સફાઈ અભિયાન: સાબરમતી નદી પહેલીવાર સંપૂર્ણ ખાલી કરાશે.

અમદાવાદમાંથી પસાર થતી સાબરમતી નદીને આગામી સમયમાં સંપૂર્ણપણે ખાલી કરવામાં આવશે. વાસણા બેરેજના દરવાજાના સમારકામ અને ઉપરવાસમાં માટીનો રેમ્પ બનાવવાના કાર્યને કારણે આ નિર્ણય લેવામાં આવ્યો છે. રાજ્યના સિંચાઈ વિભાગ દ્વારા આ કામગીરી 12 મેથી શરૂ કરીને 5 જૂન સુધી ચલાવવામાં આવશે.

 

સાબરમતી રિવરફ્રન્ટ ડેવલપમેન્ટ કોર્પોરેશન લિમિટેડે આ અંગે એક નિવેદન બહાર પાડ્યું છે. જેમાં જણાવવામાં આવ્યું છે કે વાસણા બેરેજની સુરક્ષાને ધ્યાનમાં રાખીને ચોમાસા પહેલાં દરવાજાનું રિપેરિંગ જરૂરી છે. આ ઉપરાંત, વાસણા બેરેજના ઉપરના ભાગમાં માટીનો રેમ્પ બનાવવાનો હોવાથી નદીને પૂરી રીતે ખાલી કરવાની જરૂર પડશે. આ કામગીરીનો પ્રારંભ 10 મેથી થઈ ચૂક્યો છે.

આ સમયગાળા દરમિયાન અમદાવાદ મ્યુનિસિપલ કોર્પોરેશન અને સાબરમતી રિવરફ્રન્ટ ડેવલપમેન્ટ કોર્પોરેશન સંયુક્ત રીતે નદીના પટને સાફ કરવાનું અભિયાન હાથ ધરશે. આ સફાઈ કાર્યમાં લોકોની ભાગીદારીને પણ પ્રોત્સાહિત કરવામાં આવશે. આ કામગીરીને લીધે સુભાષ બ્રિજથી લઈને વાસણા બેરેજ સુધીનો નદીનો વિસ્તાર લગભગ સૂકો થઈ જશે. ઉલ્લેખનીય છે કે સુભાષ બ્રિજ નજીક સાબરમતી નદી પર બુલેટ ટ્રેનનું કામ પણ ચાલી રહ્યું છે.

એક દુઃખદ વાત એ છે કે દેશની 13 સૌથી વધુ પ્રદૂષિત નદીઓમાં સાબરમતીનો પણ સમાવેશ થાય છે. નિષ્ણાતોના મતે, બાયો કેમિકલ ઓક્સિજન ડિમાન્ડના સ્તરમાં સાબરમતી બીજા ક્રમે છે, જે તેની અત્યંત જોખમી સ્થિતિ દર્શાવે છે અને તેનું પાણી પીવાલાયક રહ્યું નથી. જળ પ્રદૂષણને કારણે મોટી સંખ્યામાં લોકો બીમાર પડી રહ્યા છે. વર્ષ 2019માં જ્યારે સાબરમતી નદીની સફાઈ કરવામાં આવી હતી, ત્યારે પાંચ દિવસમાં લગભગ 500 ટન કચરો બહાર કાઢવામાં આવ્યો હતો. જો કે, મોટો પ્રશ્ન એ છે કે શું સાબરમતી નદી માત્ર અમદાવાદ શહેરના ચાર પુલો વચ્ચે જ મહત્વની છે? રિવરફ્રન્ટ પર દેખાતી નદીને સાફ કરવાથી શું નદી ખરેખર સાફ થઈ જાય છે? રાજસ્થાનના અરવલ્લી પર્વતમાળામાંથી નીકળીને ખંભાતના અખાતમાં મળતી આ નદી 371 કિલોમીટરનો લાંબો પ્રવાસ કરે છે. અમદાવાદમાં નદી પ્રવેશે તે પહેલાં તેના પર છ જેટલા નાના-મોટા ડેમ આવેલા છે. સાબરમતી નદી સફાઈ અભિયાન દરમિયાન એક પણ નેતા કે સરકારી અધિકારી નદીમાં ઠલવાતા પ્રદૂષિત રાસાયણિક કચરાને રોકવા માટે કડક પગલાં લેવા અંગે એક શબ્દ પણ બોલતા નથી, તે પણ એક વાસ્તવિકતા છે.