીડિયા પર પણ તેની ભારે ચર્ચા થઈ હતી.

સેરથા ગામે પહોંચ્યો હતો પરિવાર
એપ્રિલ મહિનામાં કાજલ મહેરિયાના પરિવારજનો અને સમાજના લોકો ગાંધીનગર જિલ્લાના સેરથા ગામે પહોંચ્યા હતા. બંને પક્ષ વચ્ચે તણાવની સ્થિતિ ઉભી થતાં પોલીસની મદદ લેવી પડી હતી. ત્યારબાદ બંને પક્ષોને પોલીસ સ્ટેશન બોલાવી મામલો શાંત પાડવાનો પ્રયાસ કરવામાં આવ્યો હતો.

સોશિયલ મીડિયા પર આપ્યો હતો જવાબ
વિવાદ દરમિયાન કાજલ મહેરિયાએ સોશિયલ મીડિયા પર વીડિયો જાહેર કરીને પોતાની સ્થિતિ સ્પષ્ટ કરી હતી. તેમણે જણાવ્યું હતું કે તેઓ કાયદાકીય રીતે લગ્ન કરી ચૂક્યા છે અને હવે ધમકીઓ કે અભદ્ર ટિપ્પણીઓ સામે કાનૂની કાર્યવાહીનો માર્ગ અપનાવશે.

નવા કાવતરાથી ફરી ચર્ચામાં કાજલ
હવે છૂટાછેડાની નકલી અરજીના મામલાએ ફરી એકવાર કાજલ મહેરિયાને ચર્ચાના કેન્દ્રમાં લાવી દીધા છે. કોણે અને કયા હેતુથી આ અરજી દાખલ કરી તે અંગે તપાસ આગળ વધતાં આગામી દિવસોમાં નવા ખુલાસા સામે આવે તેવી શક્યતા વ્યક્ત કરવામાં આવી રહી છે.