પત્નીના આડા સંબંધોથી કંટાળી પતિએ જીવન ટૂંકાવ્યું

અમદાવાદ શહેરના રાણીપ વિસ્તારમાં પતિ-પત્નીના સંબંધને લજવતી એક કરુણ ઘટના સામે આવી છે. પત્નીના અન્ય પુરુષો સાથેના આડા સંબંધો અને વારંવારના ઝઘડાથી કંટાળીને 42 વર્ષીય દશરથભાઈ દેસાઈ નામના યુવકે પોતાના ઘરે ગળેફાંસો ખાઈ આપઘાત કરી લીધો છે. મૃતક પાસેથી મળી આવેલી સ્યુસાઇડ નોટમાં તેમણે પત્નીના અગણિત સંબંધો અને તેના કારણે થયેલા માનસિક ત્રાસની વિગતો લખી છે.

મૃતક દશરથભાઈ ચિરિપાલ કંપનીમાં નોકરી કરતા હતા. છેલ્લા એક મહિનાથી તેમને પત્ની ભગવતીના વર્તન પર શંકા જતા તેમણે મોબાઈલની કોલ ડિટેઈલ કઢાવી હતી. જેમાં પત્નીના અનેક પુરુષો સાથે સંબંધ હોવાનું બહાર આવ્યું હતું.

દશરથભાઈએ પત્નીને બાળકોના ભવિષ્ય માટે આ બધું છોડી દેવા સમજાવી હતી, પરંતુ સુધરવાને બદલે પત્નીએ ઝઘડો કરી પતિને ખોટા કેસમાં ફસાવી દેવાની ધમકી આપી હતી.

પરિવારમાં વિખવાદથી અંતિમ પગલું

ગત 21 માર્ચના રોજ પત્નીના ભાઈઓ ઘરે આવ્યા હતા અને તેને પિયર લઈ ગયા હતા. બીજા દિવસે ૨૨ માર્ચના રોજ દશરથભાઈએ પોતાના રાણીપ સ્થિત ઘરે પંખા સાથે ચાદર બાંધીને ગળેફાંસો ખાઈ લીધો હતો.

જ્યારે તેમના ભાઈઓને શંકા ગઈ ત્યારે તેમણે પડોશીને તપાસ કરવા મોકલ્યા હતા. દરવાજો ન ખુલતા ગેલેરીમાંથી તપાસ કરતા દશરથભાઈ લટકતી હાલતમાં મળી આવ્યા હતા.

પોલીસને ઘટનાસ્થળેથી એક સ્યુસાઇડ નોટ મળી છે, જેમાં લખ્યું છે કે, "હું આત્મહત્યા કરું છું કારણ કે મારી પત્નીના અનેક લોકો સાથે આડા સંબંધો છે. બાળકો સામે પણ તે પરપુરુષો સાથે સહવાસ કરતી હતી. દીકરા-દીકરી માફ કરજો, પપ્પા હવે નહીં જીવી શકે."

નોટમાં પત્નીએ 25 લાખ રૂપિયા વાપરી નાખ્યા હોવાનો અને સગા-સંબંધીઓના દાગીના ગીરવે મૂકી દીધા હોવાનો પણ ઉલ્લેખ છે.

પોલીસ કાર્યવાહી

રાણીપ પોલીસે મૃતકના ભાઈની ફરિયાદના આધારે પત્ની ભગવતી દેસાઈ સામે આત્મહત્યા માટે દુષ્પ્રેરણાનો ગુનો નોંધી વધુ તપાસ હાથ ધરી છે. સ્યુસાઇડ નોટમાં ઉલ્લેખિત મોબાઈલ નંબરો અને અન્ય વિગતોના આધારે પોલીસ તપાસનો ધમધમાટ તેજ કર્યો છે.