ગુજરાતમાં ઉનાળાની શરૂઆતની સાથે જ હવામાનમાં મોટો ફેરફાર જોવા મળી રહ્યો છે. હવામાન વિભાગે રાજ્યના વિવિધ ભાગોમાં માવઠાની ગંભીર આગાહી કરી છે. એપ્રિલ મહિનાની શરૂઆતમાં જ વેસ્ટર્ન ડિસ્ટર્બન્સ અને સાયક્લોનિક સર્ક્યુલેશન સક્રિય થવાને કારણે વાતાવરણમાં પલટો આવવાની શક્યતા છે. ખાસ કરીને બીજી અને ત્રીજી એપ્રિલે રાજ્યના અનેક જિલ્લાઓમાં ગાજવીજ સાથે વરસાદ વરસી શકે છે.
વેસ્ટર્ન ડિસ્ટર્બન્સને કારણે પલટાશે વાતાવરણ :&nbsp;
હવામાન વિભાગના જણાવ્યા અનુસાર, હાલમાં સર્જાયેલી સિસ્ટમને કારણે ઉત્તર ગુજરાત અને કચ્છમાં વરસાદની પ્રબળ શક્યતાઓ સેવાઈ રહી છે. નાઉકાસ્ટ દ્વારા કરવામાં આવેલી આગાહી મુજબ, ગાજવીજ સાથે સામાન્યથી મધ્યમ વરસાદ પડી શકે છે. સિસ્ટમની અસરને પગલે માછીમારોને પણ સાવચેતીના ભાગરૂપે દરિયો ન ખેડવા માટે ખાસ સૂચના આપવામાં આવી છે. રાજ્યમાં તાપમાનનો પારો 36થી 38 ડિગ્રીની વચ્ચે રહેવાની ધારણા છે, જેના કારણે બફારા સાથે વરસાદી માહોલ જામશે.
કયા વિસ્તારોમાં ક્યારે પડશે વરસાદ ?
હવામાન વિભાગે તારીખ મુજબ વિવિધ વિસ્તારો માટે આગાહી જાહેર કરી છે:
બીજી એપ્રિલ: કચ્છ, બનાસકાંઠા, સાબરકાંઠા, પાટણ અને મહેસાણા ઉપરાંત સૌરાષ્ટ્રના અમરેલી અને ભાવનગરમાં વરસાદ પડી શકે છે. આ સિવાય દક્ષિણ ગુજરાતના સુરત, નવસારી, ડાંગ, વલસાડ તેમજ તાપી અને નર્મદામાં પણ વાદળછાયા વાતાવરણ વચ્ચે માવઠું થવાની સંભાવના છે.
ત્રીજી એપ્રિલ: ઉત્તર ગુજરાતના તમામ મુખ્ય જિલ્લાઓ સહિત કચ્છ અને સૌરાષ્ટ્રના અમરેલી-ભાવનગરમાં વરસાદી માહોલ યથાવત રહેશે.
ચોથી એપ્રિલ: બનાસકાંઠા અને સાબરકાંઠાની સાથે અરવલ્લી, મહિસાગર તેમજ દક્ષિણ ગુજરાતના વલસાડ અને દાદરાનગર હવેલીમાં હળવો વરસાદ થવાની શક્યતા છે.
અમદાવાદમાં વાદળછાયું વાતાવરણ :&nbsp;
રાજ્યના પાટનગર ગાંધીનગર અને અમદાવાદમાં પણ વાતાવરણમાં પલટો જોવા મળશે. અમદાવાદમાં આગામી દિવસોમાં વાદળછાયું વાતાવરણ રહેવાની સાથે ઉકળાટમાં વધારો થઈ શકે છે. ઉત્તર ગુજરાતના બનાસકાંઠા, પાટણ અને મહેસાણામાં આજે સવારથી જ વરસાદી માહોલ જામવાની શક્યતા હોવાથી ખેડૂતોને પોતાના પાકને સુરક્ષિત રાખવા માટે તાકીદ કરવામાં આવી છે. કમોસમી વરસાદને કારણે કૃષિ પાકોને નુકસાન થવાની ભીતિ પણ સેવાઈ રહી છે.&nbsp;

ગુજરાતમાં કમોસમી વરસાદની આગાહી

વેસ્ટર્ન ડિસ્ટર્બન્સને કારણે વાતાવરણ પલટાશે, ઉત્તર ગુજરાત અને કચ્છમાં વરસાદની વધુ શક્યતા

March 31, 2026 | 15:03 IST