કામધેનુમાં કૌંભાડ, યુવરાજસિંહનો આક્ષેપ

ગાંધીનગરની કામધેનુ યુનિવર્સિટી ફરી વિવાદમાં આવી છે. કામધેનુ યુનિવર્સિટીની ભરતી પ્રક્રિયા મુદ્દે કૌભાંડ થયાનો યુવરાજસિંહ જાડેજાએ આક્ષેપ કરતાં મામલો ચર્ચાસ્પદ બન્યો છે. 9 મહિના અગાઉ હાથ ધરાયેલી ભરતી અંતર્ગત સિનિયર રિસર્ચ આસિસ્ટન્ટ(ફિશરીઝ) વર્ગ-3 ની ભરતીમાં ગેરરીતિ બાબતે ઉમેદવારોએ લેખિત રજૂઆત કરી હોવા છતાં તપાસ સહિતની કોઈપણ પ્રકારની કાર્યવાહી નહી થતાં યુનિવર્સિટીના સત્તાધીશો શંકાના ઘેરામાં આવી ગયા છે.

કામધેનું યુનિવર્સિટીમાં 9 મહિના પહેલા એટલે કે 12/03/2024ના રોજ અલગ અલગ સંવર્ગની ભરતી પ્રક્રિયા અંતર્ગત જાહેરાત(જા.ક્ર. 03/2024) બહાર પાડવામાં આવી હતી. જ્યારે 15/03/2024 થી ફોર્મ ભરવાની શરૂઆત થઈ હતી. જેમાં એક "સિનિયર રિસર્ચ આસિસ્ટન્ટ (ફિશરીઝ)" વર્ગ 3ની જગ્યા માટે કરાયેલી ભરતી બાબતે સવાલ ઉઠી રહ્યા છે. સિનિયર રિસર્ચ આસિસ્ટન્ટની ભરતી બાદ મદદનીશ પ્રાધ્યાપક તરીકે બઢતી થતી હોવાથી યુનિવર્સિટીમાં પ્રતિષ્ઠિત પદ ગણાય છે. તાજેતરમાં યોજાયેલી પરીક્ષામાં સેંકડો ઉમેદવારોએ પરીક્ષા આપી હતી.

પરીક્ષામાં 200 માર્કસનું MCQ પ્રશ્નપત્ર પૂછવામાં આવ્યુ હતુ. પરીક્ષામાં પૂછાયેલું MCQ પ્રશ્નપત્ર પહેલાથી એટલે વર્ષ 2021થી સોશિયલ મીડિયા વેબ બ્લોગ પોસ્ટ ઉપર ઉપલબ્ધ હોવાનો યુવરાજસિંહ જાડેજાએ આક્ષેપ કર્યો છે.  આ "બ્લોગ" ફિશરીઝ કોલેજનાં એક પ્રોફેસર દ્વારા હિંમતનગરથી ચલાવાતો હોવાનો તેમજ જે વ્યક્તિ મેરીટમાં પહેલા ક્રમાંકે આવેલા વ્યક્તિ હિંમતનગરથી હોવાનો આક્ષેપ કરી આ સંયોગ છે કે પછી કૌભાંડ છે તે બાબતે સવાલ ઉઠાવ્યા છે.

ગુજરાતમાં ત્રણ ફિશરીઝ કોલેજો હોવા છતાં કામધેનું યુનિવર્સિટીમાં એકપણ અધિકારી ફિશરીઝ ફિલ્ડનો વ્યક્તિ નહી હોવાનું યુવરાજસિંહે ઉમેર્યુ છે. વર્ષ 2021નું પેપર પૂછવાનો શું મતલબ શું?, શું કામધેનુ યુનિવર્સિટી પાસે બીજા કોઈ સારા પેપર સેટર જ નથી?, ઉમેદવારો દ્વારા લેખિત રજૂઆત કરવા છતાં કેમ તપાસ કરવામાં ન આવી? જેવા યુવરાજસિંહે સવાલ ઉઠાવ્યા છે. પબ્લિક ડોમેઈનમાં વર્ષ 2021નું અપલોડ થયેલું પેપર 2024માં પૂછી વ્હાલા દવલાને પાસ કરવાનું ષડ્યંત્ર તો નથી ચાલતું ને? તેવા આક્ષેપ કરી નિષ્પક્ષ તપાસ કરવા મત્સ્યોદ્યોગ અને પશુપાલન મંત્રી તેમજ મુખ્યમંત્રી ભૂપેન્દ્ર પટેલ સમક્ષ માંગ કરી છે. 
આ પરીક્ષા અંતર્ગત એકવાર ફાઇનલ કી જાહેર કર્યા બાદ તે મુજબ રિઝલ્ટ જાહેર (18/11/2024) કરવામાં આવ્યુ હતુ. ત્યારબાદ થોડા દિવસોમાં નવી ફાઈનલ આન્સર કી જાહેર કરી તે મુજબનું નવું રિઝલ્ટ જાહેર કરવામાં આવ્યુ હતુ. બે વખત નવી આન્સર કી અને બે વખત નવા રિઝલ્ટ જાહેર કર્યા હોવાનો પણ ગંભીર આક્ષેપ તેમણે કર્યો છે.

ઉલ્લેખનીય છે કે, ગુજરાતમાં નવસારી, વેરાવળ અને હિંમતનગરમાં ત્રણ ફિશરીઝ કોલેજ છે. દેશમાં સૌથી લાંબો દરિયા કિનારો ધરાવતું ગુજરાત રાજ્ય છે. મત્સ્ય ઉત્પાદન તેમજ મત્સ્ય નિકાસ ક્ષેત્રે સમગ્ર દેશમાં ગુજરાત નામના ધરાવે છે. તેમ છતાં રાજ્યમાં માત્ર 8 થી 10  ફિશરીઝ ઓફિસર(વર્ગ-3) છે. વર્ષ 2017 થી ફિશરીઝ ઓફિસર(વર્ગ-3) ની ભરતી કરવામાં આવી નથી. વિદ્યાર્થીઓએ વારંવાર રજૂઆત કરી હોવા છતાં ભરતી કરવામાં આવતી નથી.