સુરત:નવજાત બાળકીને ક્રિકેટ ગ્રાઉન્ડમાં ત્યજી દેવાઈ

સુરત શહેરના ઈચ્છાપોર વિસ્તારમાં આવેલા જુના કવાસ ક્રિકેટ ગ્રાઉન્ડમાંથી આજે સવારે એક અત્યંત કરુણ અને સંવેદનશીલ ઘટના સામે આવી છે. સવારે આસપાસના લોકોએ ક્રિકેટ ગ્રાઉન્ડ નજીકથી એક નવજાત બાળકીના રડવાનો અવાજ સાંભળ્યો હતો. લોકો ઘટનાસ્થળે દોડી આવતા તેમને તાજી જન્મેલી અને ત્યજી દેવાયેલી હાલતમાં એક માસૂમ બાળકી મળી આવતા સમગ્ર વિસ્તારમાં ચકચાર મચી ગઈ હતી.

બાળકીને ત્યજી દેવાના આ માનવતા વિરોધી કૃત્ય પાછળ પ્રાથમિક અનુમાન લગાવવામાં આવી રહ્યું છે કે, કોઈ મહિલાએ પોતાના 'પાપ'ને છુપાવવા કે અન્ય કોઈ સામાજિક કારણોસર આ નવજાત બાળકીને અહીં છોડી મૂકી હોઈ શકે છે.

 તાત્કાલિક સારવાર માટે સિવિલમાં ખસેડાઈ

આ કરુણ બનાવની જાણ થતાં જ ઈચ્છાપોર પોલીસ સ્ટેશનનો સ્ટાફ તાત્કાલિક સ્થળ પર દોડી આવ્યો હતો. પોલીસે સમય ગુમાવ્યા વિના નવજાત બાળકીનો કબજો મેળવ્યો અને તેને વધુ સારવાર તથા સંભાળ માટે સિવિલ હોસ્પિટલ ખાતે ખસેડી હતી. હાલમાં બાળકીની તબિયત અંગેના મેડિકલ રિપોર્ટની રાહ જોવાઈ રહી છે.

પોલીસે આ ત્યજી દેવાયેલી બાળકીના માતા-પિતાને શોધી કાઢવા માટે સઘન તપાસ શરૂ કરી છે. આસપાસના વિસ્તારના CCTV ફૂટેજ તપાસવા અને સ્થાનિક લોકોની પૂછપરછ કરવાની કાર્યવાહી ચાલી રહી છે.

₹11,000નું ઇનામ 

આ સંવેદનશીલ ઘટનામાં પોલીસે એક અનોખું પગલું ભર્યું છે. ઈચ્છાપોર પોલીસે બાળકીને ત્યજી દેનાર માતા-પિતાને શોધી કાઢનાર અથવા તેમની ચોક્કસ માહિતી આપનાર વ્યક્તિ માટે ₹11,000નું રોકડ ઇનામ જાહેર કર્યું છે. પોલીસે સામાન્ય જનતાને આ ગુનાહિત અને માનવતા વિરોધી કૃત્ય કરનારને કાયદાના સકંજામાં લાવવા માટે મદદ કરવા અપીલ કરી છે. પોલીસની આ જાહેરાત સ્થાનિક લોકોમાં ચર્ચાનો વિષય બની છે.