બાપુનગર ભીડભંજન રોડ પર 14 દુકાનોમાં ભીષણ આગ

અમદાવાદના બાપુનગર વિસ્તારમાં આજે, શુક્રવાર (17મી ઓક્ટોબર, 2025) વહેલી સવારે આગની દુર્ઘટના સર્જાઈ છે. ભીડભંજન હનુમાન મંદિર રોડ પર આવેલી દુકાનોની એક હારમાળામાં ભીષણ આગ ફાટી નીકળી હતી. એક દુકાનમાંથી શરૂ થયેલી આગે જોતજોતામાં વિકરાળ સ્વરૂપ ધારણ કર્યું અને આસપાસની કુલ 14 જેટલી દુકાનોને પોતાની ઝપેટમાં લીધી હતી. દિવાળીના તહેવારની ખરીદીની મોસમ પૂરબહારમાં ખીલી હોય તેવા સમયે જ કપડાં અને અન્ય ચીજવસ્તુઓના વેપારીઓને આ આગના કારણે લાખો રૂપિયાનું મોટું નુકસાન થયું છે, જેના કારણે વેપારી આલમમાં શોકનું મોજું ફરી વળ્યું છે.

એક કલાકની જહેમત બાદ આગ કાબૂમાં

ફાયર વિભાગના કન્ટ્રોલ રૂમને વહેલી સવારે 5 વાગ્યે આ ઘટનાની જાણ કરવામાં આવી હતી. મેસેજ મળતાની સાથે જ ફાયર વિભાગની 8 ગાડીઓ તાત્કાલિક બાપુનગર ચાર રસ્તા તરફના ભીડભંજન રોડ પર રવાના કરવામાં આવી હતી. ફાયરની ટીમ સ્થળ પર પહોંચી ત્યાં સુધીમાં આગ 5થી 7 દુકાનોમાં પ્રસરી ચૂકી હતી. મોટાભાગની દુકાનોમાં કપડાં, ચપ્પલ અને અન્ય જ્વલનશીલ સામગ્રી હોવાથી આગ ઝડપથી આગળ વધી. જોકે, ફાયર બ્રિગેડના જવાનોએ એક કલાકથી વધુ સમયની ભારે જહેમત બાદ પાણીનો મારો ચલાવી આગ પર સંપૂર્ણ કાબૂ મેળવ્યો હતો. પ્રાથમિક અહેવાલ મુજબ, આગમાં કુલ 12 દુકાનો સંપૂર્ણપણે બળીને ખાખ થઈ ગઈ છે, જ્યારે અન્ય બે દુકાનોને આંશિક નુકસાન થયું છે.

મોટા આર્થિક ફટકા સાથે રાહત: સદનસીબે જાનહાનિ ટળી

આ દુર્ઘટનામાં મોટા આર્થિક નુકસાનનો અંદાજ છે, કારણ કે દિવાળીના તહેવારને ધ્યાનમાં રાખીને વેપારીઓએ તેમની દુકાનોમાં નવો અને મોટો માલસામાન ભર્યો હતો. તમામ માલ આગમાં ભસ્મીભૂત થઈ ગયો છે. જોકે, આ ઘટનામાં એકમાત્ર રાહતની વાત એ છે કે વહેલી સવારે આગ લાગવાના કારણે કોઈ જાનહાનિ થઈ નથી.

આગ લાગવાનું ચોક્કસ કારણ હજી સુધી જાણી શકાયું નથી. જોકે, ફાયર વિભાગની પ્રાથમિક તપાસમાં આગ શોર્ટ સર્કિટના કારણે લાગી હોવાનું માનવામાં આવી રહ્યું છે. હાલમાં પોલીસ અને ફાયર વિભાગ દ્વારા આગ લાગવાના મૂળ કારણ અને થયેલા નુકસાનના ચોક્કસ આંકલન માટે વધુ તપાસ હાથ ધરવામાં આવી છે. વેપારીઓએ દિવાળીના ટાણે જ સર્જાયેલી આ ઘટનાથી માથે હાથ દઈ દીધો છે.