કચ્છમાં ઓપરેશન સિંદૂરની યાદમાં થિમ આધારિત 'સિંદૂર વન' બાંધાવશે, દોઢ વર્ષમાં થશે તૈયાર

પાકિસ્તાનમાં આતંકીઓના ખાત્મા માટે ભારત સરકારે સફળતાપૂર્વક 'ઓપરેશન સિંદૂર' હાથ ધર્યું હતું. હવે ગુજરાત સરકાર આ ભવ્ય મિશનને સ્મૃતિરૂપ આપવા કચ્છમાં ‘સિંદૂર વન’ નામે એક વિશાળ સ્મારક પાર્ક બનાવશે. આ પાર્ક સુરક્ષા દળો પ્રત્યે દેશની કૃતજ્ઞતા અને એકતાનું પ્રતિબિંબ રહેશે.

આ સ્મારક પાર્ક કચ્છ જિલ્લાના ભુજ-માંડવી રોડ પર મિર્ઝાપુર ખાતે વન વિભાગની 8 હેક્ટર જમીન પર બાંધવામાં આવશે. કલેક્ટર આનંદ પટેલે જણાવ્યું કે, દોઢ વર્ષમાં આ પાર્ક તૈયાર થવાનો અંદાજ છે અને પ્રારંભિક કામગીરી પણ શરૂ થઈ ગઈ છે.

અધિકારીઓ મુજબ, સિંદૂર વન પાર્ક ઓપરેશન સિંદૂર દરમિયાન સેના, વાયુસેના, BSF અને સમુદાય દ્વારા દર્શાવાયેલા સહયોગને શાશ્વત યાદરૂપે સ્થાપિત કરશે. મુખ્ય વન સંરક્ષક સંદીપ કુમારે જણાવ્યું કે, પાર્કમાં 36 પ્રજાતિના છોડ વાવવામાં આવશે અને દરેક હેક્ટરે આશરે 10,000 છોડનો ધંધો કરાશે.

આ પાર્ક સ્થાનિક પર્યાવરણ અને માટી અનુસાર રચાશે જેમાં સિંદૂરનો છોડ કેન્દ્રમાં રહેશે. આ ઉપરાંત, પાર્કમાં ઓપરેશન સિંદૂર દરમિયાન ઉપયોગમાં લીધેલા ઉપકરણો અને વિમાનોના ડાયોરમા પણ જોવા મળશે.

મહત્વનું છે કે, ઓપરેશન સિંદૂર પછી વડાપ્રધાન નરેન્દ્ર મોદી કચ્છ પધાર્યા હતા અને તેમની પહેલી જાહેર સભા પણ મિર્ઝાપુર નજીક યોજાઈ હતી. 26 મેની સભા દરમિયાન માધાપરની મહિલાઓએ વડાપ્રધાનને ‘સિંદૂરનો છોડ’ ભેટ કર્યો હતો. PM મોદીએ આ છોડને PM હાઉસ લઇ જવાનો સંકલ્પ વ્યક્ત કર્યો હતો.