બાઈક ધોવા ગયા ને જીવ ગુમાવ્યો, Kutch માં તળાવે લીધા બે યુવાનોના પ્રાણ, પરિવારમાં શોક!

કચ્છ (Kutch)ના ગાંધીધામ નજીક આવેલા અંતરજાળ ગામ પાસે એક તળાવમાં ડૂબી જવાથી બે યુવાનોના કમકમાટીભર્યા મોત નિપજ્યા છે. આ ઘટનાથી સમગ્ર વિસ્તારમાં શોક અને અરેરાટી વ્યાપી ગઈ છે. મૃતક યુવાનોના નામ સંજયભાઈ મોદી અને ઈશ્વરભાઈ મોદી હોવાનું જાણવા મળ્યું છે.

બાઈક ધોવા ગયા અને મોતને ભેટ્યા...

પ્રાથમિક માહિતી અનુસાર, આ બંને યુવાનો પોતાના ઘરેથી બાઈક ધોવા જવાનું કહીને નીકળ્યા હતા. જોકે, મોડી સાંજ સુધી તેઓ પરત ન ફરતાં પરિવારજનો ચિંતિત બન્યા હતા અને તેમની શોધખોળ શરૂ કરી હતી. શોધખોળ દરમિયાન, પરિવારજનોને તળાવ નજીકથી બાઈક અને ચંપલ મળી આવ્યા હતા. આ જોઈને અનિષ્ટની આશંકા થતાં તાત્કાલિક પોલીસને જાણ કરવામાં આવી હતી.

મૃતદેહ પોસ્ટમોર્ટમ માટે ખસેડાયા, પોલીસ તપાસ શરૂ...

પોલીસ અને સ્થાનિક તરવૈયાઓની મદદથી તળાવમાં શોધખોળ હાથ ધરવામાં આવતા, બંને યુવાનોના મૃતદેહ મળી આવ્યા હતા. મૃતદેહોને તાત્કાલિક પોસ્ટમોર્ટમ માટે મોકલી આપવામાં આવ્યા છે અને પોલીસે આ અંગે વધુ તપાસ હાથ ધરી છે. આ ઘટનાએ ફરી એકવાર પાણી ભરેલા સ્થળોએ સાવચેતી રાખવાની જરૂરિયાત પર ભાર મૂક્યો છે. બે યુવાનોના અકાળે અવસાનથી તેમના પરિવારો પર આભ તૂટી પડ્યું છે.