Rajkot કોર્પોરેટર પર લાંચનો આક્ષેપ, ગેરકાયદેસર બાંધકામના ડિમોલિશન બાદ વિવાદ

રાજકોટ મહાનગરપાલિકાના વોર્ડ નં-16ના કોર્પોરેટર નરેન્દ્ર ડવ ફરી એકવાર વિવાદના વંટોળમાં ફસાયા છે. ભાજપના પૂર્વ સક્રિય કાર્યકર કમલેશ ગોસાઈએ તેમના પર ગંભીર આક્ષેપ કર્યો છે કે, બે વર્ષ પહેલાં પુનિત સોસાયટી મેઇન રોડ પર આવેલા ગેરકાયદેસર કારખાનાને ડિમોલિશનથી બચાવવા માટે નરેન્દ્ર ડવે 4 લાખ રૂપિયાની લાંચ લીધી હતી. જોકે, આ આક્ષેપોને કોર્પોરેટરે તદન ખોટા ગણાવીને ફગાવી દીધા છે.   ગેરકાયદેસર બાંધકામ અને નોટિસનો મામલો
  કમલેશ ગોસાઈએ જણાવ્યું કે, તેમનું પુનિત સોસાયટી મેઇન રોડ પર આવેલું કારખાનું પ્લાન પાસ કરાવ્યા વિના બે માળનું બાંધવામાં આવ્યું હતું. આ બાંધકામ વર્ષ 2023માં થયું હતું. ગત 31 મે, 2023ના રોજ ટાઉન પ્લાનિંગ ઓફિસર મનસુખ સાગઠીયા દ્વારા આ ગેરકાયદેસર બાંધકામ તોડી પાડવા માટે નોટિસ આપવામાં આવી હતી. બાદમાં 9 એપ્રિલ, 2025ના રોજ વધુ એક નોટિસ જારી થયા બાદ ગઈકાલે રાજકોટ મહાનગરપાલિકાએ આ બાંધકામને તોડી પાડ્યું હતું.   કોર્પોરેટર પર લાંચનો આક્ષેપ
  કમલેશ ગોસાઈએ આક્ષેપ કર્યો કે, તેમણે બાંધકામ બચાવવા માટે કોર્પોરેટર નરેન્દ્ર ડવ સાથે વહીવટ કર્યો હતો અને 4 લાખ રૂપિયા આપ્યા હતા. ગોસાઈના જણાવ્યા મુજબ, નરેન્દ્ર ડવે તેમને કહ્યું હતું કે, “ઉપર સાહેબને દેવાના છે, કવરમાં આપજો.” ગોસાઈએ વધુમાં આરોપ લગાવ્યો કે, નરેન્દ્ર ડવ બાંધકામની આસપાસ રેતીનો ઢગલો કે અન્ય વસ્તુઓ પડી હોય તો પણ 5,000 રૂપિયા લઈ જાય છે. ગોસાઈએ એમ પણ જણાવ્યું કે, તેઓ ભાજપના સક્રિય કાર્યકર હોવા છતાં બીજી વખત વહીવટ ન થયો, જેના કારણે તેમનું કારખાનું તોડી પાડવામાં આવ્યું.   કોર્પોરેટરનો ખુલાસો
  આ મામલે નરેન્દ્ર ડવે પોતાનું નિવેદન આપતાં જણાવ્યું કે, આક્ષેપ કરનાર કમલેશ ગોસાઈ સાથે તેમની કોઈ લેવાદેવા નથી. તેમણે કહ્યું કે, જ્યારે ગોસાઈને 260(1)ની નોટિસ મળી ત્યારે તેઓ મદદ માટે આવ્યા હતા અને નોટિસનો જવાબ લખવામાં મદદ માગી હતી. ડવે ગોસાઈને સલાહ આપી હતી કે, તેઓ પ્લાન કમ્પ્લિશન લઈ લે, પરંતુ ગોસાઈએ જણાવ્યું હતું કે, આ બાંધકામ દસ્તાવેજ વગરનું અને ખેતરના ખરાબામાં છે. ડવે જણાવ્યું કે, આવા કેસમાં તેઓ કંઈ કરી શકે તેમ નથી. 4 લાખ રૂપિયાના આક્ષેપને તેમણે સદંતર ખોટા ગણાવ્યા અને કહ્યું કે, આ તેમને બદનામ કરવાની કોશિશ છે. તેઓ લોકોની સેવા માટે કામ કરે છે અને આવા આક્ષેપો તેમની પ્રતિષ્ઠાને નુકસાન પહોંચાડવા માટે કરવામાં આવે છે.   આ ઘટનાએ રાજકોટના રાજકીય અને વહીવટી વર્તુળોમાં ચર્ચાનો વિષય બની ગયો છે. એક તરફ ગેરકાયદેસર બાંધકામો સામે મહાનગરપાલિકાની કાર્યવાહી ચાલી રહી છે, તો બીજી તરફ આવા આક્ષેપો વહીવટી પારદર્શિતા અને નેતાઓની નિષ્ઠા પર સવાલો ઉભા કરે છે. આ મામલે તપાસ થશે કે કેમ તે હજુ સ્પષ્ટ થવાનું બાકી છે, પરંતુ આ ઘટના રાજકોટના નાગરિકોમાં ચર્ચાનો વિષય બની રહેશે.