અડાલજ વાવ ખાતે ‘વોટર ફેસ્ટિવલ 2025’નું ભવ્ય આયોજન

દેશના ઐતિહાસિક સ્મારકોને જીવંત કરીને સંગીત-નૃત્યના માધ્યમથી લોકો સુધી પહોંચાડવાનું કામ સતત કરી રહેલી સંસ્થા ‘ક્રાફ્ટ ઓફ આર્ટ’ આ વર્ષે 23 નવેમ્બરના રોજ પ્રખ્યાત અડાલજ ની વાવ ખાતે 16મી ‘વોટર ફેસ્ટિવલ’નું આયોજન કરી રહી છે. ફેસ્ટિવલમાં વિશ્વવિખ્યાત કલાકારોના દમદાર પ્રદર્શન સાથે અડાલજ વાવનું અદ્ભુત સ્થાપત્ય ખાસ લાઇટિંગથી ચમકશે અને એક અવિસ્મરણીય સાંજનું સર્જન થશે.

કાર્યક્રમની ખાસિયત એ છે કે તબલા સમ્રાટ ઉસ્તાદ ફઝલ કુરેશી, વાયોલિનવાદક અંબી સુબ્રમણ્યમ, કીબોર્ડ માટે સ્ટીફન દેવાસી, કબીર ગાયકીમાં મીર મુખ્તિયાર અલી, ઘટમ પર ગિરધર ઉડુપા, ડ્રમ્સ પર અરુણ કુમાર, ઢોલક પર નવીન શર્મા, બાસ પર પૃથ્વી સેમ્યુઅલ અને સારંગી પર ઇલિયાસ ખાન જેવા મહાન કલાકારો એકસાથે પ્રદર્શન કરશે. સાથે જ કેરળની પ્રખ્યાત કથકલી ટ્રુપ શાસ્ત્રીય નૃત્યની જાદુઈ ઝલક આપશે. સમગ્ર કાર્યક્રમનું સંચાલન જાણીતી અભિનેત્રી સુચિત્રા પિલ્લઈ કરશે.

સંસ્થાના સ્થાપક અને કલાત્મક નિર્દેશક બિરવા કુરેશીએ જણાવ્યું હતું કે, “16 વર્ષની સફર પૂરી કરી રહ્યા છીએ એ અમારા માટે ખૂબ મોટી વાત છે. અડાલજ વાવ જેવા અદ્ભુત સ્મારકને સંગીત અને પ્રકાશના માધ્યમથી જીવંત કરવાનો પ્રયાસ અમે સતત કરીએ છીએ, જેથી નવી પેઢી ઇતિહાસને માત્ર જુએ નહીં પણ અનુભવે પણ ખરો.”

વોટર ફેસ્ટિવલ ગુજરાત ટુરિઝમ દ્વારા પ્રાયોજિત અને અદાણી ગ્રુપ દ્વારા સહ-પ્રાયોજિત છે. માય એફએમ રેડિયો પાર્ટનર તરીકે અને સેલવેલ મીડિયા આઉટડોર પાર્ટનર તરીકે જોડાયા છે.  પ્રવેશ બિલકુલ મફત છે, પરંતુ અગાઉથી નોંધણી જરૂરી છે. BookMyShow પરથી તમે ફ્રી રજિસ્ટ્રેશન કરાવી શકો છો (First Come First Served).આવો, 23 નવેમ્બરની સાંજે અડાલજ વાવ ખાતે ઇતિહાસ, સંગીત અને પ્રકાશના અદ્ભુત મેળાપનો સાક્ષી બનીએ!