24 કલાકમાં કોરોનાથી 4ના મોત, 3300થી વધુ એક્ટિવ કેસ, ભારતમાં કોરોનાએ ફરી ઝડપ પકડી

ભારતમાં ફરી કોરોના વાયરસના કેસ ઝડપથી વધતા જણાઈ રહ્યા છે. તાજેતરના આંકડાઓ અનુસાર, દેશમાં હાલ કુલ 3395 એક્ટિવ કોવિડ-19ના કેસ છે. છેલ્લા 24 કલાકમાં કોરોનાના કારણે 4 લોકોના મૃત્યુ થયા છે. કોરોનાના કેસોમાં તીવ્ર વધારો જોવા મળ્યો છે અને તેમા કેરળ રાજ્ય વધુ અસરગ્રસ્ત છે, જે હાલમાં દેશનું નવું “એપીસેન્ટર” બની ગયું છે.

કયા રાજ્યમાં કેટલા મૃત્યુ થયા?

કોરોના વાયરસના કારણે છેલ્લાં 24 કલાકમાં દિલ્હી, કેરળ, કર્ણાટક અને ઉત્તર પ્રદેશમાં દરેક રાજ્યમાંથી 1-1 દર્દીનું મૃત્યુ થયું છે. મંગળવારના આંકડા અનુસાર, દેશભરમાં કુલ 4 લોકોના મોત નોંધાયા છે.

કોરોના કેસમાં છલાંગ કેમ?

22 મેના રોજ માત્ર 257 એક્ટિવ કેસ હતા, જ્યારે 26 મે સુધીમાં આ આંકડો વધીને 1010 થયો હતો. માત્ર 4 દિવસમાં આ તીવ્ર વધારો નોંધાયો છે. છેલ્લા 24 કલાકમાં નવા 685 કેસ સામે આવ્યા છે. ડોક્ટરો જણાવે છે કે, હાલના વાયરસના લક્ષણો ગંભીર નથી અને જરૂરિયાત મુજબ સાવચેતી રાખવી જરૂરી છે - જેમ કે માસ્ક પહેરવો, સોશિયલ ડિસ્ટન્સ જાળવવો અને હાથ ધોતા રહેવું.

NB.1.8.1 અને L.F.7 વેરિયન્ટ શું છે?

વિશ્વ આરોગ્ય સંસ્થાએ NB.1.8.1 અને L.F.7ને “સર્વેલન્સ હેઠળના વેરિઅન્ટ” તરીકે જાહેરાત કરી છે. તેમનું હવે વધુ જોખમ નથી, પરંતુ ચીન અને એશિયામાં કોવિડ કેસોમાં તાજેતરના ઉછાળામાં આ વેરિયન્ટ જવાબદાર હોવાનું માનવામાં આવે છે.

આ વેરિયન્ટમાં સ્પાઇક પ્રોટીનમાં ફેરફારો થવાના કારણે તે ઝડપથી ફેલાઈ શકે છે. એટલે કે એક વ્યક્તિમાંથી બીજી વ્યક્તિ સુધી વધુ ઝડપથી સંક્રમણ ફેલાય શકે છે.