ડભોઇ ચાંદોદ રેલ્વે ફાટક પર ટ્રેનની અડફેટે દીપડીનું મોત

વડોદરા ગ્રામ્યમાં ડભોઇ ચાંદોદ રેલ્વે ફાટક પર ટ્રેનની અડફેટે એક દીપડીનું મોત થયું છે. ઘટનાની જાણ થતાં વન વિભાગના અધિકારીઓ સ્થળ પર પહોંચ્યા હતા. પીએમની કાર્યવાહી બાદ વન વિભાગ દ્વારા અંતિમ સંસ્કાર કરવામાં આવ્યો હતો

ડભોઇ ચાંદોદ રેલ્વે ફાટક પર ટ્રેનની અડફેટે  3 વર્ષીય દીપડીનું મોત  થયું છે.  ઓરસંગ ગામડી અને ભાલોદ્રા ગામડી વચ્ચે રેલ્વે બ્રિજ પાસે આ ઘટના બની છે. દીપડીનું મોત થતા વન વિભાગ દ્વારા દીપડાના મૃતદેહ ને પી.એમ અર્થે ખસેડાયો છે અને પી.એમ કાર્યવાહી બાદ વન વિભાગ દ્વારા અંતિમ સંસ્કાર કરવામાં આવ્યો હતો.

ઉલ્લેખનિય છે કે આ પહેલાં પણ પાદરા પાસે રેલવે ટ્રેક પાસેથી ઇજાગ્રસ્ત દીપડો મળ્યો હતો જેને સારવાર માટે ખસેડાયા બાદ સારવાર દરમિયાન તેનુ મોત થયું હતું. માનવામાં આવે છે કે ખોરાકની શોધમાં આ દીપડી ત્યાં ફરી રહી હતી ત્યારે ટ્રેનની અડફેટે આવી ગઇ હોઇ શકે છે.

 ડભોઇના આર.એફ.ઓ. કલ્યાણી ચૌધરીએ જણાવ્યું હતું કે, આજે સવારે અમને ઘટનાની જાણ થતાં અમારી ટીમ સ્થળ ઉપર પહોંચી ગઇ હતી અને મૃતદેહને ડભોઇ પશુ હોસ્પિટલ ખાતે લઇ આવ્યા હતા. મૃતક દીપડી હતી અને તેની ઉંમર સાડા ત્રણ વર્ષની હતી. હોસ્પિટલ ખાતે લાવ્યા બાદ પોસ્ટમોર્ટમ કરવામાં આવ્યું હતું.જે બાદ અગ્નિસંસ્કાર કરવામાં આવ્યા હતા.