અમદાવાદમાં હિટ એન્ડ રન: ડમ્પરે રાહદારીને કચડ્યા

અમદાવાદના વાડજ વિસ્તારમાં આજે વહેલી સવારે હિટ એન્ડ રનની એક સનસનીખેજ ઘટના સામે આવી છે. વાડજ સર્કલ પાસે પૂરઝડપે આવતા એક ડમ્પર ચાલકે રાહદારીને અડફેટે લેતા તેમનું સ્થળ પર જ મોત થયું હતું. અકસ્માત સર્જીને ભાગી રહેલા ડમ્પર ચાલકનો સ્થાનિકોએ પીછો કર્યો હોવા છતાં તે હાથ લાગ્યો ન હતો.

મળતી માહિતી મુજબ, વાડજની હનુમાનપુર ચાલીમાં રહેતા ધીરજભાઈ વહેલી સવારે ચા પીવા માટે બહાર નીકળ્યા હતા. ચા પીને તેઓ જ્યારે ચાલીને પોતાના ઘર તરફ પરત ફરી રહ્યા હતા, ત્યારે કાળ બનીને આવેલા એક ડમ્પરે તેમને જોરદાર ટક્કર મારી હતી. આ અકસ્માતમાં ધીરજભાઈને માથા અને શરીરના ભાગે ગંભીર ઈજાઓ પહોંચતા તેમણે ઘટનાસ્થળે જ દમ તોડ્યો હતો.

સ્થાનિકોએ કર્યો પીછો

અકસ્માત સર્જ્યા બાદ ડમ્પર ચાલકે વાહન ઊભું રાખવાને બદલે ભગાવ્યું હતું. આ દ્રશ્ય જોઈને આસપાસના લોકો રોષે ભરાયા હતા અને કેટલાક યુવકોએ પોતાના ટુ-વ્હીલર પર ડમ્પરનો પીછો કર્યો હતો. રેસના ફિલ્મી દ્રશ્યો જેવા આ પીછો કરવામાં ટુ-વ્હીલર ચાલકોએ જીવનું જોખમ ખેડ્યું હતું, પરંતુ ડમ્પર ચાલક પૂરઝડપે વાહન હંકારીને ફરાર થઈ જવામાં સફળ રહ્યો હતો.

પોલીસ કાર્યવાહી

ઘટનાની જાણ થતા જ બી ડિવિઝન ટ્રાફિક પોલીસનો કાફલો ઘટનાસ્થળે પહોંચી ગયો હતો. ટ્રાફિક પીઆઈ જે.એચ. ચૌધરીએ જણાવ્યું હતું કે, "અકસ્માત સર્જનાર ડમ્પરનો નંબર મેળવી લેવામાં આવ્યો છે. હાલમાં ગુનો નોંધવાની તજવીજ ચાલુ છે અને ટૂંક સમયમાં જ નંબરના આધારે ચાલકની ધરપકડ કરવામાં આવશે."

ઉલ્લેખનીય છે કે, અમદાવાદમાં ડમ્પર, આઈસર અને સિમેન્ટ મિક્સર જેવા ભારે વાહનો રાહદારીઓ અને ટુ-વ્હીલર ચાલકો માટે જોખમી સાબિત થઈ રહ્યા છે. થોડા દિવસો અગાઉ જ ખોખરામાં પણ એક યુવતીનું ડમ્પરની અડફેટે મોત થયું હતું. સતત વધતા અકસ્માતોને પગલે હવે શહેરીજનોમાં ભારે વાહનો પ્રત્યે રોષ જોવા મળી રહ્યો છે.