અમરેલીના ખાંભા નજીક દીપડાએ 10 વર્ષના બાળકને ફાડી ખાધો

અમરેલીના ખાંભા નજીકના ગામમાં ચોંકાવનારો બનાવ બન્યો છે. ખાંભા ગામ પાસે આવેલા પચપચીયા ગામમાં દીપડાએ 10 વર્ષના સગીરને ફાડી ખાધો છે. આ બાળકના માત્ર હાથ અને પગ સહિતના અવશેષો જ મળી આવ્યા છે.

અમરેલીના પચપચીયા ગામમાં દીપડાએ મચાવેલા હાહાકારથી લોકો ફફડી ઉઠ્યા છે. મળેલી માહિતી મુજબ પચપચીયા ગામના ખેતરમાં ખુલ્લામાં સુતેલા 10 વર્ષના બાળક મયુર સોરઠીયાને દીપડો ઉઠાવી ગયો હતો અને તેને 500 મીટર સુધી ઢસડીને તેને ફાડી ખાધો હતો

આ ઘટના અંગે તત્કાળ વન વિભાગને જાણ કરાતા વન વિભાગની ટીમ સ્થળ પર પહોંચી હતી અને તપાસ શરુ કરી હતી. તપાસમાં બાળકના માત્ર  હાથ-પગ સહિતના અવશેષો હાથ લાગ્યા હતા. બાળકના મૃતદેહને ખાંભાની સરકારી હોસ્પિટલ ખાતે પીએમ માટે મોકલવામાં આવ્યો છે. દીપડાના આતંકના કારણે સ્થાનિક લોકોમાં ભારે ભય જોવા મળ્યો છે તો બીજી તરફ બાળકના પરિવાર પર આભ તુટી પડ્યું હતું.

આદમખોર દીપડાને પકડવા માટે વન વિભાગની ટીમો કામે લાગી છે અને દીપડાનું લોકેશન શોધી તેને પાંજરે પુરવાની કામગિરી શરુ કરાઇ છે.