વડોદરા નજીક પસાર થતા નેશનલ હાઈવે-48 પર અકસ્માતોની હારમાળા યથાવત છે. ફરી એકવાર હિટ એન્ડ રનની હૃદયદ્રાવક ઘટના સામે આવી છે, જેમાં એક 43 વર્ષીય મહિલાએ પોતાનો જીવ ગુમાવ્યો છે. લગ્ન પ્રસંગની ખુશી માણીને પરત ફરી રહેલા દંપતી માટે હાઈવેનો અંધકાર કાળ બનીને ત્રાટક્યો હતો.
લગ્ન પ્રસંગની ખુશી માતમમાં ફેરવાઈ :&nbsp;
પ્રાપ્ત વિગતો અનુસાર, એક દંપતી લગ્ન પ્રસંગમાં હાજરી આપીને બાઈક પર સવાર થઈ મંજુસર તરફ જઈ રહ્યું હતું. આ દરમિયાન નેશનલ હાઈવે-48 પર પાછળથી પૂરઝડપે આવી રહેલા એક અજાણ્યા ભારે વાહને તેમની મોટરસાયકલને જોરદાર ટક્કર મારી હતી. અકસ્માત એટલો ભયાનક હતો કે બાઈક પાછળ બેઠેલી 43 વર્ષીય મહિલા રોડ પર ફેંકાઈ ગઈ હતી.
ઘટનાસ્થળનું ભયાનક દ્રશ્ય :&nbsp;
અજાણ્યા વાહનના પૈડા મહિલાના શરીર પર ફરી વળતા તેનું ઘટનાસ્થળે જ મોત નીપજ્યું હતું. ટક્કર એટલી જોરદાર હતી કે રસ્તા પર માનવ માંસના લોચા પથરાઈ ગયા હતા, જે જોઈને હાજર લોકોના કાળજા કંપી ઉઠ્યા હતા. અકસ્માત સર્જ્યા બાદ વાહનચાલક અંધારાનો લાભ લઈને પોતાના વાહન સાથે ફરાર થઈ ગયો હતો.
પોલીસ તપાસ અને તંત્રની નિષ્ફળતા :&nbsp;
ઘટનાની જાણ થતા જ સ્થાનિક પોલીસ કાફલો સ્થળ પર પહોંચી ગયો હતો. પોલીસે મહિલાના મૃતદેહનો કબજો મેળવી તેને પોસ્ટમોર્ટમ માટે વડોદરાની સયાજી હોસ્પિટલ ખાતે ખસેડ્યો છે. મૃતક મહિલાના પતિએ જણાવ્યું કે અંધારાને કારણે વાહનનો નંબર કે પ્રકાર જાણી શકાયો ન હતો. હાલમાં પોલીસે ગુનો નોંધીને આસપાસના સીસીટીવી ફૂટેજ તેમજ હાઈવેના ટોલ પ્લાઝા પર તપાસ શરૂ કરી છે જેથી ફરાર વાહનચાલકને ઝડપી શકાય.
નેશનલ હાઈવે પર સતત વધી રહેલા અકસ્માતોને કારણે હવે તંત્રની કામગીરી સામે પણ સવાલો ઉઠી રહ્યા છે. ખાસ કરીને રાત્રિના સમયે હાઈવે પર લાઈટિંગની વ્યવસ્થા અને ટ્રાફિક નિયમોનું પાલન કરાવવામાં તંત્ર નિષ્ફળ સાબિત થઈ રહ્યું હોય તેમ લાગી રહ્યું છે.&nbsp;

વડોદરા હાઈવે અકસ્માત સમાચાર

લગ્ન પ્રસંગથી પરત ફરતા દંપતીને અજાણ્યા વાહને ટક્કર મારી,પત્નીનું ઘટનાસ્થળે જ મોત

March 29, 2026 | 11:52 IST