વડોદરામાં વીજ વાયરોમાં પતંગ-દોરા ભરાવાથી ઠેર-ઠેર વીજળી ગુલ

ઉત્તરાયણ પર્વની ઉજવણી વચ્ચે પતંગ અને દોરા ફસાવાના કારણે વીજ લાઈનો ટ્રિપ થવાથી શહેરમાં ઠેર-ઠેર વીજ પુરવઠો ખોરવાઈ જવાની ફરિયાદો ઉભી થઈ હતી.

મળતી માહિતી પ્રમાણે ઉત્તરાયણ અને વાસી ઉત્તરાયણ એમ બે દિવસ દરમિયાન વીજ કંપનીની સબ ડિવિઝન ઓફિસો અને સેન્ટ્રલ હેલ્પલાઈનને બે દિવસમાં વીજ પુરવઠો બંધ થવાની 1400 જેટલી ફરિયાદો અલગ અલગ વિસ્તારોમાથી મળી હતી.

સૂત્રોનું કહેવું છે કે, સામાન્ય દિવસોમાં રોજની સરેરાશ 300 જેટલી વીજ પુરવઠો બંધ થવાની ફરિયાદો મધ્ય ગુજરાત વીજ કંપનીને શહેરમાથી મળતી હોય છે. જ્યારે ઉત્તરાયણ અને વાસી ઉત્તરાયણ એમ બે દિવસ દરમિયાન વડોદરામાંથી 1400  જેટલી એટલે કે રોજ કરતા બમણી ફરિયાદો વીજ કંપની પાસે આવી હતી. જેમાંથી મોટાભાગના કેસમાં દોરા અને પતંગો વીજ વાયરોમાં ભરાઈ જવાના કારણે લાઈનો ટ્રિપ થવાથી વીજ સપ્લાય બંધ થયો હતો.

જોકે ઉત્તરાયણને અનુલક્ષીને વીજ કંપનીએ પણ પહેલેથી જ તકેદારી રાખીને વિવિધ વિસ્તારોના સબ ડિવિઝનમાં 46 ટીમો ઉપરાંત 15 ક્વિક રિસ્પોન્સ ટીમો તૈનાત રાખી હોવાથી મોટાભાગની ફરિયાદોનો ઝડપથી નિકાલ આવી ગયો હતો.

વીજ કંપનીના સૂત્રોના જણાવ્યા પ્રમાણે વડોદરામાં અન્ડર ગ્રાઉન્ડ વીજ કેબલનું નેટવર્ક વધ્યું હોવાથી દોરા અને પતંગોના કારણે વીજ પુરવઠો બંધ થવાની ફરિયાદોમાં અગાઉના વર્ષો કરતા ખાસ્સો ઘટાડો થયો છે.