PM મોદી G-7 સમિટ માટે કેનેડા નહીં જાય, 6 વર્ષ જૂની પરંપરા ભંગ થવાની શક્યતા

કેનેડાના અલ્બર્ટામાં 15થી 17 જૂન વચ્ચે યોજાનારી G-7 સમિટ માટે ભારતના વડાપ્રધાન નરેન્દ્ર મોદીના ભાગ લેવા અંગે સંભાવનાઓ બહુ ઓછી છે. આ વર્ષે ભારતે ન તો ભાગ લેવા માટે રસ દર્શાવ્યો છે અને ન તો કેનેડાએ ભારતને સત્તાવાર નિમંત્રણ પાઠવ્યું છે. આમ, 6 વર્ષ બાદ પહેલીવાર એવું બની શકે છે કે, મોદી G-7 સમિટમાં હાજર નહીં રહે.

શું છે કારણ?

વિદેશ મંત્રાલયના સૂત્રોના જણાવ્યા મુજબ, ભારત-કેનેડા વચ્ચે ચાલી રહેલા તણાવ અને વડાપ્રધાનની સુરક્ષા સાથે જોડાયેલી ચિંતાઓને કારણે ભારત આ વર્ષે G-7 સમિટમાં ભાગ નહીં લે. “આ મુદ્દો G-7 સુધી મર્યાદિત નથી. ભારત કોઈ પણ દેશમાં હાઈ-પ્રોફાઈલ મુલાકાત ત્યારે જ કરે છે, જ્યારે સંબંધો સારાં હોય,” એવું સૂત્રોએ જણાવ્યું.

2023માં ખાલિસ્તાની આતંકી હરદીપ સિંહ નિજ્જરની હત્યા પછી કેનેડાએ ભારત પર આરોપ લગાવ્યો હતો કે, આમાં ભારતીય એજન્ટ સંડોવાયેલા હતા. ભારતે આ દાવાને નકારી કાઢ્યો હતો, પરંતુ સંબંધો એટલા તણાવપૂર્ણ થયા કે ભારતે પોતાના હાઈ કમિશનરને પરત બોલાવી લીધો અને હજુ સુધી નવી નિયુક્તિ થઈ નથી.

કેનેડામાં ખાલિસ્તાની તત્વો ખાસ કરીને વડાપ્રધાન મોદીની સુરક્ષા માટે જોખમરૂપ ગણાતા હોવાથી ભારત માટે તેમની મુલાકાત સંભવ નહીં રહે. આંતરરાષ્ટ્રીય સ્તરે જેને 'સ્માર્ટ ડિપ્લોમસી' કહે છે તે રીતે ભારત હાલ સંયમિત અભિગમ રાખી રહ્યું છે.

G-7માં ક્યા દેશો હશે?

G-7 દેશોમાં કેનેડા, ફ્રાન્સ, જર્મની, ઇટાલી, જાપાન, યુનાઈટેડ કિંગડમ અને અમેરિકાનો સમાવેશ થાય છે. આ ઉપરાંત ઓસ્ટ્રેલિયા, દક્ષિણ આફ્રિકા, યુક્રેન અને બ્રાઝીલ જેવા દેશોના નેતાઓ પણ આમંત્રિત હોવાની શક્યતા છે.

નવી કેનેડિયન સરકારનો અભિગમ

કેનેડામાં સરકાર બદલાઈ ગઈ છે. નવા વડાપ્રધાન માર્ક કાર્નીએ ભારત સાથે સંબંધ સુધારવાની પ્રતિબદ્ધતા દર્શાવી છે, છતાં હાલ તણાવ યથાવત્ છે અને કોઈ મહત્વપૂર્ણ સુધારો જોવા મળ્યો નથી.