અમદાવાદમાં ટ્રક ચાલકોનો આતંક, વસ્ત્રાલ રિંગ રોડ પર ટ્રકની અડફેટે વૃદ્ધ દંપતીનું મોત

અમદાવાદના રસ્તાઓ પર બેફામપણે દોડતાં ટ્રક અને ડમ્પરો યમરાજા બની ચુક્યા છે. ટ્રક અને ડમ્પરો પર અંકુશ લગાવવામાં અમદાવાદ પોલીસ સદંતર નિષ્ફળ ગઇ છે. આજે સવારે અમદાવાદના વસ્ત્રાલ રિંગ રોડ પર પાંજરાપોળ ચાર રસ્તા પાસે બનેલા દર્દનાક અકસ્માતમાં મંદિરેથી દર્શન કરીને પરત ફરી રહેલું બાઇક સવાર દંપતી મોતને ભેટ્યું હતું. 

અમદાવાદના વસ્ત્રાલ રિંગ રોડ પર બનેલી આ ઘટનાની મળેલી માહિતી મુજબ 62 વર્ષીય કાંતિભાઇ રવજીભાઇ પટેલ અને તેમના પત્ની 60 વર્ષીય દક્ષાબેન કાંતિભાઇ પટેલ મંદિરે દર્શ કરવા ગયા હતા. તેઓ મંદિરમાં દર્શન કરીને બાઇક પર ઘેર પરત ફરી રહ્યા હતા ત્યારે વસ્ત્રાલ રિંગ રોડ પર પાંજરાપોળ પાસે બેફામપણે ફુલ સ્પીડમાં આવેલા ટ્રક ચાલકે તેમને અડફેટમાં લીધા હતા.

આ અકસ્માત એટલો ભયંકર હતો કે પટેલ દંપતી પર ટ્રકનું ટાયર ફરી વળ્યું હતું અને બંનેનું સ્થળ પર જ મોત થયું હતું. ઘટના બાદ ટ્રક ચાલક ફરાર થઇ ગયો હતો.

ઘટનાની જાણ થતાં રામોલ પોલીસ સ્થળ પર ધસી ગઇ હતી અને ફરાર ટ્રક ચાલકની શોધખોળ કરી રહી છે. ટ્રક ચાલકની ભૂલના કારણે વૃદ્ધ દંપતીએ જાન ગુમાવવો પડ્યો હતો.