સુરતમાં લિંબાયતમાં એક કલાકમાં સાડા ચાર ઈંચ વરસાદ

સુરતમાં છેલ્લા 3 દિવસથી મેઘમહેર યથાવત છે. આજે શહેરના લિંબાયત વિસ્તારમાં 1 કલાકમાં જ સાડા ચાર ઈંચ જેટલો ધોધમાર વરસાદ ખાબક્યો, જેના કારણે જળબંબાકારની સ્થિતિ સર્જાઈ હતી. રાજુનગર પોલીસ ચોકી સામે આવેલા આશાનગરમાં લોકોના ઘરોમાં પાણી ઘૂસી ગયા હતા, જ્યારે અનેક વિસ્તારોમાં ઘૂંટણસમા પાણી ભરાયા હતા. ત્યાં જ અનેક લોકોને ભારે હાલાકીનો સામનો કરવો પડ્યો.

રસ્તાઓ પર પાણી ફરી વળતાં વિઝિબિલિટીમાં ઘટાડો

સુરત વરસાદના કારણે ઉધના ત્રણ રસ્તા જેવા મુખ્ય માર્ગો પર પણ પાણી ભરાયા હતા, જેનાથી વાહનવ્યવહાર ખોરવાયો હતા. પીપલોદ, અઠવા, ગડુમસ રોડ, વરાછા અને સિટીલાઈટ જેવા વિસ્તારોમાં પણ ભારે વરસાદ નોંધાયો હતો, જેના કારણે રસ્તાઓ પર પાણી ફરી વળતાં વિઝિબિલિટીમાં ઘટાડો થયો હતો. અચાનક આવેલી આફતને કારણે અનેક વાહનો બંધ પડી ગયા અને વાહનચાલકોને રસ્તાની બાજુમાં ઊભા રહેવાની ફરજ પડી હતી.

રાજ્યમાં હળવાથી મધ્યમ વરસાદ

હવામાન વિભાગે આજે સુરત સહિત સમગ્ર દક્ષિણ ગુજરાતમાં ભારે વરસાદની આગાહી કરી હતી. હાલમાં, અપર એર સાયક્લોનિક સર્ક્યુલેશન સક્રિય હોવાથી આગામી 7 દિવસ (19થી 25 સપ્ટેમ્બર) રાજ્યમાં હળવાથી મધ્યમ વરસાદની સંભાવના છે, જેમાં ઉત્તર ગુજરાત અને કચ્છને બાદ કરતા અન્ય વિસ્તારોમાં વરસાદ ચાલુ રહી શકે છે.

આ પણ વાંચો: નવરાત્રિ પર વરસાદનું સંકટ: દક્ષિણ ગુજરાતમાં વરસાદ

રાજ્યમાં 24% વધુ વરસાદ

હવામાન વિભાગના ડાયરેક્ટર ડૉ. એ. કે. દાસના જણાવ્યા મુજબ, આગામી 4 દિવસમાં ગાજવીજ સાથે 30થી 40 કિલોમીટરની ઝડપે પવન ફૂંકાશે. નોંધનીય છે કે, રાજ્યમાં અત્યારસુધીમાં સામાન્ય કરતાં 24% વધુ વરસાદ નોંધાયો છે, જ્યારે ડીસા અને કચ્છના કેટલાક ભાગોમાંથી ચોમાસાએ વિદાય લીધી છે.

આગામી દિવસોમાં હવામાનમાં મોટો પલટો

હવામાન આગાહીકાર અંબાલાલ પટેલના જણાવ્યા મુજબ, આગામી દિવસોમાં હવામાનમાં મોટો પલટો આવવાની શક્યતા છે. નવરાત્રિ દરમિયાન પણ વરસાદનો માહોલ રહેશે અને 22 સપ્ટેમ્બર સુધી વરસાદ ચાલુ રહી શકે છે. તેમની સૌથી મોટી આગાહી 29 સપ્ટેમ્બરથી 3 ઓક્ટોબરના સમયગાળા માટે છે, જ્યારે અરબી સમુદ્ર અને બંગાળની ખાડીમાં સિસ્ટમ સક્રિય થવાથી દક્ષિણ સૌરાષ્ટ્ર, સુરત અને દરિયાકાંઠાના વિસ્તારોમાં ભારે વરસાદ થઈ શકે છે.