રાજ્યના વાતાવરણમાં મોટો પલટો

Gujarat Weather Updates: ગુજરાતમાં હાલ હવામાનના બે વિરોધાભાસી ચિત્રો જોવા મળી રહ્યા છે. આજે, 5 મેના રોજ વહેલી સવારથી રાજ્યના વાતાવરણમાં મોટો પલટો આવ્યો છે. એક તરફ ઉત્તર અને પૂર્વ ગુજરાતના કેટલાક જિલ્લાઓમાં કમોસમી વરસાદી ઝાપટાં પડ્યા છે, જ્યારે બીજી તરફ અમદાવાદ સહિતના મહાનગરોમાં અસહ્ય ગરમી અને બફારાનો પ્રકોપ યથાવત રહ્યો છે. હવામાન વિભાગે આગામી દિવસોમાં ગરમી વધવાની આશંકા સાથે અમદાવાદમાં 'યલો એલર્ટ' જાહેર કર્યું છે.

ઉત્તર અને પૂર્વ ગુજરાતમાં વહેલી સવારથી મેઘમહેર
આજે સવારથી જ મહીસાગર, દાહોદ અને અરવલ્લી જિલ્લાના વાતાવરણમાં અચાનક પલટો આવ્યો હતો. ભર ઉનાળે આકાશમાં કાળા ડિબાંગ વાદળો ઘેરાયા હતા અને ગાજવીજ સાથે વરસાદી ઝાપટાં શરૂ થયા હતા. મહીસાગર જિલ્લાના કડાણા તાલુકામાં ગુજરાત-રાજસ્થાન સરહદ પર આવેલા ગામોમાં પ્રિ-મોન્સુન એક્ટિવિટીના ભાગરૂપે વરસાદ વરસ્યો હતો. ખાસ કરીને ગોધર ઉત્તર, જોગણ, રાકાકોટ અને સરસવા ડીટવાસ જેવા વિસ્તારોમાં વરસાદી માહોલ જામ્યો હતો, જેનાથી વાતાવરણમાં ઠંડક પ્રસરી હતી. દાહોદ જિલ્લામાં લાંબા સમય બાદ ફરી એકવાર માવઠું થતાં રસ્તાઓ પર પાણી ફરી વળ્યા હતા. કમોસમી વરસાદને કારણે તાપમાનમાં ઘટાડો નોંધાયો છે અને લોકોને ભીષણ ગરમીમાંથી કામચલાઉ રાહત મળી છે. અરવલ્લીના મોડાસા, માલપુર, મેઘરજ અને શામળાજી પંથકમાં પવન સાથે વરસાદ ખાબક્યો હતો. અસહ્ય ઉકળાટ બાદ વરસાદ થતાં લોકોએ રાહત અનુભવી હતી, પરંતુ ખેડૂતો માટે આ વરસાદ ચિંતા લઈને આવ્યો છે. ખેતરોમાં ઉભેલા મકાઈ, બાજરી અને ઘાસચારાના પાકને નુકસાન થવાની ભીતિ સેવાઈ રહી છે.

અમદાવાદમાં 42 ડિગ્રીની આગાહી સાથે 6 દિવસનું યલો એલર્ટ
જ્યારે સરહદી વિસ્તારોમાં વરસાદ વરસી રહ્યો છે, ત્યારે અમદાવાદ, રાજકોટ અને ગાંધીનગર જેવા શહેરોમાં ગરમીનું જોર ઘટવાનું નામ લેતું નથી. હવામાન વિભાગના જણાવ્યા અનુસાર, છેલ્લા 24 કલાકમાં તાપમાનમાં 1 થી 2 ડિગ્રીનો નજીવો ઘટાડો થયો હોવા છતાં, ગરમીનો પારો હજુ પણ 40 ડિગ્રીની આસપાસ ભમરી રહ્યો છે. અમદાવાદ મ્યુનિસિપલ કોર્પોરેશન અને હવામાન વિભાગ દ્વારા આગામી 6 દિવસ માટે શહેરમાં 'યલો એલર્ટ' જાહેર કરવામાં આવ્યું છે. મહત્તમ તાપમાન 42 ડિગ્રી સુધી પહોંચવાની શક્યતા છે. સાયક્લોનિક સર્ક્યુલેશનની અસરને કારણે પવનની દિશા બદલાઈ છે, જેના લીધે ગરમીમાં આંશિક ઘટાડો તો થયો છે, પરંતુ ઉકળાટ અને બફારો હજુ પણ નાગરિકોને પરેશાન કરી રહ્યો છે.

ત્રણ-ત્રણ સિસ્ટમ સક્રિય, છતાં 10 દિવસ વાતાવરણ સૂકું રહેશે
હવામાન વિભાગના જણાવ્યા મુજબ, હાલમાં રાજ્યની આસપાસ ત્રણ જેટલી સાયક્લોનિક સર્ક્યુલેશન સિસ્ટમ સક્રિય છે. તેમાંથી એક સિસ્ટમ રાજસ્થાન અને ગુજરાત ઉપરથી પસાર થઈ રહી છે. આ સિસ્ટમોને કારણે પવનની દિશામાં સતત બદલાવ આવી રહ્યો છે, જે વાતાવરણમાં અચાનક પલટા માટે જવાબદાર છે. જોકે, આ રાહત લાંબો સમય ટકશે નહીં. હવામાન વિભાગની આગાહી મુજબ, આગામી 10 મે સુધી રાજ્યમાં મોટાભાગે વાતાવરણ સૂકું રહેશે. વેસ્ટર્ન ડિસ્ટર્બન્સની અસરને કારણે હવામાં ભેજનું પ્રમાણ વધશે, જેના કારણે બફારો અસહ્ય બની શકે છે. ખાસ કરીને દરિયાકાંઠાના વિસ્તારોમાં રહેતા લોકોએ વધુ ઉકળાટ સહન કરવો પડશે.

દરિયાકાંઠાના વિસ્તારોમાં હીટવેવની ચેતવણી
આગામી 6 અને 7 મે દરમિયાન સૌરાષ્ટ્ર-કચ્છ તેમજ દક્ષિણ ગુજરાતના દરિયાકાંઠાના વિસ્તારોમાં ગરમ અને ભેજવાળી હવા ફૂંકાવાનું અનુમાન છે. આ દિવસોમાં હીટવેવની સ્થિતિ સર્જાઈ શકે છે. ત્યારબાદ 9 અને 10 મેના રોજ પણ રાજ્યના વિવિધ ભાગોમાં ગરમ અને ભેજવાળું વાતાવરણ યથાવત રહેશે. હવામાન વિભાગે જણાવ્યું છે કે આગામી સાત દિવસ સુધી તાપમાનમાં કોઈ મોટો મોટો ફેરફાર જોવા મળશે નહીં, એટલે કે ગરમીનો પ્રકોપ ચાલુ રહેશે.

ખેડૂતોમાં નુકસાનીની ચિંતા
ભર ઉનાળે આવેલા આ કમોસમી વરસાદે ખેડૂતોની ચિંતામાં વધારો કર્યો છે. ઉનાળુ પાક જેવા કે મકાઈ અને બાજરી જે હાલ લણણીના આરે છે અથવા ખેતરમાં ઉભા છે, તેને પવન અને વરસાદથી નુકસાન થઈ શકે છે. ઘાસચારો પલળી જવાથી પશુપાલકોને પણ મુશ્કેલીનો સામનો કરવો પડી રહ્યો છે. આમ, ગુજરાતમાં હાલમાં કુદરતના બે અલગ સ્વરૂપ જોવા મળી રહ્યા છે. એક તરફ માવઠું ઠંડક પ્રસરાવી રહ્યું છે, તો બીજી તરફ હીટવેવ અને યલો એલર્ટ ગરમીના આગામી રાઉન્ડ માટે સાવચેત કરી રહ્યા છે. આરોગ્ય વિભાગ દ્વારા પણ નાગરિકોને બપોરના સમયે સીધા સૂર્યપ્રકાશથી બચવા અને વધુ પ્રમાણમાં પ્રવાહી લેવાની સલાહ આપવામાં આવી છે.