નર્મદામાં RTE દાખલા કૌભાંડ: ભાજપનો કાર્યકર મુખ્ય સૂત્રધાર, SITની રચના

નર્મદા જિલ્લામાં રાઈટ ટુ એજ્યુકેશન(RTE)નો હેઠળ પોતાના બાળકોને એડમિશન અપાવવા બનાવટી આવકના દાખલા કાઢી આપવાનું કૌભાંડ ઝડપાયુ છે. આ કૌભાંડનો મુખ્ય સૂત્રધાર ભાજપનો કાર્યકર દર્પણ પટેલ નીકળ્યો છે. તલાટી અને સરપંચના સિક્કા બનાવી ફિમેલ હેલ્થ વર્કરનો આવકનો દાખલો કાઢી આપ્યો હોવાનો ઘટસ્ફોટ થતાં સમગ્ર કૌભાંડ બહાર આવ્યુ છે. જિલ્લા શિક્ષણાધિકારીએ 29 અરજી રદ કરીને અન્ય દાખલા અંગે તપાસ હાથ ધરી છે. જિલ્લા પોલીસ વડાએ મામલાની ગંભીરતાને લઈ પાંચ શખ્સો સામે ગુનો નોંધી સ્પેશિયલ ઈન્વેસ્ટિગેશન ટીમની રચના કરી છે. ઉલ્લેખનીય છે કે, ભચરવાડા ગામનો ભાજપનો કાર્યકર દર્પણ પટેલ સરપંચ અને તલાટીના ખોટા સિક્કા બનાવીને કૌભાંડ આચરતો હતો. રેશનિંગની દુકાનના સંચાલક દર્પણ પટેલે ફિમેલ હેલ્થ વર્કરને વાર્ષિક 18 હજારની આવકનો દાખલો પણ કાઢી આપ્યો હતો.

નર્મદા જિલ્લાના નાંદોદ તાલુકાના ભદામ ગામમાં તલાટી-સરપંચના ખોટા સિક્કા બનાવી આવકના દાખલા બનાવવાનું કૌભાંડ બહાર આવ્યું છે. સરકારી અનાજની દુકાન ધરાવતાં મુખ્ય સૂત્રધાર દર્પણ પટેલે અનેક લોકોને ખોટા આવકના દાખલા કાઢી આપ્યાનું સામે આવ્યુ છે. ખોટા દાખલાનો ઉપયોગ કરીને ઘણાં વાલીઓએ RTE હેઠળ મફત શિક્ષણ મેળવવા અરજીઓ કરી હોવાનું ધ્યાને આવ્યુ છે.

700 જેટલાં ડોક્યુમેન્ટસની યાદી મળી

ખોટા આવકના દાખલા કૌભાંડની તપાસ માટે નર્મદા જિલ્લા પોલીસવડા પ્રશાંત શુંબેએ SITની રચના કરી છે. ASP લોકેશ યાદવ ટીમના અધ્યક્ષ છે. રાજપીપળા ટાઉન PI વી.કે. ગઢવી તથા એસ.ઓ.જી PI યોગેશ સિરસાઠ ટીમના સભ્ય છે. આ કેસમાં હજુ સુધી એકપણ આરોપી પકડાયો નથી. ASP લોકેશ યાદવે જણાવ્યું કે, RTEમાં પ્રવેશ મેળવવા અરજદારોએ બોગસ આવકના દાખલાની વિગતો અમને મળી છે. એસપી સાહેબે SIT ની રચના કરી તપાસ કરવા શરૂ કરવા સૂચના આપી છે. શંકાસ્પદ આવકના દાખલાની તપાસ સ્પેશિયલ ઈન્વેસ્ટિગેશન ટીમ દ્વારા હાથ ધરવામાં આવી છે. સરકારી કચેરીના ઓરિજિનલ આવકના દાખલા અને અરજદારના આવક દાખલાની ખરાઈ કરવામાં આવી રહી છે. અમારી પાસે 700 જેટલા ડોક્યુમેન્ટની યાદી મળી છે. તેના પર તપાસ શરૂ કરી 100થી વધુ લોકોને આવકના દાખલા સાથે  રાજપીપળા પોલીસ સ્ટેશન ખાતે તપાસ માટે નિવેદન માટે બોલાવ્યા હતા. હાલમાં પાંચ શખ્સો સામે ગુનો નોંધ્યો છે. તપાસમાં વધુ વિગતો સામે આવશે. કોર્ટમાંથી પરમિશન મેળવીને આરોપીની શોધખોળ હાથ ધરવામાં આવી છે.

તલાટીએ દાખલા નહી આપ્યાનું જણાવતાં કૌભાંડનો ખુલાસો થયો

ગાંધીનગર કક્ષાએથી તાત્કાલિક ધોરણે આવકના દાખલાની ખરાઈ કરવામાં આવી હતી. તે સમયે તલાટીઓએ દાખલાઓથી અજાણ હોવાનું જણાવતાં સમગ્ર મામલો બહાર આવ્યો હતો. તાલુકા વિકાસ અધિકારીની તપાસ અને કેટલાક તલાટીઓની ફરિયાદના આધારે રાજપીપળા પોલીસે મુખ્ય આરોપી દર્પણ પટેલ સહિત પાંચ શખ્સો સામે ગુનો નોંધ્યો છે. આવકના બોગસ દાખલાઓ પર ક્યુઆર કોડ હતા. બોગસ આવકના દાખલાને ગુગલ લેન્સ એપમાં સ્કેન કરી ડિજિટલ ગુજરાત વેરિફિકેશન પોર્ટલની લિન્ક પર ખોલીને તપાસ કરી હતી. આ તપાસમાં  સુંદરપુરા ગ્રામ પંચાયતની સિસ્ટમમાંથી બોગસ આવકના દાખલા જનરેટ થયાનું જણાઈ આવ્યું હતું.

મુખ્ય સૂત્રધાર દર્પણ પટેલનું ભાજપના નેતાઓ સાથે કનેક્શન

આ કૌભાંડનો મુખ્ય સૂત્રધાર દર્પણ પટેલનો પરિવાર રાજકીય વગ ધરાવે છે. દર્પણ પટેલના કાકા દિનેશ શિવલાલ પટેલ રાજપીપળા APMCના ચેરમેન છે. જ્યારે નર્મદા જિલ્લા ભાજપના પૂર્વ પ્રમુખ ઘનશ્યામ પટેલ સાથે પણ દર્પણ પટેલ નજીકના સંબંધ ધરાવે છે. આ ઉપરાંત દર્પણ પટેલ ભાજપના અનેક મોટા નેતાઓ સાથે સારા સંબંધ ધરાવે છે. દર્પણ પટેલના નામે ભચરવાડા ખાતે સસ્તા અનાજની દુકાનનો પરવાનો હોવાનું જાણવા મળતાં નર્મદા જિલ્લા પુરવઠા અધિકારીએ પરવાનો રદ કર્યો છે.

ફિમેલ હેલ્થવર્કરના આવકના દાખલાથી ભાંડો ફૂટ્યો

આ કૌભાંડમાં ભચરવાડા આયુર્વેદિક આરોગ્ય મંદિર સબ સેન્ટરમાં ફિમેલ હેલ્થવર્કર તરીકે ફરજ બજાવા દક્ષાબેન બારીયા સામેલ છે. તેમનો માસિક પગાર રૂપિયા 20 હજાર છે. તેમણે RTEનો લાભ લેવા માત્ર 18 હજાર રૂપિયાની વાર્ષિક આવકનો દાખલો બનાવડાવ્યો છે. ફિમેલ હેલ્થ વર્કરની વાર્ષિક આવક અંદાજે 4 લાખ છે. તેમના પરિવારમાં એક બાળક છે. તેમના પતિ ખેત મજૂરી કરે છે. નર્મદા જિલ્લા આરોગ્ય વિભાગ દ્વારા તેમની સામે સામે તપાસ કરીને કાર્યવાહી કરવામાં આવે તેવી શક્યતા છે.

18 થી 20 હજારની આવકના અનેક દાખલા બન્યા

આ કૌભાંડમાં આવકના દાખલા મેળવનારા કેટલાક સીમાંત ખેડૂતો પણ છે. તેમની વાર્ષિક આવક સારી હોવા છતાં પણ રૂપિયા 18 થી 20 હજારની વાર્ષિક આવક દર્શાવતા દાખલા બનાવડાવ્યા છે. SITએ આવા લોકો સામે પણ તપાસ શરૂ કરી છે.

ભાજપના સાંસદે જિલ્લા સંકલનની બેઠકમાં મુદ્દો ઉઠાવ્યો

RTEનો લાભ લેવા બનાવટી આવકના દાખલાઓ કાઢી આપવાના કૌભાંડ બાબતે નાંદોદ તાલુકાના ભદામ, ગામકુવા, ભચરવાડા, બોરીદ્રા ગૃપ ગ્રામ પંચાયતના તલાટીઓએ રાજપીપળા પોલીસમથકમાં ફરિયાદ નોંધાવી છે. આ કૌભાંડમાં અનેક સરકારી કર્મચારીઓની સંડોવણીની આશંકા વ્યક્ત કરવામાં આવી રહી છે. ભાજપના સાંસદ મનસુખ વસાવાએ પણ બનાવટી આવકના દાખલા કૌભાંડનો મુદ્દો નર્મદા જિલ્લા સંકલનની બેઠકમાં ઉઠાવ્યો હતો.

29 દાખલા ખોટા જણાતાં પ્રવેશ રદ કરાયો

જિલ્લા પ્રાથમિક શિક્ષણ અધિકારી નિશાંત દવેએ જણાવ્યું કે, RTEના ભરાયેલા ફોર્મમાં ખોટા આવકના દાખલા મૂક્યા હોવાનું જાણમાં આવ્યું હતું. તેથી તાત્કાલિક ધોરણે અમારા RTE પોર્ટલ પર 50 હજારથી ઓછી આવક ધરાવતા તમામ અરજદારોના ફોર્મ ચેક કર્યા હતા. તેમાં શંકાસ્પદ આવકના દાખલા અંગે  તાલુકા વિકાસ અધિકારી અને તલાટી કમ મંત્રી પાસેથી માહિતી મંગાવી ખરાઈ કરી હતી. તેમના અહેવાલના આધારે 29 અરજદારના આવકના દાખલા ખોટા જણાયા હતા. તેથી તાત્કાલિક ધોરણે 29 વિદ્યાર્થીનો RTE હેઠળ પ્રવેશ રદ કર્યો છે.

પાંચ આરોપીઓની તપાસ હાથ ધરવામાં આવી

DYSP પી.આર.પટેલે જણાવ્યું કે, નાંદોદ તાલુકાનાં ભદામ ગ્રામ પંચાયતના તલાટી કમ મંત્રી ક્રિષ્ણાબેન શાહે ખોટા આવકના દાખલા અંગે પાંચ વ્યક્તિ વિરુદ્ધ ફરિયાદ નોંધાવી છે. મુખ્ય આરોપી દર્પણ ઉર્ફે દિલિપભાઈ ચન્દ્રકાંત પટેલ(રહે.ભચરવાડા તા.નાંદોદ), રાહુલ કનૈયાલાલ પ્રજાપતિ(રહે. ભદામ, તા.નાંદોદ), અનિલ મનુભાઈ રોહિત(રહે. ગામકુવા તા. નાંદોદ), દક્ષા નરેન્દ્રભાઈ બારીયા(રહે. ભચરવાડા તા.નાંદોદ) અને કલ્પના અનિલભાઈ વસાવા(રહે, વણઝાર) વિરુદ્ધ ગુનો દાખલ કરવામાં આવ્યો છે.