જિગ્નેશ મેવાણીની જાહેરમાં પોલીસને ધમકી ભારે પડી

 કોંગ્રેસના વડગામ ધારાસભ્ય જીગ્નેશ મેવાણીના પોલીસ અધિકારીઓને ધમકાવતા નિવેદન સામે ગુજરાતમાં વ્યાપક આક્રોશ ફૂટ્યો છે. ઉત્તર ગુજરાતના થરાદ, પાટણ અને કચ્છ જિલ્લાઓમાં પોલીસ પરિવારોએ રસ્તા પર ઉતરીને વિરોધ નોંધાવ્યો છે. આજે કચ્છના ભુજમાં પોલીસ પરિવારે મોટી રેલી કાઢી, જેમાં મેવાણી વિરુદ્ધ તીખા સૂત્રોચ્ચાર લગાવાયા અને તેમના રાજીનામાની માગ કરવામાં આવી. રેલી પછી કલેક્ટરને આવેદનપત્ર આપવામાં આવ્યું, જેમાં મેવાણીને જાહેરમાં માફી માંગવા અને ધારાસભ્ય પદ પરથી રાજીનામું આપવાની માંગ કરાઈ છે.

કોંગ્રેસની જન આક્રોશ યાત્રા દરમિયાન ૨૧ નવેમ્બરે થરાદમાં પહોંચેલા મેવાણીએ એસપી કચેરી ખાતે પહોંચીને ડ્રગ્સ અને દારુના વેચાણ અંગે રજૂઆત કરી હતી. આ સમયે તેઓએ આક્રોશમાં કહ્યું હતું કે, "હું બીજી વખત આવું ત્યારે અહીં બધું ચોખ્ખું નહીં હોય તો પોલીસ અધિકારીઓ સસ્પેન્ડ થશે. મારા માણસો સામે આંખની ભ્રમણ ઉંચી કરીને પણ પોલીસકર્મી જોશે તો હું છું અને તમે છો." આ નિવેદન પછી રાજ્યના ગૃહમંત્રી હર્ષ સંઘવીએ મેવાણીની ટીકા કરી હતી, જે વાવ-થરાદ જિલ્લામાંથી પસાર થતી યાત્રા દરમિયાન બબાલ બની ગયું.

ભુજમાં રેલી: 'જીગ્નેશ મેવાણી રાજીનામું આપે, પોલીસ જીંદાબાદ'

કચ્છ જિલ્લા પોલીસ પરિવાર દ્વારા આજે ભુજમાં યોજાયેલી રેલીમાં મોટી સંખ્યામાં પોલીસ કર્મચારીઓ અને તેમના પરિવારજનો ભાગ લીધા. રેલી દરમિયાન "જીગ્નેશ મેવાણી રાજીનામું આપે", "પોલીસનું મોરલ ઉંચું રહે", "ગુજરાત પોલીસ જીંદાબાદ", "પોલીસની નોકરી સંવિધાનથી મળી છે, કોઈની ખેરાત નથી" જેવા સૂત્રોચ્ચાર લગાવાયા. 'જીગ્નેશ મેવાણી હાય-હાય'ના બેનર્સ સાથે રેલી કાઢવામાં આવી અને કલેક્ટર કચ્છને આવેદનપત્ર સોંપવામાં આવ્યું.

આવેદનપત્રમાં જણાવાયું છે કે, મેવાણીએ જનપ્રતિનિધિ તરીકે અયોગ્ય ભાષાનો ઉપયોગ કરીને પોલીસ અધિકારીઓ અને કર્મચારીઓનું અપમાન કર્યું છે. "અગાઉ પણ તેઓએ 'પોલીસના પટ્ટા-ટોપી ઉતારી નોકરીમાંથી હકાલપટ્ટી કરાવી દેશે' જેવી ધમકીઓ આપી છે, જે પોલીસનું મનોબળ તોડવાનો પ્રયાસ છે," એમ આવેદનપત્રમાં ઉલ્લેખ કરાયો છે. પોલીસ પરિવારે ભારપૂર્વક જણાવ્યું કે, "એક ધારાસભ્યનું કાર્ય પ્રજા સેવા અને મતવિસ્તારના સમસ્યા હલ કરવાનું છે, પરંતુ મેવાણી પોલીસને સોફ્ટ ટાર્ગેટ બનાવીને વાહવાહી મેળવવાનો પ્રયાસ કરે છે."

પાટણ અને થરાદમાં પણ વિરોધ તીવ્ર

પાટણ જિલ્લામાં પણ આજે પોલીસ પરિવારે રેલી કાઢી, જેમાં "પટ્ટા-ટોપી ઉતારવાની વાત કરનારા સાવધાન" અને "પોલીસ પરિવાર જીંદાબાદ"ના બેનર્સ લઈને માર્ચ કરાયો. રેલી પછી કલેક્ટરને આવેદનપત્ર આપવામાં આવ્યું. થરાદમાં પણ પોલીસ પરિવારો સહિત વેપારીઓએ વિરોધ નોંધાવ્યો, જ્યાં મોટી સંખ્યામાં લોકોએ 'હાય-હાય'ના નારા લગાવ્યા.

પોલીસની સેવાને યાદ કરતા આક્રોશ

આવેદનપત્રમાં પોલીસની સેવાને યાદ કરવામાં આવી છે: "ગુજરાત પોલીસ દિવસ-રાત જાનમાલની રક્ષા માટે ફરજ બજાવે છે, અંગત પ્રસંગો ત્યજીને સેવા આપે છે. કોરોના જેવી મહામારીમાં જીવન જોખમમાં મૂકીને કામ કર્યું, જેમાં અનેક પોલીસકર્મીઓએ પ્રાણ ગુમાવ્યા. આવા સમયે જનપ્રતિનિધિનું આ વર્તન નિંદનીય છે." પોલીસ પરિવારે ચેતવણી આપી છે કે, "પોલીસની નોકરી કોઈની ખૈરાત નથી, પરંતુ સંવિધાન અને કાબેલિયતથી મળેલો અધિકાર છે. મેવાણીએ તેમની માનસિકતા સુધારવી જરૂરી છે."

આ વિરોધ વધુ તીવ્ર બને તેવી શક્યતા છે, કારણ કે પોલીસ પરિવારોએ જણાવ્યું છે કે માફી નહીં માંગે તો સમગ્ર ગુજરાતમાં વ્યાપક આંદોલન થશે. આ બાબતે કોંગ્રેસ અને મેવાણી પાસેથી હજુ સુધી કોઈ સ્પષ્ટ પ્રતિક્રિયા આવી નથી.