Gujarat Police Mega Operation: કેન્દ્રીય ગૃહમંત્રી અમિત શાહે તાજેતરમાં 28 મે, 2026ના રોજ ગાંધીનગરના સોનીપુર ખાતે આયોજિત એક જનસભામાં દેશભરમાંથી એક-એક ઘૂસણખોરને વીણી-વીણીને બહાર કાઢવાનો પ્રચંડ હુંકાર કર્યો હતો. આ જાહેરાતના ગણતરીના દિવસોમાં જ, એટલે કે 2 જૂનના રોજ ગુજરાત પોલીસ એક્શન મોડમાં આવી ગઈ છે. રાજ્યના ગૃહ વિભાગની સૂચનાથી અમદાવાદ, સુરત, રાજકોટ અને વડોદરા સહિતના મોટા શહેરોમાં ગેરકાયદેસર રીતે વસવાટ કરતા બાંગ્લાદેશી નાગરિકોને ઝડપી પાડવા માટે એક વ્યાપક સર્ચ ઓપરેશન હાથ ધરવામાં આવ્યું હતું. આ સર્ચ ઓપરેશન અને આખી રાત ચાલ્યું હતું.
અમદાવાદમાં 300 શકમંદોની અટકાયત: 166 બાંગ્લાદેશી હોવાની પુષ્ટિ અમદાવાદ શહેર ક્રાઈમ બ્રાન્ચ, સ્પેશિયલ ઓપરેશન ગ્રુપ (SOG) અને સ્થાનિક પોલીસની સંયુક્ત ટીમોએ 2 જૂનની મોડી રાત્રે શહેરના પૂર્વ અને દક્ષિણ વિસ્તારોમાં એકસાથે દરોડા પાડ્યા હતા. આ ઓપરેશન દરમિયાન પોલીસે આશરે 300 જેટલા શંકાસ્પદ લોકોની અટકાયત કરી હતી. ક્રાઈમ બ્રાન્ચ કેમ્પસ ખાતે લાવવામાં આવેલા આ શકમંદોના પ્રાથમિક દસ્તાવેજોની ચકાસણી કરતા 166 લોકો મૂળ બાંગ્લાદેશી નાગરિક હોવાની સત્તાવાર પુષ્ટિ થઈ ચૂકી છે, જ્યારે બાકીના 160 લોકોની ઓળખ અંગે હાલ સઘન પૂછપરછ અને તપાસ ચાલી રહી છે. પોલીસે મુખ્યત્વે ચંડોળા તળાવ, ગુલાબનગર અને દાણીલીમડાના ખોડિયારનગર જેવા સંવેદનશીલ વિસ્તારોમાં આ સર્ચ ઓપરેશન કેન્દ્રિત કર્યું હતું.
ઓળખ બદલીને અલગ-અલગ વિસ્તારોમાં છુપાયા ઘૂસણખોરો પોલીસના ઉચ્ચ સૂત્રો પાસેથી મળતી માહિતી મુજબ, અગાઉ ચંડોળા તળાવ વિસ્તારમાં વારંવાર થયેલી કડક કાર્યવાહીઓને કારણે ગેરકાયદેસર રહેતા બાંગ્લાદેશી નાગરિકોએ હવે પોતાની રણનીતિ બદલી નાખી છે. તેઓ હવે એક જ વસાહતમાં સમૂહમાં રહેવાનું ટાળી રહ્યા છે. આ ઘૂસણખોરો હવે શહેરના વટવા, રામોલ, ઓઢવ, નિકોલ અને નરોડા જેવા વિસ્તારોમાં વેરવિખેર થઈને ભાડાના મકાનો, ઝૂંપડપટ્ટીઓ, સસ્તા મજૂર આવાસ તેમજ હોટલોમાં પોતાની નકલી ઓળખ ઉભી કરીને વસવાટ કરવા લાગ્યા છે. આ આધુનિક ટ્રેન્ડને ધ્યાનમાં રાખીને જ આ વખતે પોલીસે માત્ર ચંડોળા પૂરતું મર્યાદિત ન રહેતા સમગ્ર શહેરમાં એકસાથે દરોડા પાડ્યા હતા.
ઓઢવના સ્પા સેન્ટરમાં ફિલ્મી દ્રશ્યો: બારીમાંથી યુવતીઓ ભાગી સર્ચ ઓપરેશન દરમિયાન ઓઢવ વિસ્તારમાં આવેલા ક્રિસ્ટલ કોમ્પલેક્સમાં એક ચોંકાવનારો કિસ્સો પ્રકાશમાં આવ્યો હતો. એસઓજીની ટીમ જ્યારે ત્યાં કાર્યરત સ્પા સેન્ટરોમાં તપાસ માટે પહોંચી ત્યારે પોલીસને જોઈને એક સ્પા સંચાલક બહારથી તાળું મારીને નાસી છૂટ્યો હતો. સ્પાની અંદર બાંગ્લાદેશી યુવતીઓ ફસાઈ ગઈ હતી. પોલીસ બહારથી તાળું તોડવાનો પ્રયાસ કરી રહી હતી તે જ સમયે અંદર રહેલી યુવતીઓએ ફિલ્મી સ્ટાઈલમાં સ્પાની બારીમાંથી બહાર કૂદવાનું શરૂ કર્યું હતું. સ્થાનિક લોકોએ તેમને નીચે ઉતરવા માટે સીડી પણ ગોઠવી આપી હતી, જેના કારણે કેટલીક શંકાસ્પદ યુવતીઓ પોલીસ પકડમાં આવે તે પહેલાં જ ભાગી જવામાં સફળ રહી હતી. આ ઉપરાંત, નિકોલ અને ઓઢવ એસ.પી. રિંગ રોડ પર પોલીસે શંકાસ્પદ રાહદારીઓને રોકીને સ્થળ પર જ તેમના આઈડી કાર્ડ અને ઓળખના પુરાવા ચેક કર્યા હતા.
આંગડિયા અને મોબાઈલ એપથી બાંગ્લાદેશ મોકલાતા હતા કરોડો રૂપિયા અમદાવાદના જોઈન્ટ કમિશનર ઓફ પોલીસ (JCP) શરદ સિંઘલે આ મેગા ઓપરેશન અંગે વિગતો આપતા જણાવ્યું હતું કે, ગેરકાયદેસર રીતે વસતા બાંગ્લાદેશીઓમાં મહિલાઓ મોટાભાગે સ્પા સેન્ટરો અને દેહ વ્યાપારની ગેરકાયદેસર પ્રવૃત્તિઓમાં સંડોવાયેલી જોવા મળી છે. પૂછપરછમાં વધુ એક મોટો ખુલાસો એ થયો છે કે આ નાગરિકો અહીં જે પણ કમાણી કરતા, તે નાણાં આંગડિયા નેટવર્ક મારફતે સૌપ્રથમ કોલકાતા મોકલતા હતા અને ત્યાંથી ગેરકાયદેસર ચેનલો દ્વારા બાંગ્લાદેશ ટ્રાન્સફર થતા હતા. આ સિવાય કેટલીક શંકાસ્પદ મોબાઈલ એપ્લિકેશન્સનો ઉપયોગ પણ આંતરરાષ્ટ્રીય મની ટ્રાન્સફર માટે કરવામાં આવતો હોવાનું સાયબર ક્રાઈમની તપાસમાં બહાર આવ્યું છે. ઉલ્લેખનીય છે કે ગત વર્ષે આવા જ એક મોટા ઓપરેશનમાં 465 બાંગ્લાદેશીઓ ભારતીય આધાર કાર્ડ સાથે પકડાયા હતા, જેમના આધારે નકલી દસ્તાવેજો બનાવતા એજન્ટોના નેટવર્ક પર પણ કામ ચાલી રહ્યું છે.
સુરત અને રાજકોટમાં પણ પોલીસની કડક કાર્યવાહી અમદાવાદ ઉપરાંત દક્ષિણ ગુજરાતના આર્થિક પાટનગર સુરતમાં પણ એસઓજી અને ક્રાઈમ બ્રાન્ચની ટીમોએ લિબાયત, પાંડેસરા અને ભાઠેના જેવા શ્રમિક વિસ્તારોમાં મોડી રાત્રે દરોડા પાડીને 50 થી વધુ શંકાસ્પદ વ્યક્તિઓની અટકાયત કરી છે. બીજી તરફ, સૌરાષ્ટ્રના હબ ગણાતા રાજકોટમાં તો પોલીસની 10 અલગ-અલગ ટીમોએ રાત્રિના 1 વાગ્યાથી જ મોરચો સંભાળી લીધો હતો. ગૃહ વિભાગ તરફથી મળેલી ચોક્કસ યાદીના આધારે રાજકોટ પોલીસે 272 બાંગ્લાદેશીઓની અડધી રાત્રે પૂછપરછ હાથ ધરી હતી. પ્રાથમિક તપાસમાં આ લોકો પાસે વર્ક પરમિટ હોવાનું સામે આવ્યું છે, પરંતુ જે લોકો દસ્તાવેજી પુરાવા રજૂ નથી કરી શક્યા તેમની સામે કાયદેસરની તપાસ ચાલુ છે.
રાજકોટમાં 10 મહિનામાં 38 ઘૂસણખોરો ડિપોર્ટ કરાયા રાજકોટ પોલીસના સત્તાવાર આંકડા અનુસાર, 1 જૂન, 2025થી 1 એપ્રિલ, 2026 સુધીના અંદાજે 10 મહિનાના ટૂંકા ગાળામાં જ શહેરમાંથી કુલ 38 ગેરકાયદેસર બાંગ્લાદેશી નાગરિકોને ઝડપીને ભારત સરકારે ડિપોર્ટ (દેશનિકાલ) કર્યા છે, જેમાં 29 મહિલાઓ, 6 પુરુષો અને 3 બાળકોનો સમાવેશ થાય છે. રાજ્ય સરકાર અને પોલીસ પ્રશાસને સ્પષ્ટ સંકેત આપ્યા છે કે રાષ્ટ્રીય સુરક્ષા અને આંતરિક શાંતિને જોખમાવતી આ ઘૂસણખોરી વિરૂદ્ધ આગામી દિવસોમાં પણ આ ઝુંબેશ સખત રીતે ચાલુ રાખવામાં આવશે અને બોગસ ભારતીય દસ્તાવેજો બનાવનારા સ્થાનિક એજન્ટોને પણ જેલના સળિયા પાછળ ધકેલાશે.
35 શંકાસ્પદ વ્યક્તિઓની અટકાયત ગુજરાતમાં ગેરકાયદેસર ઘૂસણખોરો વિરૂદ્ધ ચાલી રહેલી કડક ઝુંબેશના ભાગરૂપે હવે પૂર્વ કચ્છ પોલીસ પણ એક્શન મોડમાં આવી ગઈ છે, જેના અંતર્ગત એલસીબી (LCB), એસઓજી (SOG) અને સ્થાનિક પોલીસની સંયુક્ત ટીમો દ્વારા 'ઓપરેશન બાંગ્લાદેશી' અંતર્ગત એક ખાસ ડ્રાઈવ યોજવામાં આવી હતી. આ ઓપરેશન દરમિયાન પોલીસ કાફલાએ પૂર્વ કચ્છના ગાંધીધામ, અંજાર, ભચાઉ અને રાપર જેવા મુખ્ય વિસ્તારોમાં આવેલી વિભિન્ન ઔદ્યોગિક કંપનીઓ, શ્રમિકોની ઝૂંપડપટ્ટીઓ તથા શંકાસ્પદ આશ્રયસ્થાનો પર એકસાથે આકસ્મિક ચેકિંગ હાથ ધર્યું હતું. રાઉન્ડ-ધ-ક્લોક ચાલેલી આ સઘન તપાસ દરમિયાન પોલીસે અલગ-અલગ સ્થળોએથી અંદાજે 35 જેટલા શંકાસ્પદ વ્યક્તિઓની અટકાયત કરી છે અને તેમના આધાર કાર્ડ સહિતના તમામ ઓળખ પત્રો તેમજ દસ્તાવેજોની ઝીણવટભરી ચકાસણી સાથે સઘન પૂછપરછ શરૂ કરી દીધી છે, તેમજ પુરતા દસ્તાવેજો ન ધરાવતા કે ગેરકાયદેસર રીતે વસવાટ કરતા તમામ બાંગ્લાદેશી નાગરિકો સામે કાયદાકીય જોગવાઈઓ હેઠળ કડક કાનૂની કાર્યવાહી કરવાની પક્ષે નેમ દર્શાવી છે.
વડોદરામાં 200 થી વધુ બાંગ્લાદેશીઓ હોવાની આશંકા રાજ્યવ્યાપી ડ્રાઈવ અંતર્ગત વડોદરા શહેર અને જિલ્લા પોલીસ દ્વારા પણ મોડી રાત્રે ગેરકાયદેસર વસવાટ કરતા બાંગ્લાદેશી નાગરિકોને ઝડપી પાડવા માટે એક સઘન સર્ચ ઓપરેશન શરૂ કરવામાં આવ્યું છે. આ ઓપરેશન અંતર્ગત વિવિધ પોલીસ મથકો દ્વારા શંકાસ્પદ વિસ્તારોમાં દરોડા પાડીને અનેક લોકોની અટકાયત સાથે પૂછપરછનો દોર શરૂ કરી દેવાયો છે, જેમાં વડોદરામાં 200 થી વધુ બાંગ્લાદેશીઓ હોવાની આશંકા સાથે હાલ તમામ પકડાયેલા શંકાસ્પદ વ્યક્તિઓના ઓળખ પત્રો અને આધાર-પુરાવાઓની ઝીણવટભરી તપાસ ચાલી રહી છે.

અમદાવાદ, ગાંધીનગર, સુરત, રાજકોટ, વડોદરા અને કચ્છમાં દરોડા, સેંકડો શકમંદોની અટકાયત

June 3, 2026 | 12:18 IST