ગુજરાતમાં મેઘરાજાનું ધમાકેદાર આગમન, 57 તાલુકામાં વરસાદનો કહેર

ગુજરાતમાં મેઘરાજાએ તોફાની આગમન કરી રાજ્યના ઘણા વિસ્તારોમાં ધોધમાર વરસાદ વરસાવ્યો છે. છેલ્લા 24 કલાકમાં 57 તાલુકાઓમાં વરસાદ નોંધાયો છે અને હવામાન વિભાગની આગાહી મુજબ, આગામી 5 દિવસ સુધી વરસાદ ચાલુ રહેવાની શક્યતા વ્યક્ત કરી છે.

અંકલેશ્વરમાં સૌથી વધુ 2.25 ઈંચ વરસાદ સાથે ટોચે રહ્યો છે. સાવરકુંડલામાં 1.75 ઈંચ, જ્યારે ઉમરપાડા, તલાલા અને ઝઘડિયામાં 1.5 ઈંચ વરસાદ નોંધાયો છે. દાહોદ અને હાંસોટમાં 1.25 ઈંચ, માંગરોળ અને જેસરમાં 1 ઈંચ, જ્યારે માળિયા હાટીના, સુરત શહેર, તળાજા, ભરૂચ, બારડોલી અને ધારીમાં 0.75 ઈંચ વરસાદ થયો છે. રાજુલા, સોનગઢ, ડોલવણ, પાટણ-વેરાવળ, ખાંભા અને જલાલપોરમાં 0.5 ઈંચ વરસાદ નોંધાયો છે.

હવામાન વિભાગે આગામી દિવસોમાં ભારે વરસાદની આગાહી સાથે યેલો અને ઓરેન્જ એલર્ટ જાહેર કર્યું છે. 26 મે સુધી આ એલર્ટ અમલમાં રહેશે. દરિયાકાંઠાના વિસ્તારોમાં માછીમારોને દરિયામાં ન જવાની ચેતવણી આપવામાં આવી છે.

આ વિસ્તારોમાં વધુ વરસાદની શક્યતા

ઉત્તર ગુજરાત, દક્ષિણ ગુજરાત અને સૌરાષ્ટ્રના વિસ્તારોમાં આજે પણ વરસાદ પડવાની શક્યતા છે. ખાસ કરીને બનાસકાંઠા, મહેસાણા, પાટણ, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ, છોટાઉદેપુર, નર્મદા, સુરત, ડાંગ, નવસારી, વલસાડ, તાપી, રાજકોટ, અમરેલી, ભાવનગર, ગીર સોમનાથ, જૂનાગઢ, ભરૂચ, કચ્છ અને દીવ જિલ્લામાં વરસાદની આગાહી છે.

હવામાન વિભાગે લોકોને સતર્ક રહેવાની તથા જરૂરિયાત મુજબ સાવચેતી રાખવાની અપીલ કરી છે. આ વરસાદ ખેડૂતો માટે લાભદાયક થઈ શકે છે, જોકે કેટલાક વિસ્તારોમાં પાણી ભરાવાની તથા નદીઓમાં વહેંચાવાની શક્યતાઓ પણ છે.