ગુજરાતમાં ભારે વરસાદની આગાહી, મહેસાણાથી પાટણ અને પોરબંદરથી મહીસાગર સુધી મેઘરાજાની જમાવટ

હાલની સિઝનમાં ગુજરાત રાજ્યમાં વરસાદી માહોલ જામતો દેખાઈ રહ્યો છે. હવામાન વિભાગે જણાવ્યું કે, રાજ્યના મોટાભાગના વિસ્તારોમાં આજે ભારે વરસાદની આગાહી છે. સમગ્ર રાજ્યમાં મોનસૂન ટ્રફ અને સાયકલોનિક સર્ક્યુલેશન સિસ્ટમ સક્રિય થઈ હોવાથી વિવિધ જિલ્લાઓમાં ભારેથી અતિભારે વરસાદની શક્યતા છે. ખાસ કરીને ઉત્તર ગુજરાતના પાટણ, મહેસાણા, બનાસકાંઠા, સાબરકાંઠા, અરવલ્લી, ગાંધીનગર અને દક્ષિણ ગુજરાતના નવસારી, વલસાડ અને દમણ વિસ્તારમાં વરસાદની આગાહી કરવામાં આવી છે. આ ઉપરાંત મધ્ય ગુજરાતના અમદાવાદ, આણંદ, દાહોદ, મહીસાગર, પંચમહાલ, છોટાઉદેપુર, નર્મદા, વડોદરા જેવી જગ્યાઓ પર પણ વરસાદ પડશે.

હવામાન વિભાગે ઉત્તર ગુજરાતના કેટલાક વિસ્તારોમાં રેડ એલર્ટ જાહેર કર્યું છે જેમાં પાટણ, મહેસાણા, અરવલ્લી, સાબરકાંઠા, છોટાઉદેપુર, ભરૂચ, નર્મદા અને વડોદરા સહિતના જિલ્લાઓનો સમાવેશ થાય છે. આ વિસ્તારમાં ભારેથી અતિભારે વરસાદની શકયતા જણાઈ રહી છે. બીજી તરફ ઓરેન્જ એલર્ટ ધરાવતા વિસ્તારોમાં ગાંધીનગર, ખેડા, નડિયાદ, દાહોદ, આણંદ, મહીસાગર, પંચમહાલ, સુરેન્દ્રનગર, જામનગર, પોરબંદર, દ્વારકા, ગીર સોમનાથ, જૂનાગઢ, બોટાદ, સુરત, વલસાડ, નવસારી, ડાંગ, તાપી, દમણ અને દાદરા નગર હવેલીનો સમાવેશ થાય છે, જ્યાં પણ મુસળાધાર વરસાદ પડી શકે છે.

કચ્છ અને મોરબીમાં યલો એલર્ટ જાહેર કરવામાં આવ્યું છે, જેમાં સામાન્યથી વધારે વરસાદ અને તીવ્ર પવનની શક્યતા વ્યક્ત કરાઈ રહી છે. દરિયાઈ વિસ્તારોમાં પવનની ઝડપ વધારે રહેશે તેથી માછીમારોને આગામી 2 દિવસ દરિયો ન ખેડવાની સલાહ આપવામાં આવી છે. રાજસ્થાન તરફથી પવનની દિશામાં ફેરફાર થવાના કારણે રાજ્યના વધુ વિસ્તારોમાં વરસાદનું જોર વધશે. ખાસ કરીને સાબરકાંઠા, અરવલ્લી અને મહીસાગર જિલ્લામાં આજે ભારે વરસાદની આગાહી છે.