ગિરનારમાં સિંહનો જીવલેણ હુમલો!

Junagadh Lion Attack : ગિરનાર પર્વત પરથી એક હૃદયદ્રાવક અને ચિંતાજનક ઘટના સામે આવી છે. વહેલી સવારે પરિવાર સાથે ગિરનારની યાત્રા માટે આવેલા 12 વર્ષીય મયુરસિંહ પર સિંહે અચાનક હુમલો કર્યો હોવાની માહિતી સામે આવી છે.પરિવારના જણાવ્યા મુજબ બાળક પોતાના કાકાનો હાથ પકડીને ગિરનારના પગથિયા ચઢી રહ્યો હતો.પરિવાર માંડ 50 જેટલા પગથિયા ચઢ્યો હતો ત્યારે જંગલ તરફથી આવેલા સિંહે અચાનક હુમલો કર્યો અને બાળકને ખેંચીને જંગલ તરફ લઈ ગયો.આ ઘટનાએ સમગ્ર ગુજરાતમાં ચકચાર મચાવી દીધી છે. ગિરનાર જેવી પ્રસિદ્ધ ધાર્મિક અને પર્યટનસ્થળ પર આવી ઘટના બનતા યાત્રાળુઓમાં ભારે ભયનો માહોલ સર્જાયો છે. ઘટના બાદ વન વિભાગ, પોલીસ અને સ્થાનિક બચાવ ટીમોએ તાત્કાલિક સર્ચ ઓપરેશન શરૂ કર્યું હતું.

શું હતી સમગ્ર ઘટના?
આ ઘટનાની મળતી માહિતી મુજબ,ખેડા જિલ્લાના મહેમદાવાદ તાલુકાના મોડજ ગામનો ચૌહાણ પરિવાર ગિરનારની યાત્રાએ આવ્યો હતો.પરિવારના સભ્યો વહેલી સવારે ગિરનાર ચઢવાનું શરૂ કર્યું હતું.તેઓ ગેટથી અંદાજે 50 જેટલા પગથિયાં ઉપર પહોંચ્યા હતા, ત્યારે અંધારામાં ક્યાંક છુપાઈને બેઠેલા સિંહે અચાનક બાળકની પાછળથી તરાપ મારી હતી.ઘટનાને નજરે જોનારા લોકોના જણાવ્યા અનુસાર, સિંહ બાળક મયુરસિંહ મહેન્દ્રસિંહ ચૌહાણને પકડીને તરત જ જંગલ વિસ્તારમાં ખેંચી ગયો હતો.આ ઘટના બનતા જ ભારે દોડધામ મચી ગઈ હતી. ઘટનાસ્થળેથી બાદમાં બાળકના કપડાં, બૂટ અને શરીરના કેટલાક અવશેષો મળી આવ્યા હતા.

50 પગથિયાં ચડતા જ સિંહે પાછળથી બાળક પર હુમલો કર્યો
પ્રત્યક્ષદર્શીઓના જણાવ્યા મુજબ પરિવાર ધીમે ધીમે પગથિયા ચઢી રહ્યો હતો. બાળક પોતાના કાકાની સાથે હતો. અચાનક જંગલ તરફથી સિંહ દોડતો આવ્યો અને કોઈને પ્રતિક્રિયા કરવાની તક મળે તે પહેલાં બાળકને પકડીને જંગલમાં લઈ ગયો. પરિવારજનો અને આસપાસના લોકો બૂમાબૂમ કરવા લાગ્યા, પરંતુ સિંહ થોડા જ ક્ષણોમાં જંગલમાં અદૃશ્ય થઈ ગયો.ઘટનાની જાણ થતાં જ વન વિભાગ અને પોલીસ તાત્કાલિક સ્થળે પહોંચી ગયા અને સમગ્ર વિસ્તારને કોર્ડન કરી શોધખોળ શરૂ કરી.

લાંબા સર્ચ ઓપરેશન બાદ મળ્યા અવશેષો
ઘટના બાદ કલાકો સુધી વન વિભાગ, ટ્રેકરો અને સ્થાનિક ટીમોએ જંગલ વિસ્તારમાં સર્ચ ઓપરેશન ચલાવ્યું. આખરે જંગલના અંદરના વિસ્તારમાં બાળકના અવશેષો મળી આવ્યા હોવાનું જણાવાયું. આ સમાચાર મળતા પરિવાર પર દુઃખનો પહાડ તૂટી પડ્યો અને સમગ્ર વિસ્તારમાં શોકની લાગણી ફેલાઈ ગઈ.

વન વિભાગ અને વહીવટી તંત્રની કાર્યવાહી
ઘટનાની જાણ થતા જ વન વિભાગનો કાફલો અને પોલીસ ઘટનાસ્થળે દોડી આવ્યા હતા. આ ગંભીર પરિસ્થિતિને ધ્યાનમાં લેતા વહીવટી તંત્ર દ્વારા તાત્કાલિક અસરથી ગિરનારની મુખ્ય સીડીઓ પર પ્રવાસીઓની અવરજવર બંધ કરી દેવામાં આવી છે. શ્રદ્ધાળુઓને હવે જટાશંકર નજીકની જૂની સીડીનો ઉપયોગ કરવા સૂચના આપવામાં આવી છે. વન વિભાગ દ્વારા સિંહને પકડવા માટે સઘન શોધખોળ હાથ ધરવામાં આવી છે. આ માટે અલગ-અલગ ટીમો બનાવવામાં આવી છે અને માનવભક્ષી હોવાની આશંકાએ સિંહને ઝડપી લેવા માટે ઘટનાસ્થળની આસપાસ પાંજરા પણ ગોઠવવામાં આવ્યા છે.

ગિરનાર યાત્રા તાત્કાલિક બંધ
ઘટનાની ગંભીરતાને ધ્યાનમાં રાખીને વન વિભાગ અને સ્થાનિક તંત્રે ગિરનાર પર પ્રવાસીઓ અને યાત્રાળુઓની અવરજવર તાત્કાલિક અસરથી બંધ કરી દીધી છે. કોઈપણ અનિચ્છનીય ઘટના ન બને તે માટે ગિરનાર તરફ જવાના તમામ માર્ગો પર સુરક્ષા વધારી દેવામાં આવી છે. તંત્રે સ્પષ્ટ કર્યું છે કે પરિસ્થિતિ સંપૂર્ણપણે નિયંત્રણમાં આવે અને જંગલી પ્રાણી અંગેનો ખતરો ટળે ત્યાં સુધી યાત્રાળુઓને ગિરનારમાં પ્રવેશ આપવામાં આવશે નહીં. પ્રવાસીઓને પણ સત્તાવાર સૂચના સુધી ગિરનારની મુલાકાત ન લેવા અપીલ કરવામાં આવી છે.

ગિરનારમાં સતત વધી રહ્યા છે સિંહોના મૂવમેન્ટ
વન્યજીવ નિષ્ણાતોના જણાવ્યા મુજબ છેલ્લા કેટલાક સમયથી ગિરનાર અને આસપાસના જંગલ વિસ્તારમાં સિંહોની અવરજવર વધી રહી છે. ખાસ કરીને વરસાદી મોસમ અને જંગલના કુદરતી પરિવર્તન દરમિયાન સિંહો માનવ વસાહતો અથવા યાત્રામાર્ગની નજીક આવી જતા હોવાની ઘટનાઓ નોંધાઈ રહી છે.ગિરનાર પર્વત જંગલ વિસ્તાર સાથે જોડાયેલો હોવાથી વન વિભાગ સતત પેટ્રોલિંગ કરે છે, છતાં કેટલીક વખત જંગલી પ્રાણીઓ અચાનક યાત્રામાર્ગ સુધી પહોંચી જાય છે.

25 દિવસમાં 6મી ઘટના
વન્યજીવ વિસ્તાર સાથે જોડાયેલા વિસ્તારોમાં છેલ્લા 25 દિવસ દરમિયાન સિંહો સાથે સંબંધિત અનેક ઘટનાઓ સામે આવી હોવાનું કહેવાય છે. આ સમયગાળા દરમિયાન માનવ અને સિંહ વચ્ચેના સંપર્કની અનેક ઘટનાઓ નોંધાઈ છે, જેના કારણે સ્થાનિકો અને યાત્રાળુઓમાં ચિંતા વધી છે.વારંવાર આવી રહેલી ઘટનાઓ બાદ સુરક્ષા વ્યવસ્થાની અસરકારકતા અંગે પણ પ્રશ્નો ઉઠી રહ્યા છે. યાત્રામાર્ગ પર વધુ પેટ્રોલિંગ, વધારાના સુરક્ષાકર્મીઓ અને સીસીટીવી જેવી વ્યવસ્થાની માંગ ઉઠી રહી છે.

વન વિભાગની સુરક્ષા વ્યવસ્થા સામે પણ સવાલો 
ગિરનારના પગથિયાં પર બનેલી આ ઘટનાએ વન વિભાગની સુરક્ષા વ્યવસ્થા સામે પણ સવાલો ઉભા કર્યા છે. સામાન્ય રીતે ગિરનાર પર શ્રદ્ધાળુઓની સતત અવરજવર હોય છે, ત્યારે આ પ્રકારે સિંહના હુમલાની ઘટનાથી યાત્રિકોની સુરક્ષાને લઈને ભયનો માહોલ સર્જાયો છે. હાલમાં વન વિભાગે આ નરભક્ષી બનેલા સિંહને પાંજરે પૂરવા માટેની તજવીજ અને ચક્રો ગતિમાન કર્યા છે.આ ઘટના માત્ર એક પરિવાર માટે નહીં પરંતુ સમગ્ર સમાજ માટે ચિંતાનો વિષય બની છે. ધાર્મિક યાત્રાધામોમાં લાખો લોકો આવે છે ત્યારે યાત્રાળુઓની સુરક્ષા સર્વોચ્ચ પ્રાથમિકતા હોવી જોઈએ. વન વિભાગ, સ્થાનિક તંત્ર અને પ્રશાસન દ્વારા આવી દુર્ઘટનાઓ ફરી ન બને તે માટે અસરકારક પગલાં લેવાય તેવી લોકો અપેક્ષા રાખી રહ્યા છે.