જૂનાગઢ ભારતી આશ્રમના લઘુમહંત સુસાઈડ નોટ લખી ગુમ!

જૂનાગઢના ભવનાથ વિસ્તારમાં આવેલ ભારતી આશ્રમમાં આજે (2 નવેમ્બર) વહેલી સવારે ચકચાર મચી ગઈ છે. આશ્રમના લઘુમહંત 1008 મહામંડલેશ્વર મહાદેવભારતી ત્રણથી વધુ પાનાની સુસાઈડ નોટ લખી ગુમ થયા છે. આશ્રમ સંચાલકોએ તરત જ ભવનાથ પોલીસને જાણ કરતા પોલીસે શોધખોળ શરૂ કરી છે.

ભવનાથ પોલીસ અને જુનાગઢ પોલીસની અનેક ટીમોએ અલગ-અલગ વિસ્તારોમાં શોધ શરૂ કરી છે. પ્રાથમિક તપાસ મુજબ, મહાદેવભારતી બાપુએ લખેલી સુસાઈડ નોટમાં કેટલાક અંગત મનદુખના ઉલ્લેખ કરવામાં આવ્યા છે. પોલીસ દ્વારા નોટનું વિશ્લેષણ શરૂ કરવામાં આવ્યું છે, જોકે તેમાં ઉલ્લેખિત નામો હજી જાહેર કરાયા નથી.

આ અચાનક બનેલી ઘટનાથી આશ્રમના સેવકો અને અનુયાયીઓમાં ચિંતા અને ઉત્કંઠા વ્યાપી ગઈ છે. પોલીસ ટીમો CCTV ફૂટેજ અને મોબાઇલ લોકેશનના આધારે શોધખોળ આગળ ધપાવી રહી છે.

ભવનાથ પોલીસ સ્ટેશનના અધિકારીઓએ જણાવ્યું છે કે, પ્રાથમિક રીતે આ વ્યક્તિગત તણાવથી સંબંધિત ઘટના લાગે છે, પરંતુ તમામ પાસાઓની તપાસ ચાલી રહી છે.