ફરી એક વાર વડોદરાવાસીઓને વિશ્વામિત્રી પ્રોજેક્ટની લોલીપોપ

વર્ષોથી વડોદરામાં પાલિકાનો વિશ્વામિત્રી પ્રોજેક્ટ સમાચારોમાં આવતો રહે છે પણ અઘણડ શાસકોના અણઘડ શાસનથી વિશ્વામિત્રી પ્રોજેક્ટ શરુ થઇ શક્યો નથી. ખાસ કરીને ચોમાસામાં જ્યારે વિશ્વામિત્રીમાં પૂર આવે અને હજારો વડોદરાવાસીઓ પાયમાલ થઇ જાય ત્યારે જ પાલિકાના શાસકો જાગે છે અને વિશ્વામિત્રીના પૂરમાંથી લોકોને છુટકારો અપાવવા માટે વિશ્વામિત્રી પ્રોજેક્ટની લોલીપોપ આપતા રહે છે. હવે ફરી એક વાર વડોદરાવાસીઓને વિશ્વામિત્રી પ્રોજેક્ટની લોલીપોપ આપવામાં આવી રહી છે. 

મળેલી માહિતી મુજબ શહેરની મધ્યમાંથી પસાર થતી વિશ્વામિત્રી નદીમાં અવારનવાર પૂરની પરિસ્થિતિ સર્જાતી રહે છે જેને ધ્યાનમાં રાખી રાજ્ય સરકાર દ્વારા તજજ્ઞોની કમિટીની નિમણૂક કરી સમગ્ર અહેવાલ કમિટીએ મુખ્યમંત્રીને સુપ્રત કર્યો હતો તે બાદ હવે વિશ્વામિત્રી પ્રોજેક્ટનું ખાતમુહૂર્ત આવતા અઠવાડિયે  મુખ્યમંત્રીના હસ્તે કરવાનું નક્કી કરવામાં આવ્યું છે. સાથે-સાથે વડોદરા કોર્પોરેશન દ્વારા થયેલા વિકાસના કામોનું પણ લોકાર્પણનો કાર્યક્રમ યોજાશે તેમ જાણવા મળે છે.

ઉલ્લેખનિય છે કે વડોદરા શહેરની મધ્યમાંથી પસાર થતી વિશ્વામિત્રી નદીમાં ગત વર્ષે ભારે પૂર આવ્યું હતું જેને કારણે લોકોને કરોડો રુપિયાનું નુકસાન થયું હતું .ત્યાર પછી રાજકીય આગેવાનો વિવિધ વિસ્તારની મુલાકાતે પહોંચ્યા હતા ત્યારે લોકોનો રોષનો ભોગ પણ બન્યા હતા. પૂરથી છુટકારો અપાવવા માટે છેક મુખ્યમંત્રી સુધી પણ રજૂઆતો થઇ હતી.  

 તે સમયે લોકોને અને વેપારીઓને સહાય આપવા અને વિશ્વામિત્રી પ્રોજેક્ટ માટે રૂ.1,200 કરોડ ફાળવવાનું નક્કી થયું હતું. રાજ્ય સરકાર દ્વારા વિશ્વામિત્રી પ્રોજેક્ટ તૈયાર કરવા બીએન નવલાવાલાની અધ્યક્ષતામાં તજજ્ઞોની સમિતિની રચના કરવામાં આવી હતી અને તેઓ દ્વારા અભ્યાસ કરી સમગ્ર અહેવાલ મુખ્યમંત્રીને સુપ્રત કરવામાં આવ્યો હતો. વિશ્વામિત્રી પ્રોજેક્ટ અંગે વડોદરા શહેરના વિસ્તારમાં હરણીથી મુજ મહુડા સુધીની કામગીરી વડોદરા કોર્પોરેશન દ્વારા કરવાનું નક્કી થયું હતું જ્યારે પાવાગઢથી પીંગલવાડા સુધીની કામગીરી રાજ્ય સરકારના સિંચાઈ વિભાગ સહિત અન્ય વિભાગો કામગીરી કરશે તેમ નક્કી થયું હતું જેની પાછળ રૂપિયા 3200 કરોડનો ખર્ચનો અંદાજ મૂકવામાં આવ્યો છે. 

વડોદરા શહેરની મધ્યમાંથી પસાર થતી વિશ્વામિત્રી નદીમાં પૂરની પરિસ્થિતિમાં લોકોને રાહત થાય તેને ધ્યાનમાં રાખી સમગ્ર પ્રોજેક્ટ અમલમાં મૂકવામાં આવનાર છે જેનું આગામી દિવસમાં મુખ્યમંત્રી ભુપેન્દ્ર પટેલના હસ્તે ખાતમુહૂર્ત થશે. સાથે સાથે આ જ  દિવસે વિવિધ વિકાસના કાર્યોનું લોકાર્પણ કરવાનું કોર્પોરેશન દ્વારા નક્કી કરવામાં આવી રહ્યું છે.