ભરણ પોષણના વિવાદ વચ્ચે યુવકે જીવન ટુંકાવ્યું

રાજકોટ જિલ્લાના ગોંડલ ખાતે નાગડકા રોડ પર આવેલી તિરૂમાલા રેસિડેન્સીમાં રહેતા ડેનિશભાઈ કાલરીયા નામના યુવાને ઝેરી દવા પીને જીવન ટૂંકાવી લેતાં સમગ્ર વિસ્તારમાં ભારે ચકચાર મચી ગઈ છે. પરિવારજનોએ યુવકે સાસરિયા પક્ષના ત્રાસ અને નાણાકીય માંગણીઓથી કંટાળીને આ કરૂણ પગલું ભર્યું હોવાના ગંભીર આરોપો લગાવ્યા છે. યુવકના આ કરૂણ અંત પાછળનો મુખ્ય વિવાદ તેની પત્ની સાથે ચાલી રહેલો છૂટાછેડા અને ભરણ પોષણનો કેસ છે, જે છેલ્લા 6 વર્ષથી ગોંડલ કોર્ટમાં ચાલી રહ્યો છે. મૃતકની પત્ની છેલ્લા કેટલાક સમયથી રિસાયેલી છે અને આ લાંબા સમયથી ચાલતા વિવાદે યુવકને આત્મહત્યા કરવા મજબૂર કર્યો હોવાનું પ્રાથમિક તપાસમાં બહાર આવ્યું છે.

ડેનિશભાઈનું હોસ્પિટલ પહોંચે તે પહેલાં જ મૃત્યુ 

પ્રાથમિક માહિતી મુજબ, ડેનિશભાઈ અનિડા અને નાગડકા ગામ વચ્ચેના સીમ વિસ્તારમાં ઝેરી દવા પીધી હતી. આ દુઃખદ પગલું ભરતા પહેલા, તેમણે પોતાના કૌટુંબિક ભાઈને મોબાઈલ પર પોતાનું લોકેશન મોકલીને જાણ કરી હતી. આ લોકેશનના આધારે પરિવારજનો તેમને શોધવા માટે સાંજે 6 વાગ્યાથી દોડધામ કરી રહ્યા હતા. આશરે 2 કલાકની સઘન શોધખોળ બાદ, અનિડાના સીમ વિસ્તારમાં રહેતા મજૂરો તેમને બાઈક પર બેસાડીને અનિડા ગામ સુધી લઈ આવ્યા હતા. ત્યાંથી તેમને તાત્કાલિક સારવાર માટે ગોંડલની એક ખાનગી હોસ્પિટલમાં ખસેડવામાં આવ્યા હતા. જોકે, દુર્ભાગ્યવશ, ડેનિશભાઈનો જીવ ગયો હતો અને હોસ્પિટલ પહોંચે તે પહેલાં જ તેમનું મૃત્યુ નીપજ્યું હતું.

50 લાખની જંગી રકમની માંગણી

ઘટનાની જાણ થતાં જ રાજકોટ જિલ્લાની ગોંડલ તાલુકા પોલીસ તાત્કાલિક ગોંડલ સિવિલ હોસ્પિટલ ખાતે પહોંચી હતી અને મૃતદેહનો કબજો મેળવીને કાયદેસરની કાર્યવાહી હાથ ધરી હતી. પોલીસને સ્થળ પરથી એક સુસાઈડ નોટ મળી આવી છે, જે 1 ડિસેમ્બરના રોજ લખાઈ હોવાનું જાણવા મળી રહ્યું છે. આ સુસાઈડ નોટમાં મૃતક ડેનિશભાઈએ સ્પષ્ટ ઉલ્લેખ કર્યો છે કે, સાસરિયા પક્ષના લોકો એ તેમની પાસે રૂ.50 લાખની જંગી રકમની માંગણી કરી હતી, જેના સતત ત્રાસથી કંટાળીને તેઓ જીવન ટૂંકાવી રહ્યા છે. પોલીસ સૂત્રો પાસેથી મળેલી માહિતી મુજબ, આ સુસાઈડ નોટમાં સાસરિયા પક્ષના અન્ય 5 લોકોના નામ પણ લખેલા છે. ગોંડલ પોલીસ એ સુસાઈડ નોટ અને મૃતકના પરિવારજનોના નિવેદનોને આધારે સાસરિયા પક્ષના લોકો વિરુદ્ધ કાયદેસરની કાર્યવાહી શરૂ કરી છે અને સમગ્ર મામલે વધુ ઊંડાણપૂર્વક તપાસ હાથ ધરી છે.