Tapi: પત્ની અને પુત્રીને મોતને ઘાટ ઉતારી યુવકે કરી આત્મહત્યા 

તાપીમાં હ્રદય કંપાવી દે તેવી ઘટના સામે આવી છે. ડોલવણ તાલુકાના વરજાખણ ગામમાં એક જ પરિવારના ત્રણ સભ્યોના મોત થયા છે. એક જ પરિવારના ત્રણ સભ્યોના મોતના સમાચારથી સમગ્ર વિસ્તારમાં ચકચાર મચી ગઈ છે. 

મળેલ માહિતી મુજબ, આરોપી જતીન પટેલે પોતાની 24 વર્ષીય પત્ની સુલોચના પટેલ અને 7 વર્ષની પુત્રી મિશ્વાકુમારીની ગળેટૂંપો દઈ હત્યા કરી હતી. આ ભયાવહ કૃત્ય બાદ જતીન પટેલે પોતે પણ ગળે ફાંસો ખાઈ આત્મહત્યા કરી લીધી હતી. 

આત્મહત્યા પહેલાંની જતીન પટેલે ઇન્સ્ટાગ્રામ સ્ટોરી મૂકી હતી, તેના ઇન્ટાગ્રામ એકાઉન્ટ પર જતીને 23 કલાક પહેલા મૂકેલી સ્ટોરીમાં લખ્યું હતું, “જિસને ભી દિયા એક બુંદ સહારા, રહી ઝિંદગી તો સમુંદર લૌટાયેંગે.” આ સ્ટોરી તેને આ ઘટના પહેલા મૂકી હતી જેમાં પોતાના આપઘાતનો સંકેત તેણે આપ્યો હતો.

આ ઘટનાની જાણ થતાં જ પોલીસ ઘટનાસ્થળે પહોંચી હતી. પોલીસે અગમ્ય કારણોસર હત્યા બાદ આત્મહત્યાનો ગુનો દાખલ કરી કાર્યવાહી હાથ ધરી છે. હાલ પોલીસે આ ઘટનાની અલગ અલગ દિશામાં તપાસ શરૂ કરી છે, જેથી આ કરુણ ઘટના પાછળનું સત્ય જાણી શકાય. આ ઘટનાને કારણે પરિવાર અને ગામ બંનેમાં શોકનો માહોલ છવાઈ ગયો છે.