ગુજરાત પોલીસ ચમરબંધીને પણ છોડતી નથી પણ ભાજપના દુષ્કર્મના આરોપી ધારાસભ્ય 3 મહિનાથી પકડાતા નથી

રાજ્યના પૂર્વ મંત્રી અને પ્રાંતિજના ભાજપના ધારાસભ્ય ગજેન્દ્રસિંહ પરમાર સામે દુષ્કર્મ કેસમાં કોઇ જ કાર્યવાહી ના થતાં આખરે પીડિતાએ ફરીથી ગુજરાત હાઇકોર્ટમાં અરજી કરી છે. હાઇકોર્ટની સુચના પછી ગુનો નોંધાયો હોવા છતાં પોલીસ ફરાર ધારાસભ્યને હજું શોધી શકી નથી.

આમ તો ગુજરાત પોલસ સક્ષમ છે. તે કોઇની શેહશરમ રાખતી નથી. આરોપીઓને પકડી લે છે અને સમાજમાં દાખલો બેસાડે તે માટે આરોપીના સરઘસ પણ કાઢે છે. ગુજરાત પોલીસ કોઇ ચમરબંધીને છોડતી નથી પણ દુષ્કર્મ કેસના આરોપી ભાજપના ધારાસભ્ય ગજેન્દ્રસિંહ પરમાર ત્રણ મહિનાથી ફરાર હોવા છતાં પોલીસ તેમને પકડી શકી નથી. બની શકે કે પોલીસને તેની ભાળ મળતી ના હોય...પણ ગુજરાત પોલીસની સક્ષમતા જોતાં એ વાત ગળે ઊતરતી નથી.

ગત 19 ઓક્ટોબરે પ્રાંતિજના ભાજપના ધારાસભ્ય ગજેન્દ્રસિંહ પરમાર સામે ગાંધીનગર સેક્ટર 21માં આવેલા સદસ્ય નિવાસમાં ભાજપની જ મહિલા કાર્યકર સાથે દુષ્કર્મ કરવાની ફરિયાદ નોંધાઇ હતી અને તે પણ ગુજરાત હાઇકોર્ટના આદેશ બાદ...ત્યારબાદ તપાસ એસસીએસટી સેલના ડીવાયએસપીને સોંપાઇ હતી. તે વખતે હાઇકોર્ટે ટકોર કરી હતી કે આ કેસનો આરોપી ધારાસભ્ય છે તો પોલીસ રાજકીય દબાણમાં આવ્યા વગર તટસ્થતાથી તપાસ કરે પણ ત્રણ મહિના પછી પણ આરોપી ધારાસભ્ય ગજેન્દ્રસિંહની ભાળ મેળવવામાં પોલીસને કોઇ કડી મળી નથી. 

આખરે પીડિત મહિલાએ ગુજરાત હાઇકોર્ટમાં પોલીસ રાજકીય દબાણમાં આવીને કેસની તપાસ ના કરતી હોવા બાબતની અરજી ફરી હાઇકોર્ટ સમક્ષ કરી છે. એ વાત અહીં યાદ અપાવી દઇએ કે ધારાસભ્ય ગજેન્દ્રસિંહ પરમાપ સામે ગાંધીનગરમાં ગુનો નોંધાયો છે તો રાજસ્થાનમાં આબુરોડ અને જોધપુરમાં પણ તેમની સામે ફરિયાદો નોંધાયેલી છે.