સુરત એરપોર્ટ સંબંધિત અરજી ઉપર વહેલી સુનાવણી કરવા ગુજરાત હાઈકોર્ટનો ઈન્કાર

અમદાવાદમાં એર ઈન્ડિયાનું વિમાન ક્રેશ થતાં સુરત એરપોર્ટની આજુબાજુની હાઈરાઈઝ બિલ્ડીંગોના બાંધકામનો મામલો ફરી ગરમાયો છે. સુરતના સામાજિક કાર્યકર વિશ્વાસ બાંભુરકરે એરપોર્ટની ફરતે આવેલી હાઈરાઈઝ બિલ્ડીંગોના બાંધકામ મુદ્દે વર્ષ 2019માં અરજી કરી હતી. અમદાવાદની દુર્ઘટના બાદ અરજદારે અરજીની વહેલી સુનાવણી કરવા ગુજરાત હાઈકોર્ટ સમક્ષ માગ કરી હતી. ગુજરાત હાઈકોર્ટે અરજદારની અરજી ફગાવી દઈને વધુ સુનાવણી પહેલેથી નક્કી કરેલી તારીખ 16 જુલાઈએ કરવાનો આદેશ કર્યો હતો. સુરત એરપોર્ટની આસપાસ સુરક્ષાને ભયમાં મૂકતા બાંધકામ દૂર કરવા અરજદારે હાઈકોર્ટ સમક્ષ માગ કરી છે. 

અમદાવાદના મેઘાણીનગરમાં એર ઇન્ડિયાનું પ્લેન ક્રેશ થતાં 270 થી વધુ લોકોએ જીવ ગુમાવવા પડ્યા છે. વર્ષ 2019માં ગુજરાત હાઇકોર્ટમાં સામાજિક કાર્યકર વિશ્વાસ બાંભુરકરે જાહેર હિતની અરજી દાખલ કરી હતી. સુરત એરપોર્ટની આજુબાજુ ગેરકાયદે બાંધકામો થતાં પેસેન્જર, ક્રુ મેમ્બર્સ અને આસપાસ રહેતા લોકોની સુરક્ષાનો પ્રશ્ન ઉભો થયો હોવાનો દાવો કરી અરજદારે તેવા બાંધકામો દૂર કરવા હાઈકોર્ટ સમક્ષ માગ કરી હતી.

જાહેર હિતની અરજીમાં અરજદારે કહ્યું હતું કે, હાઈરાઈઝ બિલ્ડીંગો સાથે વિમાનનો અકસ્માત થવાની અને મોટા પાયે જાનમાલની હાનિ થવાની પૂરી શક્યતા છે. એરપોર્ટની ફરતે ઉંચી બિલ્ડિંગોના બાંધકામની મંજૂરી હોઈ શકે નહીં. ગેરકાયદે બાંધકામો ખાલી કરાવી એરક્રાફ્ટ એક્ટ 1984 મુજબ તેને દૂર કરવામાં આવે. બિલ્ડરોએ નો ઓબ્જેક્શન સર્ટિફિકેટ લીધું હોય તો પણ તેને તોડી પાડવું જરૂરી છે. લોકોના જીવનને ભયમાં મૂકનાર બિલ્ડરો સામે દીવાની તેમજ ફોજદારી કેસ દાખલ કરવામાં આવે.

અમદાવાદ વિમાન દુર્ઘટના બાદ અરજદારે હાઇકોર્ટ સમક્ષ નિયત સમય કરતાં વહેલી સુનાવણીની માંગ કરી હતી. હાઈકોર્ટના ચીફ જસ્ટીસ સુનિતા અગ્રવાલની બેન્ચ સમક્ષ ગુરૂવારે (19 જૂન) અરજી ઉપસ્થિત થઈ હતી. અરજદારે અમદાવાદ પ્લેન ક્રેશનું ઉદાહરણ આપી સુરતમાં પણ પ્લેન અકસ્માતની સંભાવના દર્શાવતા 47 હજાર લોકોના જીવ જોખમમાં હોવાનું જણાવ્યું હતું. હાઇકોર્ટે અરજદારની વહેલી સુનાવણીની માગ નકારીને તેમજ નજીકની તારીખ નહીં આપી સુનાવણી પહેલેથી મુકરર 16 જુલાઈએ રાખવાનો આદેશ કર્યો હતો.

અરજદારે અરજીમાં જણાવ્યું હતું કે વર્ષ 1990માં સુરતમાં હવાઈ પટ્ટી 1400 મીટરની હતી. જેને એરપોર્ટ ઓથોરિટી ઓફ ઇન્ડિયાએ પોતાના હસ્તક લીધા બાદ લંબાઈ વધારીને 2250 મીટર કરવામાં આવી હતી. ત્યારબાદ 2950 મીટર કરીને આજુબાજુમાં બિલ્ડિંગો વધતા 615 મીટરનો ઘટાડો કરાયો હતો. અરજીમાં જણાવ્યા મુજબ વર્ષ 2017માં સુરત એરપોર્ટ ઉપર એક સપ્તાહ દરમિયાન 260 ફ્લાઇટનું સંચાલન થતું હતું. એપ્રિલ-2017 થી માર્ચ-2018 સુધીમાં 6.81 લાખ પેસેન્જરોએ મુસાફરી કરી હતી.

અરજીમાં દર્શાવેલા આંકડા મુજબ સુરત એરપોર્ટની બાજુમાં 90 બિલ્ડર્સે બાંધકામ કર્યુ છે. 18 પ્રોજેક્ટમાં NOCનો ભંગ કરાયો છે. બિલ્ડરોને અપાયેલી 40 નોટિસ પણ જાહેર હિતની અરજીમાં જોડવામાં આવી હતી. મંજૂર કરાયેલા બિલ્ડીંગોના બિલ્ડર્સે માપદંડ કરતાં 1 થી 14 મીટર જેટલું ઉંચું ગેરકાયદે બાંધકામ કર્યુ છે. બાંધકામ કરનારાઓએ કોઈપણ ઓથોરિટીની મંજૂરી લીધી નથી. બિલ્ડિંગોનો હાલમાં ઉપયોગ કરવામાં આવતાં ઓથોરિટીએ NOC ના ભંગ બદલ નોટિસો પણ આપી છે.

DGCA દ્વારા બિલ્ડરો સામે કાર્યવાહી હાથ ધરવા નિર્દેશ અપાતા એરપોર્ટ ઓથોરિટી ઓફ ઇન્ડિયાએ પણ નોટિસો આપી છે. અહીં 50 જેટલા બિલ્ડીંગના પ્રોજેક્ટ કામ થઈ રહ્યા છે. હાઇકોર્ટે નોંધ્યું છે કે ગંભીર પ્રશ્ન મુદ્દે કેન્દ્રીય ઓથોરિટી અને સ્થાનિક ઓથોરિટીની બેદરકાર જણાઈ છે. 30 જૂન 2019ના રોજ 43 પેસેન્જર ભરેલી સ્પાઈસ જેટની ફ્લાઈટને લો વિઝનને લઈને એરપોર્ટ ઉપર ઉતરતા બ્રેક લાગી શકી નહોતી. બીયુ પરમિશન ન હોવા છતાં પણ આ બિલ્ડિંગોનો ઉપયોગ શરૂ થઈ ચૂક્યો છે. હાઇકોર્ટે ઓથોરિટી પાસેથી એક્શન ટેકન રિપોર્ટ પણ માંગ્યો હતો. એટલું જ નહીં પરંતુ ઓથોરિટી સમક્ષ હિતધારકોને સાંભળવા તક પણ આપી હતી.

અરજીના આધારે હાઈકોર્ટે પોતાના હુકમમાં 27 બિલ્ડીંગોના નામ નોંધ્યા હતા. જેમાં DRB રવાણી ડેવલપર્સ અંતર્ગત સેલેસ્ટીયલ ડ્રીમ્સ, રઘુવીર ડેવલોપર્સની ક્રિસ્ટલ પેલેસ કો ઓપરેટિંગ હાઉસિંગ સોસાયટી, ફ્લોરેન્સ કો ઓપરેટીવ હાઉસિંગ સોસાયટી, હોરીઝોન પ્રોજેક્ટ, જશ રેસીડેન્સી, જોલી રેસીડેન્સી, રસિક વિલા, રઘુવીર ડેવલોપર્સ, સમર્થ એન્કલેવ, સર્જન એપાર્ટમેન્ટ, શ્રીજી રેસીડેન્સી, શૃંગાર રેસીડેન્સી, ઓમ આઇકોન કો ઓપરેટિંગ હાઉસિંગ સોસાયટી, શ્યામ પેલેસ, સ્ટાર ગેલેક્સી ઓપરેટિંગ હાઉસિંગ સોસાયટી, ધ ઈવોલ્યુશન, ગોકુલ પ્લેટિનમ, ગ્રીન ફોર્ચ્યુન, હેપ્પી ગ્લોરિયસ, સેવન હેવન, એમ્પાયર રીજેન્સી, આગમ ક્રોસરોડ કો ઓપરેટિંગ હાઉસિંગ સોસાયટી, ફિયોના એપાર્ટમેન્ટ, રવિ રત્નમ એપાર્ટમેન્ટ, સ્વાસ્તિક વિહાર એપાર્ટમેન્ટ, L&T એપાર્ટમેન્ટ, હેપ્પી રેસીડેન્સીનો સમાવેશ થાય છે. મોટાભાગની બિલ્ડીંગ VIP રોડ અને વેસુ રોડ ઉપર આવેલી છે.

હાઇકોર્ટે બિલ્ડીંગનો અનધિકૃત ભાગ તોડવા કલેકટરને મદદ કરવા સુરત મહાનગરપાલિકાને સૂચના આપી હતી. અમદાવાદ પ્લેનની દુર્ઘટના બાદ અરજદારે તાત્કાલિક સુનાવણીની માગ કરી હતી. જેને ધ્યાને રાખી હાઇકોર્ટે ગુરૂવારે(19 જૂન)ના રોજ હાઇકોર્ટમાં સુનાવણી નક્કી કરી હતી. આ અરજીમાં સુરત મહાનગરપાલિકા, એરપોર્ટ ઓથોરિટી ઓફ ઇન્ડિયા અને DGCAને પણ પક્ષકાર બનાવવામાં આવ્યા છે.