Surat ના રત્નકલાકારોનો પોકાર, શિક્ષણ સહાય પેકેજમાં સંપૂર્ણ ફી અને વ્યાપક લાભની માંગ...

હીરા ઉદ્યોગમાં ચાલી રહેલી મંદીના કારણે રત્નકલાકારોની આર્થિક સ્થિતિ કફોડી બની છે. આવા સમયે, સરકારે બેરોજગાર રત્નકલાકારોના બાળકો માટે જાહેર કરેલ "શિક્ષણ સહાય પેકેજ" એક આવકાર્ય પગલું છે. જોકે, આ યોજનાનો લાભ વધુને વધુ જરૂરિયાતમંદ રત્નકલાકારો સુધી પહોંચે તે માટે તેમાં કેટલાક મહત્વના સુધારા કરવાની તાતી જરૂરિયાત છે. ડાયમંડ વર્કર યુનિયન ગુજરાત દ્વારા આ અંગે CM સમક્ષ કેટલીક મુખ્ય માંગણીઓ રજૂ કરવામાં આવી છે.

શિક્ષણ ફી સહાયનો વ્યાપ વધારવો...

વર્તમાન પેકેજમાં ₹13,500/-ની જે મર્યાદા નક્કી કરવામાં આવી છે, તેને દૂર કરીને બાળકોની સંપૂર્ણ શિક્ષણ ફી સરકાર દ્વારા ભરવામાં આવે તેવી માંગ છે. આ ઉપરાંત, ફક્ત સંપૂર્ણ બેરોજગાર રત્નકલાકારો જ નહીં, પરંતુ અર્ધ-બેરોજગાર રત્નકલાકારો (જેમના પગાર અડધા થઈ ગયા છે) ના બાળકોને પણ આ સહાય પેકેજનો લાભ આપવો જોઈએ. મંદીની અસરથી કોઈ રત્નકલાકાર બાકી નથી, ત્યારે આ વ્યાપક અભિગમ અત્યંત જરૂરી છે.

રત્નકલાકારની વ્યાખ્યા અને નિયમોમાં સુધારા...

હીરા ઉદ્યોગમાં મોટાભાગના કારખાનાઓ ફેક્ટરી એક્ટ, 1948 હેઠળ નોંધાયેલા હોવા છતાં, મજૂર કાયદાનું સરેઆમ ઉલ્લંઘન થાય છે. આના પરિણામે, ઘણા રત્નકલાકારો પાસે કંપનીનું આઈ-કાર્ડ, પગાર સ્લીપ, ESIC, PF જેવા મહત્વના પુરાવા હોતા નથી. બીજી તરફ, સરકાર દ્વારા પણ રત્નકલાકારોની કોઈ સત્તાવાર નોંધણી થતી નથી. આથી, યોજનાનો લાભ રત્નકલાકારો સુધી પહોંચે તે માટે રત્નકલાકાર અને બેરોજગાર રત્નકલાકારની વ્યાખ્યા અને નિયમોમાં સુધારો કરવો અનિવાર્ય છે, જેથી પુરાવાના અભાવે કોઈ રત્નકલાકાર યોજનાના લાભથી વંચિત ન રહે.

કમિટીમાં રત્નકલાકારોના પ્રતિનિધિત્વની આવશ્યકતા...

યોજનાની પારદર્શક અને અસરકારક અમલવારી માટે જિલ્લા સ્તરે કલેક્ટરશ્રીની અધ્યક્ષતામાં બનતી કમિટીમાં ઔદ્યોગિક સલામતી અને સ્વાસ્થ્યની કચેરીના સંયુક્ત નિયામકશ્રીને સામેલ કરવા જોઈએ. આ ઉપરાંત, રાજ્ય, જિલ્લા અને તાલુકા સ્તરની કમિટીઓમાં રત્નકલાકારોના પ્રતિનિધિઓ (જેમ કે ડાયમંડ વર્કર યુનિયન ગુજરાત) ને પણ સામેલ કરવા જોઈએ. આનાથી યોજનાના અમલીકરણમાં રત્નકલાકારોના વાસ્તવિક પ્રશ્નો અને જરૂરિયાતોને ધ્યાનમાં લઈ શકાશે.

આ સુધારાઓ દ્વારા શિક્ષણ સહાય પેકેજ ખરેખર જરૂરિયાતમંદ રત્નકલાકાર પરિવારો માટે એક આશાનું કિરણ બની રહેશે અને તેમના બાળકોના ભવિષ્યને સુરક્ષિત કરવામાં મદદ કરશે.