સમગ્ર રાજ્ય માટે 24 કલાકની 'થંડરસ્ટોર્મ વોર્નિંગ'

Gujarat Rain Alert: ગુજરાતમાં ચોમાસાના સત્તાવાર આગમન પૂર્વે જ હવામાનમાં મોટો પલટો આવ્યો છે. છેલ્લા 3 દિવસથી રાજ્યના વિવિધ ભાગોમાં ભારે પવન, ગાજવીજ અને કરા સાથે પ્રી-મોન્સૂન વરસાદ વરસી રહ્યો છે. આ કવખતના વરસાદ અને વાવાઝોડાએ રાજ્યના અનેક વિસ્તારોમાં ભારે તારાજી સર્જી છે. હવામાન વિભાગના જણાવ્યા અનુસાર, આગામી દિવસોમાં દક્ષિણ-પશ્ચિમ ચોમાસું આગળ વધવા માટે સાનુકૂળ પરિસ્થિતિઓ સર્જાઈ રહી છે, જેના કારણે સમગ્ર રાજ્યમાં વાતાવરણ પ્રભાવિત રહેશે.

વીજળી પડતાં મોત 
છેલ્લા 24 કલાકમાં સાબરકાંઠા અને મહીસાગર જિલ્લામાં કુદરતનો પ્રકોપ જોવા મળ્યો છે. સાબરકાંઠા જિલ્લાના પોશીના અને વિજયનગર તાલુકામાં તીવ્ર પવન અને કરા સાથે વરસાદ તૂટી પડ્યો હતો. આ દરમિયાન પોશીનાના દાંતિયા ગામે એક અત્યંત કરુણ ઘટના ઘટી હતી, જેમાં અચાનક વીજળી પડવાના કારણે 17 વર્ષીય કિશોર વિક્રમ માલાભાઈ તરારનું ઘટનાસ્થળે જ મોત નીપજ્યું હતું.

વાવાઝોડાથી વ્યાપક નુકસાન
બીજી તરફ, મહીસાગર જિલ્લાના કડાણા તાલુકામાં સાંજના સમયે અચાનક ધસી આવેલા ભીષણ વાવાઝોડાએ ગ્રામ્ય વિસ્તારોને બાનમાં લીધા હતા. તીવ્ર પવનના કારણે અનેક કાચા મકાનોના પતરા અને છાપરા હવામાં ઉડી ગયા હતા. ગ્રામીણ વિસ્તારોમાં સેંકડો વૃક્ષો અને વીજપોલ ધરાશાયી થઈ જતાં વીજ પુરવઠો ખોરવાયો છે અને જનજીવન અસ્તવ્યસ્ત બન્યું છે. વાવાઝોડાની તીવ્રતા એટલી વધારે હતી કે રસ્તા પર ઉભેલા વાહનો પણ પલટી ખાઈ ગયા હતા.

ગરમીનો પારો ફરી ઊંચકાયો
વાવાઝોડા અને વરસાદી માહોલ વચ્ચે રાજ્યમાં ગરમીના પારામાં આશ્ચર્યજનક ઉછાળો જોવા મળ્યો છે. માત્ર 24 કલાકના ગાળામાં જ રાજ્યના મહત્તમ તાપમાનમાં 3°C સુધીનો વધારો ઝીંકાયો છે. સૌથી મોટો ફેરફાર ડીસામાં નોંધાયો છે, જ્યાં તાપમાન 36.8°C થી એકાએક 3.9°C વધીને 40.7°C પર પહોંચી ગયું છે. તેવી જ રીતે ગાંધીનગરમાં તાપમાન 36.2°C થી વધીને 39.6°C (3.4°C નો વધારો) અને અમદાવાદમાં 37.0°C થી વધીને 40.2°C (3.2°C નો વધારો) નોંધાયું છે.

રાજકોટ 42.9°C સાથે સૌથી ગરમ
સૌરાષ્ટ્રના આંતરિક ભાગો પણ અગનભઠ્ઠી બન્યા છે. રાજકોટમાં તાપમાન 2.2°C ના વધારા સાથે 42.9°C એ પહોંચી ગયું છે, જે સમગ્ર રાજ્યનું સૌથી ઊંચું તાપમાન હતું. અમરેલીમાં તાપમાન 41.7°C અને ભાવનગરમાં 38.9°C નોંધાયું છે. મધ્ય ગુજરાતના વડોદરામાં તાપમાન 38.2°C નોંધાયું છે. જ્યારે દરિયાકાંઠાના વિસ્તારોની વાત કરીએ તો દ્વારકામાં 35.2°C, સુરતમાં 35.6°C અને કંડલા એરપોર્ટ પર 41.2°C તાપમાન નોંધાયું છે.

સમગ્ર ગુજરાત માટે 24 કલાકની 'થંડરસ્ટોર્મ વોર્નિંગ'
ભારતીય હવામાન વિભાગ (IMD) દ્વારા આગામી 24 કલાક માટે સમગ્ર ગુજરાતમાં 'થંડરસ્ટોર્મ વોર્નિંગ' એટલે કે વાવાઝોડા અને વીજળીના કડાકા-ભડાકા સાથે વરસાદની કડક ચેતવણી જારી કરવામાં આવી છે. આ સમયગાળા દરમિયાન સમગ્ર રાજ્યમાં ધૂળની ડમરીઓ ઉડશે અને 40 થી 50 કિલોમીટર પ્રતિ કલાકની પ્રચંડ ઝડપે પવન ફૂંકાશે. અમદાવાદ, ગાંધીનગર, વડોદરા, સુરત, બનાસકાંઠા, પાટણ, મહેસાણા, સાબરકાંઠા, અરવલ્લી, ખેડા, આણંદ, પંચમહાલ, દાહોદ, મહીસાગર, છોટાઉદેપુર, નર્મદા, ભરૂચ, ડાંગ, નવસારી, વલસાડ, તાપી તેમજ દમણ અને દાદરા નગર હવેલીમાં ગાજવીજ સાથે વરસાદની સંભાવના છે. સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા, ગીર સોમનાથ, બોટાદ, કચ્છ અને દીવમાં પણ છૂટાછવાયા સ્થળોએ વરસાદી ઝાપટાં પડશે. અમદાવાદમાં મુખ્યત્વે વાદળછાયું વાતાવરણ રહેશે અને સાંજના સમયે ગાજવીજ સાથે હળવાથી મધ્યમ વરસાદના 1 થી 2 સ્પેલ થવાની સંભાવના છે.

આગામી 3 દિવસ તાપમાન ઘટશે
હવામાન વિભાગની અદ્યતન આગાહી મુજબ, આગામી 3 દિવસ દરમિયાન રાજ્યના મહત્તમ તાપમાનમાં 2 થી 3°C નો ક્રમશઃ ઘટાડો થતાં લોકોને ગરમીથી થોડી રાહત મળશે. જોકે, આ 3 દિવસ બાદ ફરીથી તાપમાનમાં 2 થી 3°C નો ધીમો વધારો થઈ શકે છે.

દેશના 24 રાજ્યોમાં એલર્ટ
રાષ્ટ્રીય સ્તરે, હવામાન વિભાગે ગુજરાત, ઓડિશા, રાજસ્થાન, ઉત્તરાખંડ, હિમાચલ પ્રદેશ, દિલ્હી અને તેલંગાણા સહિત દેશના 24 રાજ્યોમાં આગામી થોડા દિવસો સુધી ભારે વરસાદ અને વાવાઝોડાનું એલર્ટ જાહેર કર્યું છે. દક્ષિણ-પશ્ચિમ ચોમાસાના પવનો આજે સાંજે 7:00 થી 8:00 વાગ્યાની વચ્ચે કેરળમાં પ્રવેશી શકે છે, જેના માટે સાનુકૂળ વાતાવરણ સર્જાઈ ગયું છે. કેરળ ઉપરાંત તમિલનાડુ અને કર્ણાટકમાં આગામી 7 દિવસ સુધી ભારેથી અતિભારે વરસાદની સંભાવના વ્યક્ત કરવામાં આવી છે.

4 થી 10 જૂન સુધીનું સાપ્તાહિક હવામાન
હવામાન વિભાગે આગામી એક સપ્તાહ માટે જિલ્લાવાર વિસ્તૃત રોડમેપ જાહેર કર્યો છે:
4 થી 5 જૂન: ઉત્તર ગુજરાતના અરવલ્લી, પંચમહાલ, દાહોદ અને મહીસાગર જિલ્લામાં તેમજ સમગ્ર દક્ષિણ ગુજરાતના તમામ ભાગોમાં વરસાદ ચાલુ રહેશે. સૌરાષ્ટ્રના અમરેલી, ભાવનગર, ગીર સોમનાથ અને દીવમાં પણ 40 થી 50 કિમીની ઝડપે પવન સાથે વરસાદી માહોલ રહેશે, જ્યારે બાકીના વિસ્તારોમાં હવામાન સૂકું થઈ જશે.
5 થી 10 જૂન: આ સમયગાળા દરમિયાન ઉત્તર ગુજરાત અને સૌરાષ્ટ્રના મોટાભાગના વિસ્તારોમાં વરસાદ રોકાઈ જશે અને વાતાવરણ સૂકું બનશે. જોકે, દક્ષિણ ગુજરાતના સુરત, ડાંગ, નવસારી, વલસાડ, તાપી અને સૌરાષ્ટ્રના દરિયાકાંઠાના વિસ્તારોમાં હળવો વરસાદ સતત ચાલુ રહેશે.

તંત્ર દ્વારા નાગરિકો અને ખેડૂતો માટે મહત્વની એડવાઈઝરી
હવામાનની આ પ્રતિકૂળ પરિસ્થિતિને ધ્યાનમાં રાખીને સ્થાનિક વહીવટી તંત્ર અને હવામાન વિભાગ દ્વારા નાગરિકો તથા ખેડૂતો માટે ખાસ સૂચનાઓ જાહેર કરવામાં આવી છે. વાવાઝોડું અને વીજળીના કડાકા થતા હોય તેવા સમયે કોઈ પણ નાગરિકે મોટા વૃક્ષો, વીજળીના થાંભલા કે નબળા કાચા મકાનોની નીચે આશ્રય ન લેવો. ખેડૂતોને પણ પોતાના પાક અને પશુઓને સલામત સ્થળે ખસેડી લેવા તથા પવન દરમિયાન બિનજરૂરી બહાર ન નીકળવા અપીલ કરવામાં આવી છે.