રાજકોટ જિલ્લાના ધોરાજી પંથકમાં આજે એક ભયાનક માર્ગ અકસ્માતની ઘટના બની છે. ધાંગધ્રાથી ધોરાજી તરફ આવી રહેલી એક ખાનગી ટ્રાવેલ્સની બસના ડ્રાઈવરે અચાનક સ્ટેયરિંગ પરથી કાબૂ ગુમાવતા બસ માર્ગ પર પલટી મારી ગઈ હતી. આ અકસ્માતમાં બસમાં સવાર કુલ 25 મુસાફરો પૈકી 22 થી વધુ લોકોને નાની-મોટી ઈજાઓ પહોંચી છે, જેમાંથી કેટલાકની હાલત અત્યંત ગંભીર હોવાનું જાણવા મળી રહ્યું છે.
એક્સલ તૂટતા સર્જાઈ દુર્ઘટના :&nbsp;
ટ્રાવેલ્સના માલિક અને પ્રત્યક્ષદર્શીઓના જણાવ્યા અનુસાર, બસ જ્યારે ગતિમાં હતી ત્યારે અચાનક તેની એક્સલ તૂટી ગઈ હતી. એક્સલ ભાંગતાની સાથે જ ડ્રાઈવરનો બસ પરથી કાબૂ છૂટી ગયો હતો. બસ પલટી મારતા પહેલા રસ્તા પર જઈ રહેલા બે મોટરસાઈકલ સવારોને પણ અડફેટે લીધા હતા અને ત્યારબાદ ઝાડ સાથે અથડાઈને ત્રણ પલટી ખાઈ ગઈ હતી. આ સમગ્ર ઘટના નજીકમાં લાગેલા સીસીટીવી કેમેરામાં કેદ થઈ છે, જેમાં અકસ્માતની વિકરાળતા સ્પષ્ટ જોઈ શકાય છે.
ઈજાગ્રસ્તોને તાત્કાલિક સારવાર :&nbsp;
અકસ્માત બાદ ઘટનાસ્થળે ભારે દોડધામ મચી ગઈ હતી. સ્થાનિક લોકોએ માનવતા દાખવી તુરંત બચાવ કામગીરી શરૂ કરી હતી. તમામ ઈજાગ્રસ્તોને ધોરાજીની સિવિલ હોસ્પિટલ ખસેડવામાં આવ્યા હતા. હોસ્પિટલના સ્ટાફ અને ડોક્ટરોએ યુદ્ધના ધોરણે સારવાર શરૂ કરી હતી. જોકે, 6 મુસાફરોની સ્થિતિ વધુ નાજુક જણાતા તેમને પ્રાથમિક સારવાર આપી વધુ સારવાર અર્થે જૂનાગઢની હોસ્પિટલમાં રિફર કરવામાં આવ્યા છે.
અસ્થિ વિસર્જન કરીને પરત ફરતો હતો પરિવાર :&nbsp;
આ અકસ્માતનો ભોગ બનનાર મુસાફરો ધોરાજીના દેવીપૂજક સમાજના શ્રમિકો હતા. આ પરિવાર પોતાના સ્વજનના ફૂલ (અસ્થિ) પધરાવવા માટે રાધનપુર પાસેના કુંવર ગામે ગયા હતા. ત્યાંથી પરત ફરતી વખતે ઘર આંગણે પહોંચતા પહેલા જ આ કરુણ દુર્ઘટના ઘટી હતી. ઈજાગ્રસ્તોમાં મહિલાઓ, પુરુષો અને વૃદ્ધોનો સમાવેશ થાય છે.
રાજકીય અને સામાજિક અગ્રણીઓ દોડી આવ્યા :&nbsp;
ઘટનાની જાણ થતા જ ધોરાજી-ઉપલેટાના પૂર્વ ધારાસભ્ય લલિત વસોયા સિવિલ હોસ્પિટલ પહોંચ્યા હતા. તેમણે દર્દીઓના ખબર-અંતર પૂછ્યા હતા અને સામાજિક સંસ્થાઓની મદદથી જરૂરી વ્યવસ્થા કરાવી હતી. આ ઉપરાંત, પોલીસના ઉચ્ચ અધિકારીઓ પણ ઘટનાસ્થળે પહોંચીને કાયદેસરની કાર્યવાહી હાથ ધરી છે.
મુખ્યમંત્રી રાહત ફંડમાંથી મદદની માંગ :&nbsp;
ઈજાગ્રસ્તો અતિ ગરીબ પરિવારના હોવાથી અને પ્લાસ્ટિક કચરો વીણીને ગુજરાન ચલાવતા હોવાથી, લલિત વસોયાએ મુખ્યમંત્રી ભૂપેન્દ્ર પટેલને પત્ર લખ્યો છે. તેમણે માંગ કરી છે કે આ શ્રમિકો જ્યાં સુધી સાજા ન થાય અને કામ પર ન ચડી શકે ત્યાં સુધી તેમને મુખ્યમંત્રી રાહત ફંડમાંથી આર્થિક સહાય અને મફત સારવાર પૂરી પાડવામાં આવે.&nbsp;

ધોરાજી બસ અકસ્માત સમાચાર

ધાંગધ્રાથી પરત ફરતી બસની એક્સલ તૂટતા અકસ્માત સર્જાયો, ગંભીર ઈજાગ્રસ્તોને જૂનાગઢ રિફર કરાયા

March 28, 2026 | 14:00 IST