હવે અમદાવાદથી દીવ પહોચાશે માત્ર એક કલાકમાં

ગુજરાતના લોકો માટે ઉનાળાની રજાઓમાં પ્રવાસનું સૌથી લોકપ્રિય સ્થળ દીવ હંમેશાથી પ્રથમ પસંદગી રહ્યું છે. આવા સમયે અમદાવાદના નાગરિકો માટે ખુશખબર છે. ભારત સરકારની ‘ઉડે દેશ કા આમ નાગરિક (UDAN)’ યોજના હેઠળ 16 મે, શુક્રવારથી અમદાવાદથી દીવ સુધીની સીધી ફ્લાઇટ સેવા શરૂ કરવામાં આવી છે. આ નવી સેવા માત્ર એક કલાકમાં પ્રવાસીઓને અમદાવાદથી દીવ પહોંચાડશે, જેનું ખાસ પ્રમોશનલ ભાડું માત્ર 1499 રૂપિયા રાખવામાં આવ્યું છે.   પ્રાદેશિક કનેક્ટિવિટીને મજબૂત કરશે   આ નવો રૂટ શરૂ થવાથી પ્રાદેશિક ઉડ્ડયન સેવાઓને વધુ મજબૂતી મળશે. આ સાથે દીવ સ્ટાર એરના ડેસ્ટિનેશન લિસ્ટમાં 25મા સ્થાને આવી ગયું છે. ખાસ કરીને દીવમાં વસતા NRI લોકો માટે આ સેવા ખૂબ ઉપયોગી સાબિત થશે, કારણ કે તેઓને પાસપોર્ટના કામ માટે વારંવાર ગોવા જવું પડતું હતું. હવે આ ફ્લાઇટ સેવા તેમના માટે સમય અને ખર્ચ બંનેની બચત કરશે.   ફ્લાઇટનું સમયપત્રક   આ ફ્લાઇટ સેવા માટે સ્ટાર એરના 50-સીટવાળા એમ્બ્રેર ERJ-145 વિમાનનો ઉપયોગ કરવામાં આવશે. ફ્લાઇટનું સમયપત્રક નીચે મુજબ છે:

• અમદાવાદથી દીવ: સવારે 9:50 વાગ્યે ઉપડશે અને 10:50 વાગ્યે દીવ પહોંચશે.
• દીવથી અમદાવાદ: સવારે 11:20 વાગ્યે ઉપડશે અને બપોરે 12:20 વાગ્યે અમદાવાદ લેન્ડ થશે.

UDAN યોજનાનો હેતુ   ‘ઉડે દેશ કા આમ નાગરિક’ યોજના ભારત સરકારની એક મહત્વાકાંક્ષી પહેલ છે, જેનો ઉદ્દેશ દેશના નાના શહેરો અને પ્રવાસન સ્થળોને હવાઈ માર્ગે જોડીને પ્રવાસ અને વ્યવસાયને સરળ બનાવવાનો છે. આ યોજના હેઠળ શરૂ થયેલી અમદાવાદ-દીવ ફ્લાઇટ ન માત્ર પ્રવાસીઓ માટે સગવડ લાવશે, પરંતુ દીવના સ્થાનિક અર્થતંત્રને પણ વેગ આપશે.   અમદાવાદથી દીવની આ નવી ફ્લાઇટ સેવા ઉનાળાની રજાઓને વધુ યાદગાર અને સરળ બનાવશે. પ્રમોશનલ ભાડું અને ઝડપી કનેક્ટિવિટીને કારણે આ સેવા પ્રવાસીઓમાં ખૂબ લોકપ્રિય થવાની અપેક્ષા છે. તો હવે બેગ પેક કરો અને દીવના સુંદર દરિયાકિનારાની મજા માણવા તૈયાર થઈ જાઓ!