અમરેલી લેટરકાંડની તપાસ શરુ , નિર્લીપ્ત રાય પહોંચ્યા અમરેલી

અમરેલી લેટરકાંડની તપાસ સ્ટેટ મોનિટરીંગ સેલને સોંપાયા બાદ એસએમસીના વડા નિર્લીપ્ત રાય આજે અમરેલી પહોંચ્યા છે અને સમગ્ર પ્રકરણની તપાસ શરુ કરી છે. પીડિતાની પૂછપરછ કરવાથી માંડીને તમામ એંગલથી આ કેસની તપાસ શરુ કરાઇ છે.

અમરેલી લેટરકાંડ બહાર આવ્યા બાદ પાટીદાર યુવતીનું સરઘસ કાઢવાના મુદ્દે ભારે વિવાદ થયો હતો અને લોકોએ આ કાર્યવાહીનો ઉગ્ર વિરોધ કર્યો હતો. કોંગ્રેસ દ્વારા ધરણા અને બંધનું એલાન અપાયું હતું તો આમ આદમી પાર્ટીના નેતાઓએ પણ અમરેલી પહોંચીને વિરોધ પ્રદર્શન કર્યું હતું. ત્યારબાદ પાટિદાર યુવતીએ પણ કેટલાક આરોપો લગાવ્યા હતા જે મુદ્દે વિવાદ થયો હતો. 

ત્યારબાદ અમરેલીના જિલ્લા પોલીસ વડાએ એલસીબીમાં ફરજ બજાવતાં કિશન આસોદરીયા, વરજાંગ મુળાસીયા તથા હિનાબેન મેવાડાને સસ્પેન્ડ કર્યા હતા. પોલીસ વડાની આ કાર્યવાહી બાદ એસએમસીને તપાસ સોંપી હતી.

આ મામલે રાજ્ય સરકારે સમગ્ર પ્રકરણની તપાસ સ્ટેટ મોનિટરીંગ સેલને સોંપી હતી અને ત્યારબાદ સ્ટેટ મોનિટરીંગ સેલના વડા નિર્લીપ્ત રાય આજે અમરેલી પહોંચ્યા છે. તેઓ પોતાની ટીમ સાથે અમરેલી સક્રિટ હાઉસ ખાતે પહોંચ્યા છે જ્યાં તેઓ સમગ્ર પ્રકરણ મુદ્દે કેસ સાથે સંકળાયેલા પ્રત્યેક વ્યક્તિની પૂછપરછ કરશે.

ઉપરાંત પોલીસ કર્મચારીઓની બેદરકારીની પણ તપાસ કરાશે અને તેમના પણ નિવેદન લેવાશે. આ કેસના આરોપીઓએ કોના કહેવાથી આ કૃત્ય કર્યું હતું તેની પણ ઉંડી તપાસ થશે. 

ઉલ્લેખનિય છે કે તાજેતરમાં અમરેલીમાં તાલુકા પંચાયત પ્રમુખ કિશોર કાનપરિયાના નામવાળો નકલી લેટરપેડ સોશિયલ મીડિયામાં વાયરલ કરાયો હતો. આ મામલે કાનપરિયાએ પોલીસમાં ફરિયાદ કરી હતી ત્યારબાદ પાયલ ગોટી સહિત 4ની ધરપકડ કરવામા આવી હતી