કર્ણાટક: 40 મુસાફરો ભરેલી બસ પુલ પરથી લટકી

કર્ણાટક રાજ્યના શિવમોગા જિલ્લામાં સોમવારે એક અત્યંત ભયાનક બસ અકસ્માતની ઘટના સામે આવી છે. 40 થી વધુ મુસાફરોને લઈને જઈ રહેલી એક ખાનગી બસે ચાલકે સ્ટીયરિંગ પરનો કાબૂ ગુમાવતા બસ પુલની રેલિંગ તોડીને નીચે ખાબકી હતી. અકસ્માત એટલો વિચિત્ર અને જોખમી હતો કે બસનો અડધો ભાગ પુલ પરથી નીચે હવામાં લટકી ગયો હતો, જેના કારણે મુસાફરોમાં ચીસાચીસ અને અફરાતફરી મચી ગઈ હતી.

વીરપુરા ગામ પાસે સર્જાઈ દુર્ઘટના : 

પ્રાપ્ત વિગતો અનુસાર, આ ખાનગી બસ દાવણગેરે જિલ્લાના ચન્નાગિરીથી ભદ્રાવતી તરફ જઈ રહી હતી. જ્યારે બસ શિવમોગા જિલ્લાના ભદ્રાવતી તાલુકાના વીરપુરા ગામ પાસે આવેલા કાગેહલ્લા પુલ પરથી પસાર થઈ રહી હતી, ત્યારે અચાનક ડ્રાઈવરે વાહન પરનો કાબૂ ગુમાવ્યો હતો. બસ પુરપાટ ઝડપે પુલની રેલિંગ સાથે અથડાઈ હતી અને સુરક્ષા દીવાલ તોડીને પુલની બહાર નીકળી ગઈ હતી.

ચમત્કારિક બચાવ: 10 થી વધુ મુસાફરો ઘાયલ

બસ જે રીતે પુલ પર લટકી પડી હતી તે જોતા મોટી જાનહાનિ થવાની ભીતિ સેવાઈ રહી હતી. જોકે, સદનસીબે આ અકસ્માતમાં કોઈ પણ મુસાફરનું મોત નીપજ્યું નથી, જે એક મોટો ચમત્કાર મનાઈ રહ્યો છે. બસમાં સવાર કુલ 40 મુસાફરોમાંથી 10 થી વધુ મુસાફરોને ગંભીર ઈજાઓ પહોંચી છે. ઈજાગ્રસ્તોને તાત્કાલિક સ્થાનિક લોકોની મદદથી બસમાંથી બહાર કાઢીને નજીકની હોસ્પિટલમાં સારવાર અર્થે ખસેડવામાં આવ્યા છે.

પોલીસ કાર્યવાહી અને તપાસ : 

આ ઘટનાની જાણ થતા જ ભદ્રાવતી ગ્રામીણ પોલીસ સ્ટેશનનો કાફલો ઘટનાસ્થળે દોડી આવ્યો હતો. પોલીસે અકસ્માતનો ગુનો નોંધીને વધુ તપાસ હાથ ધરી છે. પ્રાથમિક તપાસમાં અકસ્માતનું કારણ ડ્રાઈવરની બેદરકારી અથવા ટેકનિકલ ખામી હોવાનું અનુમાન લગાવવામાં આવી રહ્યું છે. પોલીસે ક્રેઈનની મદદથી પુલ પર લટકી ગયેલી બસને બહાર કાઢવાની કામગીરી શરૂ કરી છે.

અકસ્માતને પગલે માર્ગ પર લાંબા સમય સુધી ટ્રાફિક જામની સ્થિતિ સર્જાઈ હતી. મુસાફરોના જણાવ્યા મુજબ, અકસ્માત સમયે બસમાં ગભરાટનું વાતાવરણ હતું, પરંતુ સ્થાનિક ગ્રામજનોએ સમયસૂચકતા વાપરી બચાવ કાર્યમાં મદદ કરી હતી.