કર્મયોગીઓને 'આરોગ્ય કવચ', ગુજરાત સરકારની ₹10 લાખની કેશલેસ સારવાર યોજનાનો પ્રારંભ!

ગુજરાતના લાખો સરકારી અધિકારીઓ, કર્મચારીઓ અને પેન્શનર્સના સ્વાસ્થ્યની સુરક્ષા સુનિશ્ચિત કરવા માટે રાજ્ય સરકારે એક મહત્વપૂર્ણ પહેલ કરી છે. CM ભૂપેન્દ્ર પટેલ અને આરોગ્યમંત્રી ઋષિકેશ પટેલના માર્ગદર્શન હેઠળ "ગુજરાત કર્મયોગી સ્વાસ્થ્ય સુરક્ષા યોજના"નો પ્રારંભ કરવામાં આવ્યો છે, જે અંતર્ગત લાભાર્થીઓને PMJAY યોજના હેઠળ ₹10 લાખ સુધીની કેશલેસ સારવારનો લાભ મળશે.

યોજનાના મુખ્ય લાભાર્થીઓ અને પાત્રતા...

આ યોજનાનો લાભ ઓલ ઇન્ડિયા સર્વિસીસ (AIS)ના અધિકારીઓ, રાજ્ય સરકારના તમામ અધિકારીઓ, કર્મચારીઓ અને પેન્શનર્સને મળશે. યોજનાનો લાભ લેવા માટે, લાભાર્થીઓ પાસે PMJAY નું "G" કેટેગરીનું કાર્ડ હોવું અનિવાર્ય છે, જેનું વિતરણ સ્ટેટ હેલ્થ એજન્સી (SHA) દ્વારા કરવામાં આવશે.

કુટુંબની વ્યાખ્યા અને પ્રમાણપત્રની આવશ્યકતા...

આ યોજનાનો લાભ ગુજરાત રાજ્ય સેવા (તબીબી સારવાર) નિયમો, 2015 અને AIS (Medical Attendance) Rules, 1954 મુજબ "કુટુંબ"ની વ્યાખ્યામાં આવતા આશ્રિત કુટુંબીજનોને પણ મળશે.

પ્રમાણપત્ર અને E-KYC...

લાભ મેળવવા માટે, કર્મચારીઓ જ્યાં કાર્યરત હોય તે કચેરીના વડાએ નિયત નમૂનામાં પ્રમાણપત્ર આપવાનું રહેશે. પેન્શનર્સના કિસ્સામાં, પેન્શન ચૂકવતા જિલ્લા તિજોરી કચેરી/પેન્શન ચૂકવણા કચેરીના અધિકારી અથવા નિવૃત્ત થયા હોય તે કચેરીના વડાએ પ્રમાણપત્ર આપવું પડશે. ઉપરાંત, કુટુંબના દરેક સભ્યનો આધાર નંબર દર્શાવવો પણ ફરજિયાત છે.

લાભ રદ થવાની જોગવાઈઓ...

આ યોજનામાં લાભ રદ થવાની પણ સ્પષ્ટ જોગવાઈઓ છે. જો કોઈ ફિક્સ પગારના કર્મચારીની સેવા સમાપ્ત થાય, કોઈ અધિકારી/કર્મચારી સેવા છોડી દે, રાજીનામું આપે, અથવા શિક્ષાત્મક કાર્યવાહીના અંતે પેન્શનર ન રહે, તો સંબંધિત કચેરીના વડાએ તાત્કાલિક SHA ને જાણ કરવાની રહેશે. આ જાણના આધારે, તેમનું નામ PMJAY માંથી રદ કરવામાં આવશે. આ યોજના રાજ્યના કર્મયોગીઓ અને તેમના પરિવારોને આરોગ્ય સુરક્ષા પૂરી પાડવામાં મહત્વપૂર્ણ ભૂમિકા ભજવશે, અને તેમને મોંઘી તબીબી સારવારના બોજમાંથી મુક્તિ મળશે. શું આ યોજનાનો લાભ રાજ્યના તમામ પાત્રતા ધરાવતા કર્મયોગીઓ સુધી સમયસર પહોંચી શકશે?