Surat BJP Leaders Son Murdered: સુરતના ઉધના રોડ નંબર 6 ખાતે કાયદો અને વ્યવસ્થાની સ્થિતિને પડકારતી એક અત્યંત ચોંકાવનારી ઘટના સામે આવી છે. લિંબાયતના ધારાસભ્ય સંગીતાબેન પાટીલના અત્યંત નજીકના ગણાતા ભાજપના મહિલા અગ્રણી જયશ્રીબેન દલાલના 21 વર્ષીય પુત્ર જય દલાલની જાહેરમાં તીક્ષ્ણ હથિયારોના અસંખ્ય ઘા ઝીંકી ક્રૂરતાપૂર્વક હત્યા કરવામાં આવી છે. મૃતક જય દલાલ પોતે પણ ભાજપ સંગઠન સાથે જોડાયેલો હતો અને ડીંડોલી વોર્ડ યુવા મોરચાના ઉપપ્રમુખ તરીકે સક્રિયપણે પક્ષની કામગીરી સંભાળતો હતો. સત્તાધારી પક્ષના એક યુવા પદાધિકારીની આ રીતે ધોળા દિવસે હત્યા થતાં સમગ્ર રાજકીય આલમમાં ભારે ખળભળાટ મચી ગયો છે.
રાત્રે ફોન આવ્યા બાદ બોલાવીને કરાઈ હત્યા મૃતકની માતા અને ભાજપના મહિલા નેતા જયશ્રીબેન દલાલે આક્રોશ અને આક્રંદ સાથે જણાવ્યું કે, તેમનો એકનો એક પુત્ર જય રાત્રે સાડા આઠ વાગ્યા સુધી ઘરે જ હતો. ત્યારબાદ તેના કોઈ મિત્રનો ફોન આવતા, તે બહાર જમવાનું કહીને ઘરેથી નીકળ્યો હતો. મોડી રાત્રે સવા બાર વાગ્યાના અરસામાં પરિવાર પર ફોન આવ્યો કે જય પર જીવલેણ હુમલો થયો છે અને તેને ગંભીર હાલતમાં હોસ્પિટલ ખસેડાયો છે. હોસ્પિટલ પહોંચતા જ ટૂંકી સારવાર બાદ જયે દમ તોડ્યો હતો.
પાસાની અદાવતમાં હત્યા કરાઈ હોવાનો માતાનો આક્ષેપ જયશ્રીબેનના જણાવ્યા અનુસાર, મિલિન ચકલી અને પંકજ પાટીલ નામના ત્રણ માથાભારે શખસોએ ભેગા મળીને તેમના પુત્ર પર ઘાતકી હુમલો કર્યો હતો. આરોપીઓ અગાઉ પણ અનેક ગુનાઓમાં જેલ જઈ ચૂક્યા છે અને તાજેતરમાં જ 'પાસા' (PASA) હેઠળ જેલમાંથી મુક્ત થયા હતા. આરોપીઓ એવી ખોટી શંકા રાખતા હતા કે જયના કારણે જ તેમને પાસા હેઠળ જેલ થઈ હતી. આ અદાવત રાખીને તેમણે જયને નિશાન બનાવ્યો હતો. પીડિત માતાએ ન્યાયની ગુહાર લગાવતા પ્રશાસન પાસે માગ કરી છે કે તમામ ગુનેગારોને ફાંસીની સજા આપવામાં આવે.
પોલીસે તપાસના ચક્રો ગતિમાન કર્યા ઘટનાની ગંભીરતાને જોતાં ઉધના પોલીસ સહિત ઉચ્ચ પોલીસ અધિકારીઓનો કાફલો ઘટનાસ્થળે અને હોસ્પિટલ દોડી ગયો હતો. પોલીસે ગુનો નોંધીને ફરાર થઈ ગયેલા ત્રણેય હત્યારાઓને ઝડપી પાડવા માટે અલગ-અલગ ટીમો બનાવીને વિવિધ વિસ્તારોમાં સઘન શોધખોળ શરૂ કરી છે. આ ઘટનાને પગલે સ્થાનિક રહીશોમાં પણ ભારે ભયનો માહોલ વ્યાપી ગયો છે.

સુરતમાં ભાજપ નેતાની હત્યા

જાહેરમાં તીક્ષ્ણ હથિયારના ઘા ઝીંકી ભાજપ યુવા મોરચાના ઉપપ્રમુખ જય દલાલની હત્યા

May 18, 2026 | 12:06 IST