રાજ્યમાં જીવલેણ બની પતંગની દોરી, ઉતરાયણે ગુમાવ્યા 6 લોકોએ જીવ

જેની આશંકા હતી તેવા જ સમાચાર ઉત્તરાયણ અને વાસી ઉતરાયણે મળી રહ્યા છે. ઉતરાયણના દિવસે રાજ્યમાં પતંગની કાતિલ દોરીથી 6 વ્યક્તિના મોત થયા છે અને અસંખ્ય લોકો ઘાયલ થયા છે. 

રાજ્યમાં ઉતરાયણનો તહેવાર ઉમંગ અને ઉલ્લાસથી ઉજવવામાં આવી રહ્યો છે પણ પતંગનો દોરો જીવલેણ બની રહ્યો છે જેના કારણે રાજ્યમાં ઘણા લોકોના ગળા કપાવાના બનાવો બન્યા છે. મળી રહેલી માહિતી મુજબ વડોદરામાં છાણી કેનાલ વિસ્તારમાં માધુરી પટેલ નામની 35 વર્ષની મહિલા મોપેડ પર જઇ રહી હતી ત્યારે ગળામાં દોરી આવી જતાં મહિલાને ગંભીર ઇજા થઇ હતી જેથી તેને તત્કાળ સારવાર માટે હોસ્પિટલમાં ખસેડાઇ હતી. જો કે તેનું સારવાર દરમિયાન મોત થયું હતું. વાસી ઉતરાયણની સવાર સુધી વડોદરાની સયાજી હોસ્પિટલમાં ગળુ કપાવાના 6 બનાવો નોંધાયા હતા જેમને સારવાર અપાઇ રહી છે. 

બીજી તરફ રાજકોટમાં પતંગની દોરીના કારણે એક બાઈકચાલકનું મોત નિપજ્યું હતું. જ્યારે સુરેન્દ્રનગરના પાટડીના ઓડુ ગામના ઈશ્વરભાઈ ઠાકોરનું પણ પતંગની દોરીના કારણે મોત નિપજ્યું હતું.આ ઉપરાંત  હાલોલના રાહતલાવ ગામના 5 વર્ષીય કુણાલનું પણ પતંગની દોરીથી ગળું કપાવાને કારણે મૃત્યુ થયું છે. પરેશભાઈ તેમના પુત્ર કુણાલને ટુ વ્હીલર પર બેસાડીને પનોરમા ચોકડી પાસે ફુગ્ગા ખરીદવા જઈ રહ્યા હતા. આ દરમિયાન અચાનક તેમની આગળ પતંગની દોરી આવી ગઈ, જે આગળ બેઠેલા કુણાલના ગળામાં ભરાઈ ગઈ હતી. દોરી ઘસાવાથી બાળકનું ગળું ગંભીર રીતે કપાઈ ગયું હતું. ઈજાગ્રસ્ત કુણાલને તાત્કાલિક હાલોલની સબ ડિસ્ટ્રિક્ટ હોસ્પિટલમાં સારવાર માટે લઈ જવામાં આવ્યો હતો. ડૉક્ટરોએ તાત્કાલિક સારવાર શરૂ કરી હતી, પરંતુ ટૂંક સમયમાં જ બાળકનું મોત નીપજ્યું હતું. 

આ ઉપરાંત અન્ય એક ચોંકાવનારા બનાવમાં મહેસાણા જિલ્લાના કડીના કસ્બા વિસ્તારમાં આવેલ વીજતાર પર પડેલી પતંગની દોરીને દૂર કરવા જતાં મહિલાને કરંટ લાગ્યો હતો. આ દરમિયાન મહિલાને બચાવવા ગયેલા ભાઇને કરંટ લાગતા કરુણ મોત નીપજ્યું છે.

ઉપરાંત મળી રહેલા સમાચાર મુજબ વડનગર તાલુકાના વડબાર ગામના 35 વર્ષીય માનસાજી રગુંજી ઠાકોરનું ઘાતક દોરી વાગવાથી કરુણ મોત થયું છે. 

બીજી તરફ ઉતરાયણના દિવસે રાજ્યમાં 108ને ઇમરજન્સીના 4256 જેટલા કોલ્સ મળ્યા હતા જેમને તત્કાળ સારવાર અપાઇ હતી. બીજી તરફ કાતિલ દોરીના કારણે અબોલ પશુ પક્ષીઓની હાલત પણ ખરાબ થઇ ગઇ હતી અને કરુણા એમ્બ્યુલન્સને ઉતરાયણના કારણે 1400થી વધુ કોલ્સ મળ્યા હતા.