દ્વારકામાં તોફાની દરિયો, 15 ફૂટ ઊંચા ઉછળી રહ્યા મોજા

દેવભૂમિ દ્વારકામાં દરિયાએ રૌદ્ર સ્વરૂપ ધારણ કરી ગયો છે. અરબી સમુદ્રમાં ભારે પવન અને તેજ કરંટના કારણે દરિયા કિનારે 10થી 15 ફૂટ ઊંચા મોજા ઉછળી રહ્યા છે. ખાસ કરીને ભડકેશ્વર મહાદેવ મંદિરના પાછળના ભાગમાં મોજાનો જોરદાર ઘસારો જોવા મળ્યો છે, જેને કારણે સ્થળ પર સિક્યુરિટી તૈનાત કરવામાં આવી છે. છતાં, અમુક સહેલાણીઓ જીવના જોખમે સેલ્ફી અને વીડિયો રિલ્સ ઉતારી રહ્યા છે.

સહેલાણીઓનો ભયાવહ આનંદ

ભડકેશ્વર અને ગળતેશ્વર મહાદેવ મંદિરોના દરિયા કિનારે ઉછળતા મોજાઓ જોવા મોટી સંખ્યામાં સહેલાણીઓ ઉમટ્યા છે. અનેક લોકોએ મોજાની વચ્ચે ઉભા રહીને વીડિયો અને ફોટા લેવાની મજા માણી છે. જોકે, આવા દ્રશ્યોને લઈને સ્થાનિક તંત્ર ચિંતિત છે.

હવામાન વિભાગની આગાહી

હવામાન વિભાગે દક્ષિણ ગુજરાત અને કચ્છ-સૌરાષ્ટ્રના દરિયાકાંઠે તોફાની પવન અને ભારે વરસાદની આગાહી આપી છે. તેની અસર તરીકે દ્વારકામાં દરિયા કાંઠે ભયજનક દ્રશ્યો સર્જાયા છે. ગાયત્રી મંદિર, લાઈટ હાઉસ અને સમુદ્ર નારાયણ મંદિર પાસે પણ મોજાની અસર જોવા મળી હતી.

માછીમારો માટે ચેતવણી

દ્વારકા તંત્ર અને હવામાન વિભાગે માછીમારો ન દરિયો ખેડવાની સૂચના આપી છે. તફાવતભર્યું વાતાવરણ અને દરિયાની ઉગ્રતા જીવન માટે જોખમરૂપ બની શકે છે.