Narmada : કરજણ ડેમ પર બેદરકારીનો બેવડો વાર - તંત્ર અને લોકો બંને જવાબદાર?

નર્મદા (Narmada) જિલ્લાના કરજણ ડેમ પર સુરક્ષાનો મુદ્દો ફરી એકવાર ચર્ચામાં આવ્યો છે, અને આ વખતે બેદરકારી માત્ર એક પક્ષની નહીં, પરંતુ તંત્ર અને પ્રજા બંનેની સામે આવી રહી છે. ડેમ પર સ્પષ્ટ ચેતવણીના બોર્ડ લગાવવામાં આવ્યા હોવા છતાં, ખાસ કરીને શનિવાર અને રવિવારની રજાઓમાં લોકો ત્યાં ખુલ્લેઆમ ફરતા જોવા મળે છે. સવાલ એ છે કે શું માત્ર બોર્ડ લગાવી દેવાથી તંત્રની જવાબદારી પૂરી થઈ જાય છે? અને શું લોકોને તંત્રનો કોઈ ખોફ નથી?

વર્ષોથી કરજણ ડેમ પર ચેતવણીના બોર્ડ લાગેલા છે. સમયાંતરે ડેમમાંથી પાણી છોડવામાં આવે છે, જે કોઈપણ સમયે જોખમી બની શકે છે. છતાં, રજાના દિવસોમાં અહીં મેળો ભરાયો હોય તેમ લોકોની અવરજવર જોવા મળે છે. આ દ્રશ્યો જોતા એવું લાગે છે કે, તંત્ર દ્વારા લગાવવામાં આવેલા આ બોર્ડ માત્ર શોભાના ગાંઠિયા બની ગયા છે, અને તેનું ખુલ્લેઆમ ઉલ્લંઘન થઈ રહ્યું છે.

આ સંજોગોમાં એક મોટો પ્રશ્ન ઊભો થાય છે કે, શું રજાના દિવસોમાં અહીં કોઈ ખાસ બંદોબસ્ત ગોઠવવામાં આવતો નથી? આ અંગે ડેમના મુખ્ય ઇજનેર દ્રષ્ટિબેન શાહનું નિવેદન પણ ચોંકાવનારું છે. તેમણે સ્વીકાર્યું કે, તેમની પાસે અલગ સિક્યુરિટી છે, પોલીસ બંદોબસ્ત નથી. તેમના મતે, ક્યારેક સિક્યુરિટી આમ-તેમ હોય તો લોકો ઘૂસી જાય છે. પરંતુ, શું આટલી મોટી અને સંવેદનશીલ જગ્યાએ "ક્યારેક આમ-તેમ" હોવાની છૂટછાટ ચાલી શકે?

ચોમાસું માથે છે, અને આવા સમયે ડેમ કે તેની આસપાસ ફરવું એ સીધું જોખમ વહોરવા બરાબર છે. દ્રષ્ટિબેન શાહે આ બાબતની ગંભીરતા સ્વીકારી છે અને જણાવ્યું છે કે તેઓ તેમના સિક્યુરિટી સ્ટાફ તથા જિલ્લા પોલીસ અધિક્ષક સાથે વાત કરીને ત્યાં કડક બંદોબસ્ત ગોઠવવા તજવીજ હાથ ધરશે. પરંતુ, સવાલ એ છે કે આવી ઘટના બને અને જવાબદારો જાગે, ત્યાં સુધી શું કોઈ દુર્ઘટનાની રાહ જોવામાં આવશે? તંત્રની બેદરકારી અને લોકોની અતિશય બેફિકરાઈ, આ બંનેનું મિલન કરજણ ડેમ પર મોટા ખતરા નોતરી રહ્યું છે. શું આ ચેતવણી હજુ પણ પૂરતી નથી કે તંત્ર અને લોકો બંને પોતાની જવાબદારી સમજે?