ગુજરાત પોલીસની સાયબર ક્રાઇમ વિરુદ્ધ મોટી કાર્યવાહી, 15 દિવસમાં ઉકેલાયા 12 મહત્વના કેસ

ગુજરાત પોલીસ દ્વારા સાયબર ક્રાઇમ સામેની લડાઈમાં મહત્વપૂર્ણ સફળતા હાંસલ કરવામાં આવી છે. ગુજરાત પોલીસ છેલ્લા 15 દિવસમાં રાજ્યના વિવિધ શહેરોમાં 12 મોટા સાયબર ગુનાઓ ઉકેલ્યા છે, જેમાં ચાઇનીઝ સાયબર ગેંગ અને ડિજિટલ એરેસ્ટ જેવી ઘટનાઓનો સમાવેશ થાય છે. સાયબર ક્રાઇમ સમગ્ર વિશ્વમાં એક પડકારરૂપ બની રહ્યો છે ત્યારે દેશમાં કેન્દ્રીય ગૃહ મંત્રી અમિત શાહના નેતૃત્વમાં ટેક્નોલોજીના મહત્તમ ઉપયોગ સાથે સાયબર ક્રાઇમ અટકાવવા તેમજ સાયબર ક્રાઇમ કરતા ગુનેગારોને પકડવાની કાર્યવાહી થઈ રહી છે.

અમદાવાદ સાયબર ક્રાઇમ બ્રાન્ચની મોટી સફળતા 

અમદાવાદ સાયબર ક્રાઇમ બ્રાન્ચે 16 મે 2025ના રોજ કમ્બોડિયા અને નેપાળથી સંચાલિત ચાઇનીઝ સાયબર ક્રાઇમ ગેંગના 6 સભ્યોને ઝડપી પાડ્યા હતા. આ ગેંગે પ્રણય ભાવસાર નામના વ્યક્તિનું ICICI બેંક ખાતું હેક કરી દીધું હતું. રૂપિયા 48.85 લાખનું ટ્રાન્ઝેક્શન કર્યું હતું. આરોપીઓએ પ્રણયને નેપાળની હોટેલમાં 6 દિવસ ગોંધી રાખી, ડિજિટલ એરેસ્ટ, ઇન્વેસ્ટમેન્ટ ફ્રોડ અને ટેલિગ્રામ ટાસ્ક ફ્રોડ જેવા ગુનાઓ આચર્યા હતા. ટેકનિકલ એનાલિસિસ અને હ્યુમન ઇન્ટેલિજન્સના આધારે આરોપીઓ અમદાવાદ અને સુરતથી પકડાયા હતા. આ ખાતાઓ સામે NCCRP પોર્ટલ પર 200થી વધુ ફરિયાદો નોંધાઈ છે. 

સુરત સાયબર ક્રાઇમ સેલની સફળતા

સુરત સાયબર ક્રાઇમ બ્રાન્ચે દરરોજ દુબઇથી સાયબર ફ્રોડ આચરતી ગેંગના આરોપી અનિલભાઇ ખેનીને સુરત સાયબર ક્રાઇમ સેલે ઝડપ્યો, જેણે POS મશીન દ્વારા દિરહામ ઉપાડી ફ્રોડ કર્યું હતું. 4 મોબાઇલ, 5 ડેબિટ કાર્ડ, 12 સિમકાર્ડ સહિતનો મુદ્દામાલ કબ્જે કર્યો હતો. તે ઉપરાંત ફોરેક્સ ટ્રેડિંગની લોભામણી ઓફર આપી હતી. રૂ.પિયા 9,30,700ની ઠગાઈ કરનાર રાહુલ ચૌધરીને સુરત સાયબર ક્રાઇમ સેલે ઝડપ્યો હતો. તેમણે ઇન્સ્ટાગ્રામ દ્વારા બનાવટી એપમાં રોકાણ કરાવી છેતરપિંડી કરી હતી. સુરતમાં ડિજિટલ એરેસ્ટ દ્વારા રૂ. 14.94 લાખની ઠગાઈ કરનાર જનક ભાલાળા અને ભાવેશ બોરડને ધરપકડ કરવામાં આવી છે.

ગુજરાત પોલીસના ગૃહ રાજ્ય મંત્રી હર્ષ સંઘવી અને મુખ્યમંત્રી ભૂપેન્દ્ર પટેલના માર્ગદર્શન હેઠળ, રાજ્યમાં સાયબર ક્રાઇમ સામે ઝીરો ટોલરન્સની નીતિ અપનાવવામાં આવી છે. આ કામગીરીમાં ટેક્નોલોજી અને તજજ્ઞ અધિકારીઓની ટીમની મદદથી નોંધપાત્ર સફળતા હાંસલ કરી છે. ગુજરાત પોલીસની આ કામગીરી રાજ્યમાં સાયબર ક્રાઇમ સામેની લડાઈમાં એક મહત્વપૂર્ણ પગલું છે, જે અન્ય રાજ્યો માટે પણ પ્રેરણાદાયી છે.