રુઆબ બતાવવા હથિયાર ખરિદનારા ચેતી જજો: હર્ષ સંઘવીની ચેતવણી

ગુજરાત સરકારે હથિયાર લાઇસન્સના દુરુપયોગ અને વ્યાજખોરી જેવા ગંભીર મુદ્દાઓ સામે કડક પગલાં લેવાની શરૂઆત કરી છે. રાજ્યના ગૃહમંત્રી હર્ષ સંઘવીએ આ અંગે વિગતો આપતાં જણાવ્યું હતું કે, રાજ્યભરમાં એવા લોકોના હથિયાર લાઇસન્સ રદ કરવાની કાર્યવાહી શરૂ કરાઈ છે, જેઓ યોગ્ય કારણ વિના લાઇસન્સ મેળવી તેનો ઉપયોગ માત્ર પ્રભાવ બતાવવા, સોશિયલ મીડિયા પર રીલ્સ કે વીડિયો બનાવવા માટે કરે છે. આ સાથે, વ્યાજખોરીના ધંધા સામે દેશના ઇતિહાસમાં પ્રથમવાર સૌથી મોટું સ્ટ્રાઈક ઓપરેશન પણ હાથ ધરવામાં આવ્યું છે.   હથિયાર લાઇસન્સના દુરુપયોગ પર લગામ   હર્ષ સંઘવીએ જણાવ્યું કે, રાજ્ય સરકારની નીતિ સ્પષ્ટ છે - જે લોકો બિનજરૂરી રીતે ગન લાઇસન્સ ધરાવે છે અથવા તેનો ગેરઉપયોગ કરે છે, તેમની સામે કડક કાર્યવાહી કરવામાં આવશે. કેટલાક લોકો સોશિયલ મીડિયા પર પોતાની છબી ઊભી કરવા, રીલ્સ બનાવવા કે જાહેરમાં હથિયાર બતાવી વટ બતાવવા માટે લાઇસન્સનો દુરુપયોગ કરે છે. આવા લોકોના લાઇસન્સની ચકાસણી ઝડપથી કરવામાં આવી રહી છે, અને લાઇસન્સ રદ કરવાની પ્રક્રિયા શરૂ થઈ ગઈ છે.   આ ઉપરાંત, જે લોકો ગુનાહિત પ્રવૃત્તિઓમાં સંડોવાયેલા હોય અથવા ગેરકાયદેસર રીતે હથિયારનો પ્રચાર કરે, તેમની સામે ગુનાઓ દાખલ કરી કાર્યવાહી શરૂ કરવામાં આવશે. આ પગલાંથી રાજ્યમાં હથિયારોના દુરુપયોગને અંકુશમાં લેવાનો પ્રયાસ કરવામાં આવી રહ્યો છે.   વ્યાજખોરી સામે ઐતિહાસિક કાર્યવાહી   વ્યાજખોરીના ધંધા સામે ગુજરાત સરકારે દેશના ઇતિહાસમાં પ્રથમવાર મોટા પાયે કાર્યવાહી શરૂ કરી છે. મુખ્યમંત્રી ભૂપેન્દ્ર પટેલના માર્ગદર્શન હેઠળ ચાલતા આ અભિયાનમાં હજારો નાગરિકોને ન્યાય અપાયો છે, જેઓ વ્યાજખોરોના હાથે પોતાનું સોનું, ઘર કે મંગળસૂત્ર જેવી કિંમતી વસ્તુઓ ગીરવે રાખવા મજબૂર બન્યા હતા. આ નાગરિકોને તેમની મિલકત પાછી અપાવવા માટે રાજ્ય સરકારે મક્કમ પગલાં લીધા છે.   વ્યાજખોરોએ વ્યાજના ધંધાથી ઉભી કરેલી મિલકતો પોલીસ દ્વારા જપ્ત કરવામાં આવી રહી છે. આ મિલકતોની હરાજી કરી, તેમાંથી મળેલી રકમ રાજ્યના લોકોના લાભ માટે વપરાશે. આ પ્રકારની પહેલ ગુજરાતમાં જ નહીં, પરંતુ સમગ્ર દેશમાં પ્રથમવાર થઈ રહી છે, જે એક ઐતિહાસિક પગલું છે.   ગાંધીધામ પોલીસની પ્રશંસનીય કામગીરી હર્ષ સંઘવીએ ગાંધીધામ પોલીસની કામગીરીની ખાસ પ્રશંસા કરી હતી. તેમણે જણાવ્યું કે, ગાંધીધામ પોલીસે આ અભિયાનની શરૂઆતમાં દાખલ કરેલી પ્રથમ ઘટના એક મહત્વપૂર્ણ પગલું છે. આ પહેલો પ્રયાસ હોવા છતાં, આ અભિયાન હવે સમગ્ર રાજ્યમાં વધુ વેગથી આગળ ધપાવવામાં આવશે. ગાંધીધામ પોલીસને અભિનંદન આપતાં તેમણે આશા વ્યક્ત કરી કે આ કાર્યવાહી રાજ્યભરમાં નવો દાખલો સ્થાપશે.   ગુજરાત સરકારની આ કડક કાર્યવાહીઓ રાજ્યમાં કાયદો અને વ્યવસ્થા જાળવવા તેમજ નાગરિકોને ન્યાય અપાવવાના હેતુથી લેવામાં આવી રહી છે. હથિયાર લાઇસન્સના દુરુપયોગને રોકવા અને વ્યાજખોરીના ધંધાને નાથવાની આ પહેલ રાજ્યના લોકો માટે આશાનું કિરણ બની રહેશે. આ અભિયાનને વધુ મજબૂત બનાવવા રાજ્ય સરકાર અને પોલીસ તંત્ર સતત પ્રયાસો કરી રહ્યાં છે, જેનાથી ગુજરાતમાં ન્યાય અને સુરક્ષાનું વાતાવરણ વધુ મજબૂત થશે.