રાજ્યમાં 3 કલાક આ વિસ્તારમાં વરસાદની આગાહી

રાજ્યમાં હવામાનમાં પલટો આવ્યો છે. ગઇ રાતથી અમદાવાદ સહિત રાજ્યના વિવિધ વિસ્તારોમાં હળવો વરસાદ પડ્યો છે. બીજી તરફ આજે આગામી 3 કલાક માટે રાજ્યના બનાસકાંઠા, સાબરકાંઠા અને અરવલ્લિ જિલ્લામાં માવઠું પડશે તેવી આગાહી હવામાન વિભાગ દ્વારા કરવામાં આવી છે. બીજી તરફ મહીસાગર, દાહોદ, પંચમહાલ, આણંદ, વડોદરા, ભરૂચ, સુરત, નવસારી, વલસાડ, દમણ અને દાદરા નગર હવેલીમાં પણ માવઠું પડશે. છોટાઉદેપુર, નર્મદા, તાપી અને ડાગમાં વરસાદની આગાહી છે. પવનની ગતિ પણ 40થી 50 કિમી પ્રતિ કલાકની રહેશે.

રાજ્યમાં વેસ્ટર્ન ડિસ્ટર્બન્સ અને પૂર્વીય પવનોના કારણે ગુજરાતમાં વરસાદી વાતાવરણ જોવા મળી રહ્યું છે. સાબરકાંઠા જિલ્લામાં ગત મોડી રાત્રે હળવાથી મધ્યમ વરસાદ નોંધાયો છે. કેટલાક વિસ્તારોમાં તો બરફના કરા પણ પડ્યા છે. અમદાવાદ શહેરમાં પણ મોડી રાત્રે હળવાથી મધ્યમ વરસાદ નોંધાયો હતો. લોકો સવારે ઉઠ્યા ત્યારે રસ્તાઓ ભીના જોવા મળ્યા હતા. 

બીજી તરફ કોલ્ડ વેવના કારણે ઠંડીનો ચમકારો અનુભવાઇ રહ્યો છે. રાજ્યના મોટા ભાગના વિસ્તારોમાં ધુમ્મસભર્યું વાતાવરણ જોવા મળી રહ્યું છે. ધુમ્મસ હોવાના કારણે વિઝિબીલીટી પર પણ અસર જોવા મળી રહી છે. ઝીરો વિઝીબિલીટીના કારણે વાહન ચાલકોને તકલીફનો સામનો કરવો પડી રહ્યો છે. 

આજે આગામી ત્રણ કલાક માટે જાહેર કરાયેલા નાવકાસ્ટમાં અમદાવાદ, ગાંધીનગર સહિતના જિલ્લાઓમાં હળવા વરસાદની આગાહી કરવામાં આવી છે. આ ઉપરાંત દાહોદ, પંચમહાલ, અરવલ્લિ અને સાબરકાંઠા જિલ્લામાં પણ હળવા વરસાદની આગાહી કરાઇ છે.