સુરતના ભૂતિયા ડિમોલિશનમાં રાજકીય કનેક્શન?

રહસ્યમય કાર્યવાહીથી ઉઠ્યા અનેક સવાલો

સુરતના વેડ રોડ નજીક આવેલા નાસીરનગર વિસ્તારમાં મે મહિનાના અંતમાં થયેલી ડિમોલિશનની કાર્યવાહી હજુ પણ ચર્ચાનું કેન્દ્ર બની છે. ભારે પોલીસ બંદોબસ્ત વચ્ચે સૈંકડો લોકોના આશિયાના જમીનદોસ્ત થયા, પરંતુ આખરે આ કાર્યવાહી કોણે અને કયા આધારે કરાવી તેનો સ્પષ્ટ જવાબ હજુ સુધી મળ્યો નથી. આ સમગ્ર ઘટનાએ અનેક રાજકીય અને વહીવટી પ્રશ્નો ઊભા કર્યા છે.

રાજકીય સમીકરણો પાછળ હોવાની ચર્ચા

સ્થાનિક રાજકીય વર્તુળોમાં એવી ચર્ચાઓ ચાલી રહી છે કે આ સમગ્ર પ્રકરણ માત્ર જમીન ખાલી કરાવવા પૂરતું નથી. પરંતુ તેની પાછળ રાજકીય હિસાબ-કિતાબ અને આંતરિક સત્તા સંઘર્ષ પણ જવાબદાર હોઈ શકે છે. કેટલાક નિરીક્ષકો આ ઘટનાને રાજકીય દબાણ અને પ્રભાવ સાથે પણ જોડી રહ્યા છે.

નાણાકીય વ્યવહારો અંગે અટકળો

શહેરમાં એવી ચર્ચાઓ પણ જોર પકડી રહી છે કે આ સમગ્ર મામલામાં કરોડો રૂપિયાના વ્યવહારો સંકળાયેલા હોઈ શકે છે. જો કે આ અંગે કોઈ સત્તાવાર પુષ્ટિ થઈ નથી, પરંતુ વિવિધ પ્રકારની અટકળો સમગ્ર પ્રકરણને વધુ ચર્ચાસ્પદ બનાવી રહી છે.

નિયમિત પ્રક્રિયાને લઈને ઊભા થયા પ્રશ્નો

સામાન્ય રીતે મહાનગરપાલિકા દ્વારા ડિમોલિશન પહેલાં નોટિસ, જાહેરનામું અને અન્ય કાયદાકીય પ્રક્રિયા હાથ ધરવામાં આવે છે. પરંતુ નાસીરનગર કેસમાં આવી પ્રક્રિયાઓનું પાલન કરવામાં આવ્યું હતું કે નહીં તે હવે તપાસનો વિષય બની ગયો છે.

સ્થાનિક પોલીસને બદલે SOG કેમ?

સામાન્ય રીતે દબાણ દૂર કરવાની કાર્યવાહી દરમિયાન સ્થાનિક પોલીસ બંદોબસ્તમાં રહેતી હોય છે, પરંતુ આ કેસમાં સ્પેશિયલ ઓપરેશન ગ્રુપ (SOG)ની હાજરીને લઈને પણ સવાલો ઉભા થયા છે. આખરે આ પ્રકારની વ્યવસ્થા કોના આદેશથી ગોઠવવામાં આવી હતી તે અંગે સ્પષ્ટતા થઈ નથી. ડિમોલિશનમાં SOGના DCP નકુમ હાજર હતા. જે ફરી એકવાર SOGની શંકાસ્પદ ભૂમિકા તરફ સવાલ ઉભા કરી જાય છે.

અધિકારીઓની હાજરી છતાં અજાણ હોવાનો દાવો

ઘટનાસ્થળે કેટલાક ઉચ્ચ અધિકારીઓ હાજર હોવાના વીડિયો સામે આવ્યા હોવા છતાં કેટલાક અધિકારીઓએ સમગ્ર મામલાથી અજાણ હોવાનો દાવો કર્યો છે. આ વિરોધાભાસને કારણે લોકોમાં શંકા વધુ ઘેરી બની રહી છે.

મુખ્ય અધિકારીની અચાનક રજા ચર્ચામાં

ડિમોલિશન પ્રકરણ સાથે જોડાયેલા એક મહત્વપૂર્ણ અધિકારી અચાનક લાંબી રજા પર ઉતરી જતાં નવા પ્રશ્નો ઉભા થયા છે. સોશિયલ મીડિયામાં વાયરલ થયેલા વીડિયો બાદ નિર્ણયને લઈને અનેક પ્રકારની ચર્ચાઓ ચાલી રહી છે. ડિમોલિશન પ્રકરણમાં કેન્દ્ર સ્થાને રહેલા સેન્ટ્રલ ઝોનનાં કાર્યપાલક એન્જિનિયર 8 જૂન સવારથી અચાનક એક સપ્તાહ માટે રજા પર ઉતરી ગયા છે.

ડિમોલિશન પ્રક્રિયા દરમિયાન ઘટનાસ્થળે હાજર રહેલા જયાંગ જીવન રામજીવાલાએ વિવાદ વકરતાં પોતાને બચાવવાનાં ભરપૂર પ્રયાસ કર્યા હતા. સોશિયલ મીડિયામાં ડિમોલિશન કામગીરી દરમિયાન તેમનો વીડિયો વાયરલ થતાં તેઓની હાલત કફોડી બની છે. સેન્ટ્રલ ઝોન અને મહાનગર પાલિકાનો બચાવ કરવા છતાં બિલ્ડરનાં કથિત લાભ માટે આખો કારસો રચાયો હોવાની આશંકાએ જોર પકડ્યું છે. રામજીવાલા હવે રજા ઉપર ઉતરી જવાથી અનેક શંકાઓ અને સવાલો ઊભા થયા છે.

ગેરકાયદે બાંધકામ સામે અલગ વલણ કેમ?

એક તરફ નાસીરનગરના રહેવાસીઓના મકાનો તોડી પાડવામાં આવ્યા. જ્યારે નજીકમાં ચાલી રહેલા મોટા બાંધકામ સામે માત્ર નોટિસ આપીને કાર્યવાહી મર્યાદિત રાખવામાં આવી હતી. આ વિરોધાભાસને કારણે તંત્રની કામગીરી પર સવાલો ઊભા થયા છે.

બિલ્ડર લોબી અને જમીનના હિતોની ચર્ચા

નાસીરનગરની આસપાસ કરોડો રૂપિયાના પ્રોજેક્ટ્સ વિકસિત થઈ રહ્યા છે. આ સંજોગોમાં સ્થાનિક લોકો અને વિવિધ સંગઠનો દ્વારા એવો આક્ષેપ કરવામાં આવી રહ્યો છે કે કેટલાક આર્થિક હિતોને ધ્યાનમાં રાખીને સમગ્ર કાર્યવાહી હાથ ધરવામાં આવી હોઈ શકે છે.

₹30 કરોડના પ્રોજેક્ટ સાથે જોડાઈ રહેલી ચર્ચાઓ

ડિમોલિશન સ્થળની નજીક વિકસિત થઈ રહેલા એક મોટા રહેણાંક પ્રોજેક્ટને લઈને પણ અનેક ચર્ચાઓ ચાલી રહી છે. કેટલાક લોકોના મતે વિસ્તારને વધુ ખુલ્લો અને આકર્ષક બનાવવા માટે આ કાર્યવાહી કરવામાં આવી હોઈ શકે છે. જોકે આ દાવાઓ અંગે કોઈ સત્તાવાર પુષ્ટિ થઈ નથી.

હવે વિધાનસભા વિરોધપક્ષના નેતા પણ જાગ્યા

ગુજરાત વિધાનસભા વિરોધપક્ષના નેતા તુષાર ચૌધરી પણ હવે જાગ્યા છે. તેમણે મુખ્યમંત્રીને પત્ર લખીને સમગ્ર કૌભાંડની તપાસ કરી જવાબદારો સામે કાર્યવાહી કરવા માગણી છે. ડિમોલિશન સ્થળની બાજુમાં આવેલી ખાનગી સ્કીમની બાંધકામ રજા ચિઠ્ઠી અંગે સવાલ ઉઠાવી બિલ્ડરોના ફાયદા માટે ભૂતિયું ડિમોલિશન કરાયું હોવાનો આક્ષેપ કર્યો છે. આ ઉપરાંત બિલ્ડર સાથે એસઓજીની મિલીભગતનો આક્ષેપ કરી ભોગ બનેલા ગરીબોને વૈકલ્પિક વ્યવસ્થા કરી આપવા મુખ્યમંત્રીને રજૂઆત કરી છે.

JCB ભાડે લાવનાર કોન્ટ્રાક્ટર ભૂગર્ભમાં?

આ વિવાદમાં નવો વળાંક ત્યારે આવ્યો જ્યારે ડિમોલિશનની સાઇટ પર હાજર રહેલા ભારે મશીનોના માલિકની પૂછપરછ કરવામાં આવી. તેમણે સમગ્ર પ્રકરણનો સૌથી મોટો ખુલાસો કરતાં જણાવ્યું કે, અમે મશીનો ભાડે આપવાનો પ્રોફેશનલ વ્યવસાય કરીએ છીએ. અમારી પાસે આ મશીનો સુરત મહાનગરપાલિકાના જાણીતા કોન્ટ્રાક્ટર તેજુ રાજપૂતે ભાડે માંગ્યા હતા. કોન્ટ્રાક્ટરે મશીન મંગાવ્યા હોવાથી અમને કોઈ શંકા ગઈ નહોતી. મોસીનના આ નિવેદનથી સ્પષ્ટ થાય છે કે આ કાંડમાં પાલિકા સાથે સંકળાયેલી વ્યક્તિ જ સીધી રીતે સામેલ છે. સમગ્ર કૌભાંડની મુખ્ય કડી  કોન્ટ્રાક્ટર તેજુ રાજપૂત હાલ ભૂગર્ભમાં ઉતરી ગયા છે.

બિલ્ડરનું રાજકીય પીઠબળ?

વિવાદિત જમીનને અડીને આવેલી જમીન પર દોઢ વર્ષથી કોઈપણ મંજૂરી વગર ગેરકાયદે બાંધકામ ધમધમી રહ્યું છે. આ માટે એક પણ મંજૂરી લેવામાં આવી નથી છતાં તેને નોટિસ પણ માત્ર ખોદાણ પૂરવા માટેની આપવામાં આવી છે. વિવાદોની વચ્ચે હવે આ વિવાદિત જમીનનો સિટી સર્વેયર રિપોર્ટ સામે આવ્યો છે. જેણે ચર્ચાની આગમાં ઘી હોમવાનું કામ કર્યું છે.

જમીનનો કેટલોક હિસ્સો સુરત મનપાનો છે. જ્યારે મોટો ભાગ પારસી સમાજનો હોવાનું બહાર આવ્યું છે. આ જમીનની બિલકુલ પાછળ એક મેગા પ્રોજેક્ટ આકાર લઈ રહ્યો છે. જે સૌરાષ્ટ્રના એક જાણીતા બિલ્ડર દ્વારા ડેવલપ કરવામાં આવી રહ્યો છે. અગાઉ આ જમીનમાંથી કેટલોક ભાગ પારસી સમાજની બિલ્ડરોએ તે ખરીદી લીધી હોવાની વિગતો મળી રહી છે. જેમાં કોંગ્રેસના એક પૂર્વ કોર્પોરેટર દ્વારા બુકિંગની કામગીરી સંભાળવામાં આવી રહી હોવાની ચર્ચાએ જોર પકડ્યું છે.

સૌરાષ્ટ્રના બિલ્ડરોના ઈશારે ડિમોલિશન?

સ્થાનિકો ખુલ્લેઆમ આક્ષેપ કરી રહ્યા છે કે, સૌરાષ્ટ્રના બિલ્ડરોના ઈશારે જ સુરત મહાનગરપાલિકા અને એસઓજીએ સાથે મળીને આ આખી રમત રમી છે. સ્થાનિકોનું માનવું છે કે બિલ્ડરોના આર્થિક લાભ માટે લાઈન દોરીનું બહાનુ ધરીને રસ્તાનું ડિમોલિશન કરી નાખવામાં આવ્યું, કારણ કે તંત્ર દ્વારા રહેવાસીઓને ઘર ખાલી કરવા માટે એક પણ કાયદેસરની નોટિસ આપવામાં આવી નહોતી.

10 દિવસ બાદ પણ સવાલો અધ્ધરતાલ

આ સમગ્ર ઘટનાનો સૌથી મોટો પ્રશ્ન એ છે કે આટલી મોટી કાર્યવાહી બાદ પણ જવાબદારી કોની છે તે અંગે હજુ સુધી કોઈ સ્પષ્ટ જવાબ મળ્યો નથી. SMC, પોલીસ અને રાજ્ય સરકારના સ્તરે પણ આ મુદ્દે મૌન જોવા મળી રહ્યું છે.

તપાસ અહેવાલ પર સૌની નજર

નાસીરનગર ડિમોલિશન હવે માત્ર સ્થાનિક મુદ્દો રહ્યો નથી. સમગ્ર રાજ્યમાં આ કેસ ચર્ચાનો વિષય બન્યો છે અને લોકો હવે એ જાણવા આતુર છે કે આખરે આ કાર્યવાહી પાછળનું સત્ય શું છે અને જવાબદારો સામે શું પગલાં લેવામાં આવશે.