ગુજરાત યુનિવર્સિટી શરૂ કરશે મેડિકલ કોલેજ, હોસ્પિટલ અને હોટેલ મેનેજમેન્ટ ઇન્સ્ટિટ્યૂટ શરૂ કરવાની યોજના

ગુજરાત યુનિવર્સિટીમાં મંગળવાર, 20 જૂને બોર્ડ ઓફ મેનેજમેન્ટ અને એક્ઝીક્યુટીવ કાઉન્સિલની સંયુક્ત બેઠક યોજાઈ હતી. જેમાં યુનિવર્સિટીના વિકાસ માટે મહત્વપૂર્ણ નિર્ણયો લેવામાં આવ્યા. ખાસ કરીને નવી મેડિકલ કોલેજ અને 300 બેડની હોસ્પિટલ શરૂ કરવા અંગે સૈદ્ધાંતિક મંજૂરી આપવામાં આવી છે.

મેડિકલ કોલેજ અને હોસ્પિટલ

યુનિવર્સિટીના GMDC પાસે આવેલા ગ્રાઉન્ડના અંદાજે 25થી 35 ટકા વિસ્તારમાં આ મેડિકલ કોલેજ અને હોસ્પિટલ સ્થાપવામાં આવશે. શરૂઆતમાં જમીન માપણી કરીને સરકાર સમક્ષ મંજૂરી માટે દરખાસ્ત મોકલાશે. ત્યારબાદ મેડિકલ કમિશન સમક્ષ 100 બેઠકો માટે મેડિકલ કોલેજ શરૂ કરવાની મંજૂરી માંગવામાં આવશે. હોસ્પિટલ NHL મોડલ મુજબ, પ્રાઈવેટલી મેનેજડ મોડલ તરીકે ચલાવાશે. તેમજ અહીં હેલીપેડ પણ બનશે જેથી એર એમ્બ્યુલન્સની પણ સુવિધા ઉપલબ્ધ બને.

હોટેલ અને હોટેલ મેનેજમેન્ટ ઇન્સ્ટિટ્યૂટ

યુનિવર્સિટી પાસે આવેલા અંધજન મંડળ પાસેના પ્લોટ પર ફાઈવ સ્ટાર હોટેલ શરૂ કરવાની પણ યોજના છે. આ સાથે જ, હોટેલ મેનેજમેન્ટ માટે વિશિષ્ટ ઇન્સ્ટિટ્યૂટ પણ શરૂ કરાશે અને તેમાં હોટેલ મેનેજમેન્ટના કોર્સીસનો સંચાલન થશે.

રિસર્ચ પાર્કને મળશે નવી ઓળખ

યુનિવર્સિટીના રિસર્ચ પાર્કનું નામ હવે 'વિદ્યાગૌરી નિલકંઠ રિસર્ચ પાર્ક' રાખવામાં આવશે. નોંધનીય છે કે, મેડિકલ કોલેજના નિર્ણયો વખતે મેડિકલ ફેકલ્ટીના કેટલાક સભ્યો ગેરહાજર રહ્યા હતા.