AMC પ્રાથમિક સુવિધા આપવામાં નિષ્ફળ

અમદાવાદ મ્યુનિસિપલ કોર્પોરેશનનું તંત્ર રોડ, પાણી, ગટર અને લાઈટ જેવી પ્રાથમિક સુવિધાઓ પૂરી પાડવામાં ભેદભાવ રાખતું હોવાના આક્ષેપ લોકો દ્વારા કરવામાં આવ્યા છે. શહેરના પૂર્વ વિસ્તારમાં આવેલા બાપુનગરમાં છેલ્લા 15 દિવસથી ગટરના પાણી રોડ ઉપર આવી જતા સ્થાનિકો હેરાન છે. અનેક રજૂઆતો બાદ પણ સમસ્યાનું સમાધાન ન આવતા હવે સ્થાનિકો આમરણાંત ઉપવાસ પર બેસી ગયા છે. મ્યુનિસિપલ કોર્પોરેશન તંત્ર લોકોની પ્રાથમિક સુવિધાઓનું નિરાકરણ લાવવામાં નિષ્ફળ ગઈ હોય તેમ શહેરમાં અનેક વિસ્તારમાં રાત્રે સ્ટ્રીટ લાઈટ બંધ હોવાથી અંધારપટ જેવો માહોલ સર્જાય છે. શહેરમાં 3000 જેટલી સ્ટ્રીટ લાઈટો બંધ હોવાને લઈને કોંગ્રેસના ધારાસભ્ય ઇમરાન ખેડાવાલાએ આક્ષેપ કર્યો છે.

અધિકારીઓ ધ્યાન ન આપતા લોકો કંટાળ્યાં

શહેરના પૂર્વ વિસ્તારમાં આવેલા ઉત્તર ઝોનમાં જુલાઈ 2024થી સપ્ટેમ્બર 2024 સુધી એમ ત્રણ મહિનામાં માત્ર 64 લાખના કામ થયા હતા. જ્યાં અધિકારીઓ પૂરતી કામગીરી કરતા નથી એવા ઉત્તર ઝોનમાં આવતા બાપુનગર અનિલ સ્ટર્ચ વિસ્તારમાં છેલ્લા 15 દિવસથી ગટરના પાણી રોડ પર ઉભરાતા હોવાને લઈને લોકો પરેશાન થયા છે. ઉત્તર ઝોનના અધિકારીઓને ધ્યાન દોરવા છતાં પણ નિરાકરણ ન આવતા છેવટે સ્થાનિકો આમરણાંત ઉપવાસ પર બેસી ગયા છે.

3000 જેટલી સ્ટ્રીટ લાઈટો બંધ હોવાની ફરિયાદ

 શહેરમાં સ્ટ્રીટલાઈટ માટે મેન્ટેનન્સનો કોન્ટ્રાક્ટ સિટેલુમ કંપનીને આપવામાં આવ્યો હતો, જેનો કોન્ટ્રાક્ટ પૂર્ણ થઈ ગયો છે. હવે કોન્ટ્રાક્ટર કંપની આગળ કામ કરવાની ના પાડી છે. ત્યારે મ્યુનિસિપલ કોર્પોરેશનના લાઈટ વિભાગના અધિકારીની યોગ્ય કામગીરી ન હોવાના કારણે આજે શહેરીજનોને સ્ટ્રીટ લાઈટ બંધ હોવા અંગેની અનેક ફરિયાદો કરવી પડી રહી છે. લાઇટ દ્વારા સ્થાનિકોની ફરિયાદોનુ નિરાકરણ કરવામાં આવતું નથી. 3000 જેટલી સ્ટ્રીટ લાઈટો બંધ હોવા અંગેની ફરિયાદો મળી છે.